Anjeza Maja, ish-Misi në prapaskenën e Blendi Fevziut

Rastësia nuk mund të kalojë dy herë nga ty. Nëse fati ta sjell një herë, duhet t'i bësh llogaritë mirë që të mos rrëshqasë nga duart. Këtë ka bërë më së miri Anjeza Maja, prezantuesja e maratonës së këngës popullore në TV Klan.


Mis Tirana 2001, por edhe pjesëmarrëse dhe fituese e një sërë çmimesh në kompeticione të ndryshme të bukurisë në botë, tanimë i ka ngulur këmbët mirë në gazetari.


Ajo nuk ka dëshiruar asnjëherë pozicionin e kukullës, ku duhet të jesh vetëm e bukur. Tashmë është gazetare dhe asistente e emisionit "Opinion" të Blendi Favziu. Shkolla për të cilën është diplomuar, eshte drejtësi, por ajo ende nuk është ulur në karrigen e juristes, për të ushtruar profesionin.


Për momentin po shijon atë çka i ka falur televizioni por edhe turin nëpër Shqipëri, me projektin e fundit të maratonës. Në një intervistë për SH2-shin, Anjëza rrëfen emocionet e udhëtimeve në qytetet e Shqipërisë, punën në televizion dhe se sa e ka ndihmuar të qenit Mis në punën e saj.


Anjeza, drejtoni për të dytin vit radhazi maratonën e këngës popullore, si ndiheni në këtë pozicion?


Pa diskutim që ndihem shumë mirë, madje edhe më mirë se një vit më parë. Është një eksperiencë e këndshme e cila do dhe përkushtim, por brenda saj maratona ka dhe argëtim dhe të jep shume kënaqësi teksa shfaqesh në sheshet e qyteteve me të mëdha të Shqipërisë.


Çfarë mendon se kanë parë tek ju autorët që ju kanë përzgjedhur që të jeni një nga prezantueset?


Më mirë do ishte të pyeteshin vetë ata. Por sipas mendimit tim, kanë parë natyrshmërinë dhe sjelljen me kamerën, gjë të cilën kam disa vite që e bej. Mesa duket kanë mbetur të kënaqur nga një vit më parë dhe vendosën që të jem edhe këtë vit.


Sa u ka ndihmuar të qenit një femër e bukur në punë?


Në punën që unë bëj ndikon vetëm kur shfaqesh në ekran, që të jesh një figurë sa më e këndshme dhe televizive për publikun, tek të tjerat më ka ndihmuar puna dhe mendja ime.


A jeni dakord me atë se misset janë vetëm të bukura....?


Aspak nuk jam dakord, tani me kohët që kanë ardhur mund të bëhesh e bukur në çdo moshë, e thashë dhe më sipër, në rastin tim nuk ka ndikuar bukuria dhe jam e sigurt se edhe për shumë vajza të tjera mise kështu është. Unë si mis kam përfaqësuar Shqipërinë në shumë vende të botës dhe në shumë konkurse të rëndësishme si Mis Bota, Mis Toka, Mis Evropa.


Të shkosh në këto vende duhet të dish shumë, në radhë të parë për vendin tënd, për shumë vende të tjera pjesëmarrëse dhe e veçanta është se në këto konkurse nuk mungojnë edhe testet e inteligjencës.


Na trego diçka më shumë për veten, përveç maratonës, dimë që punoni në Tv Klan, cili është pozicioni juaj aty?


Unë punoj si redaktore përgjegjëse te emisioni "Opinion", jam në të njëjtën kohë dhe asistentja e gazetarit Blendi Fevziu për mëse 2 vjet.


Për çfarë i keni mbaruar studimet dhe do e ushtroni ndonjëherë profesionin tuaj?


Unë kam studiuar për Drejtësi, por deri tani nuk e kam ushtruar asnjëherë profesionin tim. Këtë vit po përgatitem për të bërë një master e më pas të shoh se çdo bëj. Për momentin ndihem e angazhuar mirë në Klan.


Ke fituar çmimin miss Tirana, ke marrë pjesë në Miss Albana por edhe në kompeticionet botërore të miss-it, ku keni fituar edhe çmime. Na tregoni si nisi rruga juaj drejt modës dhe miss-it?


Pjesëmarrja në mis nisi krejt papritur, kam shkuar vetëm të mësohem se si të jem shumë femër elegante, që di të ecë bukur dhe të kujdeset për paraqitjen e saj. Por nuk kam marrë pjesë në mis që gjithë jetën time të evidentohem si një vajzë thjesht e bukur.


Kush ju shtyu për herë të parë që të merrnit pjesë në evenimente të tilla?


Shoqëria kishte shume dëshirë, mora dhe mbështetjen e familjes dhe vendosa të marr pjesë.


Cilat janë emocionet e tua të para në këtë fushë?


Emocionet e para janë interesante, një vajzë në një moshë të re që ngjitet në skenë, në një konkurs fiton një çmim dhe papritur kthehet në një personazh publik ndryshe nga ç'ka qenë më parë.


Para se të ishit një miss, ju kanë thënë që ishit e bukur? Cili është komplimenti më i bukur që keni marrë pasi jeni bërë e famshme?


Si çdo femër kam marrë dhe unë komplimente, nuk doja t'i thoja se do duket sikur i bëj shumë qejfin vetes, më interesojnë më shumë vërejtjet se me ndihmojnë për të qenë sa më perfektë.


Po të ktheheshit pas në kohë, çfarë do kishit ndryshuar? Jeni penduar për ndonjë gjë në jetë?


Jo, nuk jam penduar për asgjë, unë mendohem dhe matem shumë në gjerat që bëj, kështu që nuk më rreshket asnjëherë situata nga duart.


Keni hequr dorë përfundimisht nga bota e modës apo...?


Jo nuk kam hequr dorë, nuk kam pasur kohë të merrem shumë me këtë botë.


Jeni gjithmonë në formë dhe e mirëkuruar në pamje, cili është stili juaj në të veshur?


Mundohem t'i përdor të gjitha stilet, klasike në shumicën e kohës, sportive, ndonjëherë ekstravagante. Por shpeshherë e "bëj kuvendin sipas vendit" d.m.th., vishem sipas ambientit ku ndodhem.


Ka Anjeza dikë pranë, një djalë (të dashur e kam fjalën)?


Kam pranë njerëz dhe miq shumë.
N.q.s një ditë do të vihej kusht: çfarë do zgjidhje, mes dashurisë dhe karrierës?
Të dyja bashkë, me pëlqen shumë familja dhe jam e përkushtuar, por edhe profesionin nuk kam dëshirë ta lë pas.


Edhe një pyetje standarde të fundit. Planet për të ardhmen, cilat janë?


Kam shumë plane, por nuk kam dëshirë të flas për to, më mirë kur t'i arrij dhe më pas të flasin vetë faktet.