Jaho Mulosmani “braktiset” në Strasburg

Dorëheqja e gjyqtarit shqiptar në Gjykatën Evropiane të të Drejtave të Njeriut ka ndërprerë procesin “Mulosmani kundër Shqipërisë”


Gjyqtari shqiptar, Ledio Bianku jep dorëheqjen nga çështja. Strasburgu-qeverisë: Caktoni një gjyqtar tjetër

TIRANË- Jaho Mulosmani, i dënuari me burgim të përjetshëm për vrasjen e Azem Hajdarit“braktiset” në Gjykatën e Strasburgut. Gjyqtari shqiptar në Gjykatën e të Drejtave të Njeriut, Ledio Bianku, ka dhënë dorëheqjen nga gjykimi i çështjes së Mulosmanit, duke sjellë kështu ndërprerjen e përkohshme të procesit.Ky lajm konfirmohet nga burime të Ministrisë së Jashtme, të cilat pohuan për “Shekullin” se me këtë vendim të gjyqtarit Bianku janë njohur pas shkresës së dërguar nga Gjykata e Strasburgut, e cila kërkon nga qeveria shqiptare të caktojë një gjyqtar tjetër për gjykimin vetëm të kësaj çështjeje. E pyetur për këtë rast, përfaqësuesja ligjore e qeverisë shqiptare në Gjykatën e Strasburgut, Suela Mëneri, pohoi dje për “Shekullin” se:“unë deri më tani nuk jam njohur me një shkresë të tillë dhe nuk kam dijeni për dorëheqjen e gjyqtarit Ledi Bianku nga kjo çështje”.



Megjithatë, burime të besueshme në Ministrinë e Jashtme bëjnë me dije se dorëheqja e gjyqtarit Bianku tashmë është fakt. Shkak për dorëheqjen e tij nga çështja e Jaho Mulosmanit është bërë një prononcim në media i Biankut, gati dy vite më parë, në lidhje me këtë çështje që po gjykohej në Gjykatën e të Drejtave të Njeriut në Strasburg, duke u shprehur për çështjen në cilësinë e ekspertit për të drejtat e njeriut. Dorëheqja e tij është vlerësuar e rregullt dhe e pranueshme, pasi gjyqtari Ledio Banku ka dhënë arsyen e dorëheqjes nga gjykimi i çështjes, duke evituar çdo keqinterpretim nga mbrojtësit ligjorë të të pandehurit Jaho Mulosmani, ndërkohë që ka qenë e pamundur për “Shekullin” të marrë një reagim prej Biankut.




Gjykata e Strasburgut, bashkë me letrën përcjellëse të njoftimit që gjyqtari Bianku ka dhënë dorëheqjen nga çështja, ka nisur edhe një shkresë ku i kërkohet qeverisë shqiptare që para datës 21 mars, të caktojë një gjyqtar tjetër për gjykimin e çështjes së Jaho Mulosmanit, i dënuar nga gjykatat shqiptare me burgim të përjetshëm për vrasjen e deputetit Azem Hajdari, në shtator të vitit 1998. Sipas procedurës së ndjekur nga Gjykata e Strasburgut, në rast se shteti shqiptar nuk cakton brenda këtij afati një gjyqtar tjetër për gjykimin e kësaj çështjeje, vetë drejtuesit e kësaj Gjykate vendosin një gjyqtar për gjykimin e çështjes, që sipas praktikave të tyre mund të jetë ish-gjyqtari i Shqipërisë në Strasburg.

Vetëm pak muaj më parë, Ledio Bianku u caktua nga qeveria si gjyqtar pranë Gjykatës të së Drejtave të Njeriut në Strasburg, duke zëvendësuar gjyqtarin Kristaq Traja, të cilit i mbaroi mandati. Çështja “Mulosmani kundër Shqipërisë” është një ndërdosjet më të rëndësishme shqiptare që po shqyrtohet aktualisht në Gjykatën e Strasburgut, pasi i pandehuri pretendon gjatë procesit gjyqësor në vendin tonë janë shkelur Konventat ndërkombëtare për të drejtat e njeriut.Tashmë pritet përgjigja e qeverisë shqiptare, që do të zëvendësojë Biankun në këtë çështje.


