Zhgënjimi në dashuri, si të veprojmë?

Zhgënjimet në dashuri të japin dhimbje në çdo moshë, por kur këtë e përjetojnë adoleshentët ndonjëherë nuk dinë të menaxhohen.

Prandaj shumë prej tyre kërkojnë këshilla nga të tjerët e posaçërisht me shoqen apo shokun e ngushtë. Ka prej tyre që për shkak të zhgënjimeve që kanë pësuar, kanë zgjedhur edhe veprimet më të rënda, për të mos vuajtur më.

Adoleshentët duhet ta kenë parasysh se nuk është asnjëherë vetëm një rrugë në jetë, mund të gjejmë gjithmonë një mënyrë për tu ndjerë më mirë. “Sipas Eglantina Bllacakut gjëja e parë që duhet bërë të rinjtë është mos dorëzimi ndaj vështirësive. “Nuk duhet të mendoni se ky është fundi, sepse jeta vazhdon edhe pa ata që na kanë sjellë në këtë gjendje.

Natyrisht se çdo e re mund të ketë pasur ndonjë zhgënjim në dashuri, mirëpo përsëri duhet marrë veten dhe ta kalojmë atë mërzi të cilën na e krijon njeriu i keq.

Fundi fundit duhet të mbështetemi te personat që na duan”, thotë ajo për “Zëri”. Kur një dashuri e madhe përfundon, mbi të gjitha provojmë ndjenjën e ndarjes dhe për këtë arsye nuk duhet të izolohemi.

Kështu mendon edhe i riu Taulant Krasniqi i cili ka hasur të ketë probleme të kësaj natyre gjatë kësaj periudhe. “Si shumë të rinj të tjerë, edhe unë kam pasur disa mosmarrëveshje të cilat më kanë sjellë mjaftë mërzi. Mirëpo kjo kalon brenda një kohe dhe përsëri dhe fillon të ndjehesh mirë. Besoj se njeriu duke takuar persona të tjerë dhe të dashur mund ta harroj personin tjetër. Unë ia kam dalë në këtë mënyrë dhe kështu që vazhdoj të jem i lumtur”, shton ai.

Sipas Taulantit ndonjëherë është mjaftë normale të mbyllemi në dhimbjen tonë, por nuk është një mënyrë shumë e shëndetshme për të përballuar zhgënjimet.

Të përjetosh një zhgënjim do të thotë mjaftë shumë, sepse sipas Sara Gashit Kur njeriu lëndohet keq, vështirë se do të mund ta harroj atë zhgënjim. “Unë jam një tip mjaftë i ndjeshëm dhe po që se zhgënjehem njëherë vështirë se do të mund ta harroj atë zhgënjim. Falë djaloshit që kam në krah deri më tani vazhdojmë të mbajmë lidhjen mjaftë mirë, e sa për zhgënjim nuk guxoj as ta mendoj, sepse nuk do të di se si do ta kisha përballuar. Të thuash që do ta kaloj është e kotë, sepse kur vuajmë ndihemi si në një vrimë të zezë. E rëndësishme është që të rrimë me personat që na duan”, thekson ajo.

Sipas Sarës dashuria është ajo, që njeriun e bën njeri, aftësinë për të ndjerë dhe të mos ndjerë. Për disa të rinj lidhjet e dashurisë nuk zgjasin shumë, për faktin se një pjesë e madhe e tyre dashurinë e nisin si një shaka apo thjeshtë për të provuar ndjesinë e saj.

Por ekziston edhe fakti se adoleshentët duhet ta shijojnë këtë eksperiencë të parë bashkë me dhimbjen që mund të pasojë, pasi zhgënjimet në jetë do të jenë të shumta dhe ata duhet që në këtë moshë të fillojnë të mësohen me to duke përdorur si armë ndihmën e shokëve dhe të njerëzve të afërm. /zeri/