Në fundjavë, eklipsi “hibrid” diellor, i fundit për këtë vit 2013!

Ky është një lloj i rrallë eklipsi, edhe sepse jo të gjithë mund ta shohin plotësisht e as pjesërisht.

Më 3 nëntor do të ndodhë eklipsi diellor i fundit për këtë vit 2013. Ky fenomen do të "ndjekë" një rrugë nëpërmjet Oqeanit Atlantik dhe mbi Afrikë, ndërsa në Amerikën e Veriut do të mund të shihet vetëm nga vrojtuesit në Bregun Lindor. Kurse në Evropë do të jetë shumë i pjesshëm dhe do të mund të shikohet vetëm në pjesën jugore, mendohet rreth orës 14:00-15:00 të drekës.

Eklipsi i së dielës konsiderohet hibrid, sepse është një përzierje e dy tipeve të familjes së eklipseve. Do të nisë praktikisht si eklips unazor, me një "unazë zjarri" mahnitëse përreth diellit, përpara se të kalojë në një eklips total diellor, ku dielli është totalisht i bllokuar për një periudhë të shkurtër. Ky është një lloj i rrallë eklipsi, edhe sepse jo të gjithë mund ta shohin plotësisht e as pjesërisht. Pika më e pastër e vrojtimit të këtij fenomeni astronomik do të jetë në Kenia, aty ku edhe do të ketë një shumicë të konsiderueshme astronomësh dhe amatorëve të eklipseve. /ikub/