Ia vlen të sakrifikohet për dashuri!

Të rinjtë shpeshherë dashurinë e nisin në shkollë, dhe kjo dashuri lind zakonisht në mes një shoku dhe një shoqeje. Megjithatë lidhja e parë midis dy adoleshentëve nuk do të thotë gjithmonë dashuria e parë. Mirëpo në qoftë se lidhja është e fuqishme dhe të dy partnerët e duan njësoj njëri-tjetrin do gjejnë mënyrën në një moment të caktuar të jenë prapë bashkë. Pra një pjesë e të rinjve sakrifikojnë mjaft shumë për dashuri.

Eduarta Hasani mendon se nëse dashuria është e fortë dhe e qëndrueshme ia vlen të sakrifikohet. Ajo është pro sakrifikimit edhe pse ende nuk është e dashuruar.

“Nuk mund të flas shumë për çështjen e dashurisë, sepse nuk e kam përjetuar ende. Mirëpo nëse do të ishte e nevojshme unë do të kisha sakrifikuar për dashurinë. Personalisht ndonjëherë mendoj se dashuria jeton përjetësisht, por për të mbijetuar e ka një çmim. Për ne femrat është thjeshtë të ndjekim zemrën që na thërret, kurse për meshkujt mjafton të nënshtrojnë instinktin e tyre”, shprehet ajo.

Për dallim nga Eduarta, Ilir Stublla mendon se sakrifica nuk bëhet për çdo lloj dashurie. Ai thotë se nuk ia vlen të sakrifikohet për një dashuri që është krijuar për një lidhje interesi apo diçka të ngjashme.

“Nëse dashuria është e dyanshme dhe e qëndrueshme atëherë ia vlen të sakrifikohet përndryshe jo. Ndonjëherë mendoj se dashuria nuk jeton përjetësisht, por është vetëm një iluzion në mendjen dhe në ëndrrat tona. Për shumë njerëz dashuria nuk është e përjetshme dhe për disa të tjerë është e tillë. Ekziston por e vështirë për ta besuar dhe e rrallë për ta shijuar”, thotë ai.

Iliri uron që gjatë tërë jetës së tij të ketë një bashkëshorte të mirë dhe të sinqertë. “Uroj që mos të kem problem me të dashurën time, ndërsa sa i përket sakrifikimit mendoj se duhet që të dy të sakrifikojnë për njëri-tjetrin e jo kjo të ndodhë vetëm tek meshkujt. Dashuria varet edhe nga ana e femrës, madje kam përshtypjen se hapin e parë duhet ta bëjnë femrat në mënyrë që ta mbajnë sa më të fortë lidhjen e tyre të dashurisë. Nëse një femër është e sinqertë dhe e mençur di ta bëjë djaloshin të çmendet pas saj dhe me këtë natyrisht se krijohet një lidhje e fortë dhe shumë e qëndrueshme”, shton ai.

Sipas Dafina Krasniqit dashuria e përjetshme nuk lind, ajo nuk ka fillim as mbarim, thjeshtë është një dashuri që nuk e di ku e ka burimin, e jo ajo që matet me të gjitha gjërat që janë për rreth.

“Nganjëherë situata e krijuar në këto rrethana të reja na bënë të dyshojmë, por jo edhe të humbim tërësisht besimin se ekziston. Ndërsa nëse fitojmë bindjen se me të vërtetë ekziston atëherë edhe mund të sakrifikosh”, thotë ajo. Dafina mendon se dashuria e përjetshme është ajo e cila i kalon kufijtë e interesave, e cila në themelin e saj e ka besimin dhe e cila pas të gjitha vështirësive mbijeton. /zeri/