Sjellja dhe stili!

Shpesh e gjejmë të vështirë t’i lëmë përshtypje të mirë dikujt, e aq më tepër kur mendohet se të gjithë idenë rreth teje, një person e krijon në 30 sekondat e para që ju sheh. E pyesni veten ndonjëherë, se çfarë duhet të bëni më shumë sesa të silleni mirë me dikë që pavarësisht të gjithave, përsëri nuk ka një mendim të mirë për ju? Shkenca ka provuar se po të silleni mirë me dikë me qëllimin që t’ju pëlqejë, nuk është metoda më e mirë. Shpesh funksionon e kundërta. Ja disa mënyra sesi të bëheni miq të ngushtë me ata që nuk ju kanë qejf.

Kërkoni t’ju bëjnë ndere. Një burrë i quajtur Benxhamin Frenklin u mundua të fitonte simpatinë e dikujt, i cili nuk e pëlqente aspak. Benxhamin i kërkoi tjetrit që t’i huante një libër të rrallë dhe kur e mori librin, e falënderoi me mirënjohje. Si rezultat i kësaj huamarrjeje, burri që nuk kishte dashur kurrë t’i fliste Benxhaminit, u bë shok i ngushtë me të. Sipas Frenklinit: “Ai që ju ka bërë një nder, do të jetë më i gatshëm t’ju ndihmojë përsëri, sesa ai të cilin ju vetë e ndihmoni më shumë”. Shkencëtarët vendosën ta testojnë këtë teori dhe zbuluan se ata persona të cilëve iu kërkua nga studiuesit t’i bënin një nder personal, e përcaktuan këtë njeri si më të pëlqyeshëm nga pjesa tjetër e grupit. Duket jashtë logjikës, por kjo teori është e vërtetë. Nëse dikush ju bën një nder, atëherë ai arsyeton se ia ka vlejtur t’ju ndihmojë, ndaj ju mendoi si njeri të mirë dhe të pëlqyeshëm.

Synoni për shumë lart. Ky truk konsiston në atë që të kërkoni nga dikush diçka shumë më të madhe, sesa ajo që doni në të vërtetë dhe pastaj të kërkoni atë që synonit në fillim. Nisni duke i bërë një kërkesë qesharake dikujt, të cilën jeni i sigurt se nuk do ta pranojë. Më vonë kthehuni përsëri dhe kërkojini diçka më pak qesharake, diçka që ju e synonit në fillim. Ky truk mund të duket i çuditshëm, por ideja që fshihet pas tij është se personi që ju ka refuzuar në fillim, është ndjerë keq edhe pse kërkesa juaj ishte e paarsyeshme. Kështu që kur ju ktheheni dhe kërkoni diçka të arsyeshme herën tjetër, ai ndihet i detyruar që t’ju ndihmojë. Shkencëtarët e testuan këtë parim dhe zbuluan se funksiononte për sa kohë që personi kërkonte fillimisht një nder shumë të madh e më pas një nder më të vogël. Personit që i kërkohej ndihma ndihej i detyruar që të ndihmonte herën e dytë.

Përdorni emrin e dikujt ose titullin e tij. Dale Carnegie, autor i librit “Si të fitojmë miq”, beson se të përdorni emrin e dikujt është diçka shumë e rëndësishme. Ai thotë se emri i një personi është fjala më e bukur që ky njeri do të donte të dëgjonte, pavarësisht gjuhës që thuhet. Emri është pjesa thelbësore e identitetit dhe të dëgjuarit e tij na vërteton ekzistencën tonë. Për këtë arsye ndikon për mirë edhe në krijimin e një ndjenje pozitive në lidhje me atë që e thotë. Këtë njeri e cilësojmë si një person, i cili e vlerëson ekzistencën tonë. Nga ana tjetër, përdorimi i një titulli mund të ketë pasoja edhe më të mëdha. Ideja është se nëse ju silleni si një person i caktuar, ju do të bëheni ngadalë ai lloj personi. Është njëlloj si të përmbushësh një profeci të shkaktuar nga ju vetë. Pra, në këtë mënyrë ju mund t’u drejtoheni të tjerëve ashtu siç ju dëshiron që ata të jenë dhe ata do fillojnë ta mendojnë veten në atë mënyrë. Duke e thërritur një të njohur “mik” apo dikë me të cilin dëshiron të punoni “shef”, atëherë këta persona do të bëhen më të afërt me ty. Duhet të kini kujdes që të mos e bëni të duket shumë të rëndomtë.

