Erkand Qerimaj e Romela Begaj: Krenari të ngrinim flamurin shqiptar në Europian!

Emocionuese. Kjo fjale mund ta përshkruajë atmosferën në të cilën u priten në Rinas Erkand Qerimaj dhe Romela Begaj, kampion dhe nënkampione të Evropës në kampionatin e zhvilluar në Antalia. “Të ngresh flamurin shqiptar në mes të Evropës e të shpallesh kampion i Evropës janë disa emocione që të përshkojnë gjithë trupin. Me gjithë ato sakrifica dhe gjithë ato mundime, kur arrin të hipësh në podin e Evropës është një emocion shumë i veçantë”,-tha Erkand Qerimaj kampion i Evropës. Nuk fsheh lotët dhe emocionet Romela Begaj, nënkampione e Evropës. Por peshëngritësja ndihet e vjedhur. Vendimi për një faull teknik i gjyqtarëve i hoqi nga duart titullin kampion në dygarësh. “Në shpirtin tim jam kampione e Evropës dhe më vjen shumë keq. U them të gjithë shqiptarëve që nuk ishte faji i Romelës. Më vjen shumë keq. Jam shumë e emocionuar. Faleminderit shumë! Do të doja të ngrija flamurin, por nuk ishte faji i Romelës. Gjithçka është shumë e fortë. Për mua ishte shumë e vështirë kjo garë, isha e përgatitur megjithatë…presim olimpiadën”,-u shpreh Romela Begaj nënkampione e Evropës.

Pas Antalias është radha e Londrës dhe Lojrave Olimpike. Medaljet janë një ëndërr e madhe për peshëngritësit që premtojnë maksimumin.

“Është përpara olimpiada, u premtoj të gjithëve që do të impenjohem edhe më tepër. Do të jap maksimumin tim, por të shohim, t’ia lëmë kohës sepse unë nuk jap deklarata përpara garave”,-u shpreh Qerimaj.

“Nuk jap premtime, por Romela do të bëhet e fortë. Do e ngre flamurin”,-theksoi Begaj. Suksesi në Kampionatit Evropian është një premisë e mirë dhe shton optimizmin te Presidenti i Federatës Shqiptare të Peshëngritjes, Esat Ademi.
“Shqipëria zuri vendin e katërt sa i takon numrit të medaljeve. Mendoj që ky rezultat nuk ka ardhur asnjëherë në Shqipëri. Pse jo, pas 63 vjetëve themelimi të Federatë Shqiptare të Peshëngritjes, ne nxjerrim për herë të parë një kampion evrope”,-u shpreh Ademi.

Shqipëria është kualfikuar me pesë peshëngritës në Lojrat Olimpike Londër 2012, katër meshkuj dhe një femër, ndërsa ky sport ka përfaqësimin më të lartë dhe më premtues në kompeticionin gjigand të sportit botëror.