Feja: Martesat Gay të papranueshme, kërcënohet familja

TIRANË- Martesat e homoseksualëve që ua serviri shqiptarëve Kryeministri i vendit, dënohen ashpër nga komuniteti fetar në vend. 24 orës pas deklaratës së Berishës, ka reaguar Kisha Katolike, Kisha Ortodoske dhe Xhamia.

Priftërinjtë dhe imamët argumetnojnë se martesat mes sekseve të njëjta kërcënojnë seriozisht martesën dhe nuk do të kenë kurrsesi bekimin e tyre madje iu bëjnë thirrje politikanëve që të mos bien në mëkat.

"Ne rast se sot lejohen martesat mes homoseksualeve, në të ardhmen do të kërkohet adoptimi i fëmijeve, gjë që do të çoje në shkaterrimin e familjeve. Sot duhet te luftojme kunder divorceve dhe jo te lejojme martesa te tilla", tha për median Monsinjor Gjergji Frendo.

Ndërsa imami i Xhamisë së Tabakëve, Elvic Naci, thotë se ky akt shihet si nje mekat i madh, ndaj parlamentaret nuk duhet te bëhen pjesë e kësaj nisme ligjore.


Për Kishën Ortodokse, veprimi dhe akti që kryhet mes dy njerëzve të së njëjtës gjini është i dënueshëm. "Për këtë arsye çdo lloj veprimi aq më tepër kur ato bëhen edhe ligjore nuk shikohet me sy të mirë dhe nuk mund të aprovohet nga ana jonë si besimtarë dhe si Kishë. Mendoj se është diçka e nxituar pas në Shqipëri ka probleme të mëdha sociale", u shpreh Peshkopi i Kishës Ortodokse Andon Merdani.


Me legjitimimin e martesave gay ne bëhemi vend i përparuar që nuk lejojmë diskriminim. Kjo sipas kreut të qeverisë, Sali Berisha. Ndërsa sipas, Mon Sinjor Frendos, shteti duhet të mbrojë konceptimin e martesës dhe familjes. Ai argumeton se "sot martesa dhe familja janë në rrezik për arsye se janë në rritje numri i divorceve, ndaj të mos e shtojmë rrezikun duke transformuar konceptin e martesës".


Lajmin se është hartuar një projektligj për martesat e personave të së njejtës gjini u dha dje nga kryeministri Sali Berisha gjatë një mbledhje ndërministrore për integrimin e vendit ne BE.
Ky ligj duhet të marrë mbështetje maksimale në Parlament - tha Berisha - pasi, zhduk diskriminimin.