BE-ja heq Kosovën nga harta e Serbisë, reagon partia Koshtunicës!

Bashkimi Evropian, në faqen zyrtare të internetit, ka hequr Kosovën nga harta e Serbisë, por jo edhe nga harta e Evropës.
Te web-faqja www.europa.eu , në hartën e Evropës, në kategorinë e shteteve, ku me ngjyra dallohen shtetet anëtare të BE-së, shtetet kandidate dhe shtetet e tjera, Kosova figuron si pjesë e Serbisë në kategorizimin “shtetet tjera evropiane”.

Harta e Serbisë, pas klikimit, nuk e përfshinë më Kosovën. Ndërsa, te të dhënat që flasin për Serbinë, figuron se ky shtet ka 77 mijë e 474 kilometra në katrorë, e jo 88 mijë e 361 siç pretendon t’i ketë Beogradi zyrtar.

Për këtë ka reaguar Partia Demokratike e Serbisë e Vojisllav Koshtunicës, e konsideron të papranueshme, që derisa në Serbi valëviten flamujt e Bashkimit Evropian, pas marrjes së kandidaturës për anëtarësim në BE, Bashkimi Evropian në faqen e vet zyrtare vendos hartën me të dhënat për Serbinë pa Kosovën.

”Në momentin kur Serbia ka marrë statusin e kandidatit, pushteti i ka vendosur në ndërtesat e qeverisë dhe parlamentit të flamujt e BE-së, kurse Bashkimi Evropian është revanshuar në atë mënyrë që në faqen e saj zyrtare ka varur hartën e Serbisë pa Kosovën”, ka deklaruar zëdhënësi i Partisë Demokratike Serbe, Petar Petkoviq, raportojnë mediat e Serbisë.

Ai u ka shpërndarë gazetarëve një faqe të printuar nga faqja zyrtare e BE-së, në të cilën shihet Serbia pa Kosovën.