Lajkat ju ndihmojnë që të arrini gjithçka. Mund të duket e thjeshtë të jesh personi që bën lajka, por duhet pasur kujdes. Për fillestarët është e rëndësishme të kuptohet që, nëse lajka nuk duket e sinqertë, do t’ju sjellë më shumë probleme. Studiuesit kanë kërkuar mbi efektet që shkakton lajka te personat që e marrin dhe kanë zbuluar të dhëna interesante. Zakonisht njerëzit përpiqen që të arrijnë një ekuilibër, për t’i mbajtur mendimet dhe ndjenjat e tyre në një nivel mesatar. Studimi tregon se, nëse i bëni një lajkë në dukje të sinqertë dikujt, i cili ka vetëvlerësim të lartë, atëherë ai do t’ju pëlqejë më shumë. Kjo ndodh sepse ju i vërtetoni atij atë që ai ndjen për veten. Mirëpo nëse ju i bëni lajka dikujt, që ka një nivel të ulët vlerësimi për veten, kjo mund të sjellë që ai person të mos ju pëlqejë aspak, sepse ajo që ju thatë, bie ndesh me atë që ai mendon për veten. Kjo nuk do të thotë që ju duhet të poshtëroni dikë që ka nivel të ulët vetëvlerësimi, për të arritur atë që doni.

Pasqyroni sjelljen e tyre. Të pasqyrosh sjelljen e dikujt e njohur ndryshe si imitim është diçka që njerëzit e bëjnë natyrshëm. Njerëzit që e kanë këtë aftësi, janë të ngjashëm me kameleonët. Imituesit përpiqen të depërtojnë në mendjen e njerëzve duke kopjuar sjelljen dhe gjestet e të tjerëve. Megjithatë kjo aftësi e përdorur qëllimisht ka rezultuar të jetë një rrugë shumë e mirë për të qenë të pëlqyer. Shkencëtarët e studiuan imitimin dhe zbuluan se personat që ishin imituar, silleshin shumë mirë dhe i pëlqenin më shumë ata që i imitonin. Një fakt tjetër interesant ishte se personat e imituar ishin më të sjellshëm dhe më të prirë për të qenë dakord edhe me pjesën tjetër të njerëzve që nuk ishin të përfshirë në situatë. Kjo mënyrë funksionon, sepse duke imituar sjelljen e dikujt, e bën këtë të fundit të ndihet i vlerësuar.

Kërkojini ndere dikujt që është i lodhur. Kur dikush është i lodhur, është më i ndjeshëm ndaj gjërave që dikush thotë, qofshin këto pohime apo kërkesa. Kur njerëzit janë të lodhur, nuk kanë vetëm lodhje fizike, por edhe energjia e tyre mendore ka rënë. Kur i kërkoni një nder dikujt që është i lodhur, ka shumë gjasa që të mos merrni një përgjigje të saktë, por një shprehje që pohon se do t’jua bëjë nesër. Kjo përgjigje gjysmë pozitive vjen për shkak se, kur njerëzit janë të lodhur, ata nuk janë në gjendje të marrin vendime të prera. Ndërsa të nesërmen, ka shumë mundësi që kërkesa juaj të plotësohet, sepse personi që ju ka premtuar, dëshiron të mos e shkelë fjalën. Është një dëshirë psikologjike të bësh atë që ju keni pranuar se do ta bëni.

