Oskar 2012: Nata e magjive dhe të papriturave!

Filmi francez “The Artist” triumfoi në edicionin e 84-t të ndarjes së çmimeve “Oskar” Në Hollivud e quajnë “vizionari i madh”, “magjistari”, “babai i efekteve vizive”, pikërisht për kontributet teknologjike që kanë pasuruar industrinë kinematografike. Është fjala për Douglas Trumbull, 69 vjeç, një emër i panjohur për publikun, por një mit i gjallë për kinemanë. Trumbull mori “Oskarin” special të karrierës. Duket se kandidaturat e prezantuara në “Golden Globe” u bënë realitet. Filmi francez “The Artist” triumfoi në edicionin e 84-t të ndarjes së çmimeve “Oskar”. Edhe “Hugo Cabret”, filmi i Martin Scorsese-s u vlerësua me pesë statuja të arta, por çmimet e tij nuk “peshonin” sa ato të filmit pa zë bardhë e zi, prodhuar nga djali i të ndjerit Claude Berri. Filmi amerikan (i përshtatur në Paris) fitoi çmimet për fotografinë, skenografinë, montazhin më të mirë, kolonën zanore më të mirë dhe efektet speciale më të mira. Filmi francez (i përshtatur në Hollivud) fitoi çmimet për kostumet, kolonën zanore, aktorin më të mirë (Jean Dujardin), regjisorin më të mirë (Michel Hazanavicious) dhe filmin më të mirë. Ky ishte një triumf i madh për Francën, që asnjëherë më parë nuk kishte marrë kaq shumë çmime për një aktor, regjisor dhe film. Në fakt kjo herë e parë nuk ka qenë kaq surprizë për filmin në fjalë, duke qenë se “The Artist” është vlerësuar me shumë çmime kudo që është prezantuar, nga “Bafta” (çmimet “Oskar” europiane) te “Golden Globe” (çmimet e shtypit të huaj). Vetëm në Kanë, “The Artist” nuk u vlerësua maksimalisht (hyri në konkurs pasi u prezantua fillimisht jashtë). Thashethemexhinjtë e mirinformuar të Akademisë kishin thënë se “The Artist” do të nderohej me shumë çmime, pasi ishte edhe filmi i preferuar i presidentit të jurisë. Po ashtu, në kategorinë e aktores më të mirë ka triumfuar Meryl Streep, edhe pse pak ditë më parë ajo deklaroi se nuk e lakmonte aq shumë këtë trofe. Roli i saj, ai i Margaret Thatcher në filmin “The Iron Lady”, duket se nuk ka pasur konkurrentë të tjerë dhe juria vendosi që të nderonte me këtë trofe veteranen e kinemasë. Ky është çmimi i tretë që Streep çon në shtëpi. Dy statujat e arta të fituara kanë qenë në vitet 1979 dhe 1982.

Një surprizë tjetër e kësaj mbrëmjeje të ndarjes së çmimeve “Oskar” ka qenë edhe Çmimi për Aktorin më të Mirë joprotagonist. E gjithë ceremonia u pushtua nga “The Artist”. Prej këtij filmi doli edhe një fitues tjetër, Christopher Plummer, i cili në moshën 82-vjeçare ishte aktori më i vjetër që fitoi një “Oskar”.

Nga ana tjetër, edhe filmi “Hugo” i Martin Scorsese-s, që mendohej se do të ishte konkurrenti më i fortë i “The Artist”, ka arritur të rrëmbejë po ashtu pesë çmime “Oskar”, por të gjitha këto kanë qenë çmime “teknike”. Gjithashtu një trofe ka shkuar edhe për filmin e Woody Allen, “Midnight in Paris”, që është vlerësuar për origjinalitetin e skenarit të tij.

Paradë mode në tapetin e kuq

Përveç të qenët një ceremoni, ku të kandiduarit presin marrjen e trofeut, ceremonia e ndarjes së çmimeve “Oskar” u shndërrua në një pasarelë mode për yjet e Hollivudit. Cilët ishin yjet e veshur më bukur dhe cilat kryesuan listën e të veshurave më shëmtuar për këtë ceremoni? Në listën e aktoreve të veshura më bukur u futën Michelle Williams, e kandiduar në kategorinë e aktores më të mirë, Natalie Portman, që rikthehet në formën e saj më të mirë pas lindjes, si edhe Cameron Diaz. Po ashtu nuk mbetet pa u përmendur Jennifer Lopez, fustani i së cilës u cilësua ndër më të bukurit në këtë ceremoni. Nuk mbetën pas aktoret Gwyneth Paltrow, Angelina Jolie, Jessica Chastain dhe Kelly Osbourne. Ndërkohë që për veteranen e mbrëmjes, Meryl Streep, fjalia e vetme që u tha për sa i takonte veshjes, ishte: “Duket 20 vjet pas në kohë”: që do të thotë se fustani i saj jo vetëm që nuk kishte lidhje me tendencën e momentit, por dukej si një veshje e nxjerrë nga një gardërobë e 20 viteve më parë. /BotaSot/