Udhëtimi që ndau tragjikisht Armandin dhe Besjanën!

E pafund është dhimbja për Besjana Xhenetin, studenten 21-vjeçare të Universitetit të Elbasanit, të cilës aksidenti tragjik në Qafën e Vishës i mori jetën e të fejuarit, Armand Halilaga, me të cilin ishte lidhur zyrtarisht me fejesë prej shtatë muajsh, raporton agjencia e lajmeve NOA.al. 24-vjeçari nga Kavaja, Armand Halilaga ndodhej në autobusin e tragjedisë për të shoqëruar të fejuarën e tij, Besjana Xhenetin, në ekspeditën mësimore drejt Jugut të Shqipërisë, që ata mezi e kishin pritur si një aventurë të bukur dashurie. Këtë e rrëfejnë familjarët e Armandit, që rrëfejnë edhe se dy të rinjtë ishin njohur në Kavajë, ku jetonin me familjet e tyre.

Armandi dhe Besjana banojnë në të njëjtën lagje në qytetin e Kavajës.

Para shtatë muajsh ata e kishin zyrtarizuar historinë e tyre të dashurisë, që do të ndërpritej tragjikisht, pasi Armand Halilaga, mashkulli i vetëm veç shoferit, që ndodhej në autobusin e tragjedisë humbi jetën bashkë me viktimat e tjera femra.

Familjarët e Armand Halilagës nuk kanë fjalë për të përshkruar dhimbjen për humbjen e djalit të tyre.

Momenti i marrjes së lajmit ishte i kobshëm për ta.

Prindërit e të riut e kanë sjellë në shtëpi trupin e të birit, më i madhi prej fëmijëve, dhe po i japin lamtumirën e fundit para kohe.

Pranë tyre për t’i ngushëlluar ndodhen miq të të birit, të afërm.

24-vjeçari Armand Halilaga, ishte djali i madh i familjes Halilaga.

Ai punonte si kamarier në një nga lokalet e Kavajës, për t’i ardhur në ndihmë ekonomikisht familjes së tij me gjashtë pjesëtarë.

Ndërsa 21-vjeçarja Besjana Xheneti, e cila po trajtohet në spitalin e Vlorës, studionte në vitin e fundit të Universitetit “Aleksandër Xhuvani” në Elbasan dhe jetonte në konviktin e shkollës.

Dy të rinjtë u nisën në udhëtimin që do t’i ndante tragjikisht.

mit/noa.al