Ofroni atë që s’mund ta refuzojnë. Filloni duke bërë një ofertë, e cila nuk mund të refuzohet dhe vazhdoni të arrini aty ku doni. Kjo mënyrë që është e kundërta e “synoni për shumë lart”, realizohet duke kërkuar një ndihmë të vogël dhe kur personi ka rënë dakord t’ju ndihmojë, atëherë ai është i gatshëm të bëjë diçka më të madhe për ju. Shkencëtarët e testuan këtë fenomen në marketing. Ata filluan t’u kërkonin mbështetje njerëzve në lidhje me pyjet dhe mjedisin, të cilat i cilësuan si kërkesa të thjeshta. Shkencëtarët zbuluan se personat që ishin të gatshëm të ndihmonin në mbrojtjen e mjedisit, ishin më të prirë të blinin produkte që mbështesnin çështjet e mësipërme. Megjithatë nuk duhet të fillohet me një kërkesë dhe pas saj të bëhet menjëherë kërkesa tjetër. Psikologët kanë zbuluar se është më mirë që të prisni një ose dy ditë deri në kërkesën e radhës.

Mos i korrigjoni njerëzit kur janë gabim. T’i thoni dikujt se e ka gabim është zakonisht e panevojshme dhe nuk ju jep përkrahjen e atij personi. Në fakt, ekziston një mënyrë për të shprehur mospajtimin tuaj me një çështje, pa i thënë dikujt se është gabim. Quhet mënyra Ransberger Pivot dhe është e shpikur nga Rei Ransberger dhe Marshall Fritz. Funksionon duke dëgjuar ato që personi ka për të thënë dhe duke u përpjekur të kuptoni sesi ndihet dhe përse. Më pas përdorni një pikë të përbashkët që ju ndani me të dhe filloni pastaj të shpjegoni mendimin tuaj, i cili mund të jetë i kundërt. Kjo bën që personi tjetër t’ju dëgjojë më me kujdes dhe ju lejon ta korrigjoni pa humbur vëmendjen e tij.

Perifrazoni dhe përsëritni atë që dikush sapo ka thënë. Një nga mënyrat më të mira sesi mund të sugjestiononi dikë, është duke i bërë të ditur atij se ju e kuptoni si ndihet dhe se ju prek situata në të cilën ndodhet. Rruga sesi mund ta arrini këtë është duke perifrazuar dhe duke përsëritur atë që personi sapo ka thënë, e njohur ndryshe si pasqyrimi i dëgjimit. Studimet kanë treguar se kur terapistët përdornin pasqyrimin e dëgjimit, personat filluan të zbulonin më shumë nga emocionet e tyre dhe krijonin një lidhje më të mirë me terapistin. E njëjta gjë ndodh edhe me bisedat mes miqve, nëse ju i dëgjoni ata me kujdes dhe më pas i perifrazoni fjalët e tyre në formë pyetjeje, atëherë ata do të ndihen më rehat me ju. Kështu marrëdhënia juaj me ta do të jetë më e mirë, sepse edhe ata do t’ju dëgjojnë meqë ju treguat kujdes ndaj tyre.

Lëvizeni shpesh kokën gjatë kohës që flisni. Shkencëtarët kanë zbuluar se kur njerëzit e lëvizin kokën gjatë dëgjimit të diçkaje, ata janë më të prirë të jenë dakord. Është zbuluar gjithashtu se kur bashkëbiseduesi e lëviz kokën shpesh, edhe personi tjetër bën të njëjtën gjë. Kjo ndodh sepse njerëzit janë të njohur për sjelljet e tyre imituese, sidomos për ato çështje që atyre u duken të pranueshme. Prandaj nëse doni të jeni shumë bindës, lëvizni vazhdimisht kokën gjatë bisedës. Personi që keni përballë do ta ketë të vështirë të mos bëjë të njëjtin veprim dhe kështu do fillojë ngadalë të jetë dakord me ju, qoftë edhe pa e njohur mirë çështjen.