Jaho Mulosmani pretendon për proces të parregullt gjyqësor dhe prezumim të pafajësisë


“Mulosmani”, Strasburgu nisi 6 pyetje për Berishën

TIRANË- Proces i parregullt gjyqësor dhe prezumim i pafajësisë. I dënuari i vetëm me burgim të përjetshëm për vrasjen e deputetit të PD-së, Azem Hajdari i është drejtuar Gjykatës së Strasburgut kohë më parë dhe pretendimet e tij të mësipërme janë pranuar për t’u shqyrtuar. Edhe pse është dënuar si ekzekutori i Hajdarit, Jaho Mulosmani nuk e ka pranuar asnjëherë akuzën, duke e çuar betejën e tij ligjore deri në Gjykatën Evropiane të të Drejtave të Njeriut. Mulosmani ka pretenduar se nga drejtësia shqiptare nuk i është siguruar një mbrojtje e drejtë dhe e paanshme, ndërkohë që një pikë e fortë e materialeve të tij, dërguar Strasburgut ka qenë përmendja e emrit të tij si ekzekutor i mundshëm, menjëherë pas krimit. “

Kryetari i Partisë Demokratike, Sali Berisha, ka deklaruar menjëherë pas vrasjes, pa u kryer ende hetimet se autori ishte Jaho Mulosmani”,-ka thënë ky i fundit në dosjen e tij për Strasburgun, duke e cilësuar këtë prezumim të pafajësisë. Nga ana e vet, Gjykata e Strasburgut ka pranuar të shqyrtojë çështjen “Mulosmani kundër Shqipërisë”, duke i çuar njëherazi 6 pyetje qeverisë shqiptare për kryeministrin Sali Berisha.Ky i fundit është kërkuar disa herë si dëshmitar në gjyqin për vrasjen e Azem Hajdarit, por nuk është paraqitur edhe pas urdhrit për të dëshmuar forcërisht. Qeveria shqiptare i ka kthyer përgjigje Strasburgut se Berisha nuk ka dëshmuar në këtë proces, për shkak se gjykatat e asaj kohe ishin të pasigurta. Të gjitha këto dëshmi dhe kundërdëshmi ndodhen tashmë në Gjykatën e Strasburgut, e cila ka në proces gjykimin çështjen e Jaho Mulosmanit.


DËNIMET

Vendimi i gjykatës për vrasjen e Azem Hajdarit

TIRANË- Jaho Mulosmani, i akuzuari kryesor për vrasjen e deputetit të PD-së, Azem Hajdari, u dënua me burgim të përjetshëm, dënim maksimal, sipas kodit penal shqiptar. Me heqje lirie u dënuan edhe tre vëllezërit Haxhia, Ismeti me 20 vjet burg, Isamedini me 2.5 vjet burg, ndërsa Izet Haxhia u dënua me 25 vjet burg në mungesë. Ky i fundit u arrestua vetëm pak muaj më parë në Turqi, por ekstradimi i tij nuk duket aq i lehtë për autoritetet shqiptare të drejtësisë. Gjykata shpalli të pafajshëm ish-komisarin e policisë së Tropojës,Fatmir Meta. Me shumë interes në sallën e gjyqit, u prit deklarimi i trupit gjykues rreth motivit të vrasjes.

Partia Demokratike për tre vjet rresht kishte thënë se vrasja kishte qënë politike, por trupi gjykues tha se deputeti Hajdari u vra në 12 shtatorin e 1998-ës për hakmarrje. Procesi gjyqësor për vrasjen e Azem Hajdarit cilësohen si një ndër gjyqet më të rëndësishme,ndërsa sipas PD-së, ishte lënë mjaft kohë për likuidimin njëri pas tjetrit, të të dyshuarve të tjerë, si pjesëmarrës në vrasjen e tij. Azem Hajdari ishte një nga figurat kryesore të politikës shqiptare të viteve '90. Ai u vu në krye të lëvizjes studentore të dhjetorit 90, që çoi në përmbysjen e komunizmit në Shqipëri.Hajdari u zgjodh drejtpërsëdrejti nga populli si deputet i Kuvendit të Shqipërisë në të gjitha votimet pluraliste pasardhëse.