Pasuria e Berishës, reagon PS: Do i shkurtojmë ditët pushtetit ilegjitim

TIRANË- Partia Socialiste e ka quajtur tallëse për gjithë shqiptarët shtirjen e kreut të qeverisë, Sali Berisha për gjendjen e tij pasurore, që shfaqet i varfër, ndërkohë që
superpasuritë i ka të regjistruara në emër të fëmijëve.
Gjatë një deklarate për shtyp, nga selia e PS-së, Taulant Balla ka theksuar se jo vetëm pasuritë janë shtuar në mënyrë marramendëse, por lëvizjet financiare nga llogaritë e majmura të familjarëve dhe të oborrit të tij e kalojnë disa fish buxhetin e ndihmës ekonomike për të gjitha familjet shqiptare të marra së bashku.
"Është e turpshme se si Sali Berisha vazhdon të shtiret si një varfanjak, vazhdon të shtiret që jeton në një apartament të vjetër të periudhës komuniste e që gjoja mbahet vetëm pagën e tij dhe të bashkëshortes, ndërkohë që gjithë qytetarët e Tiranës e dinë mirë ku banon kryeministri, në një apartament luksoz në një pallat luksoz. Me kë tallet Sali Berisha?"- ka thënë ai.
Sipas Ballës, për vitin e kaluar Berisha ka deklaruar si pasuri shtesë të tij vetëm pagën e tij dhe të së shoqes. Në deklaratën e depozituar pranë Inspektoratit të Lartë të Deklarimit dhe Kontrollit të Pasurisë Sali Berisha rezulton të jetë i vetmi që lëvizjet financiare i ka pasur kryesisht në qindarka.
"Ajo që i karakterizon të gjithë këta hajdutë, është fakti që superpasuritë janë të regjistruara në emër të fëmijëve dhe bashkëshorteve.
Kështu kryeministri ka për bir ndërmjetësuesin, apo siç thuhet në gjuhën e përditshme, sekserin më të pasur në Shqipëri. Ky ka deklaruar se shumat e mëdha që ka në llogaritë e tij i ka fituar falë ndërmjetësimeve. Në vitin 2008, duke punuar si sekser, ai thotë se ka fituar 82.882 euro"- tha ai, duke kujtuar se edhe bashkëshortja e zëvendës Kryeministrit është e vetmja grua që merr gjashtë rroga duke ndenjur në shtëpi.
Qeverinë, Balla e ka cilësuar një bandë që mundohet të mbajë pushtetin, me para dhe vota të vjedhura, e cila sipas tij, nuk e mori mandatin për të riqeverisur.
"PS së bashku me të gjithë qytetarët e ndershëm të këtij vendi do ia shkurtojnë me çdo mjet demokratik ditët këtij pushteti ilegjitim, që pasurohet në kurriz të varfërisë së shqiptarëve"- përfundoi Balla.

**************************
Milionat e politikës dhe drejtësisë në rritje

Kryeministri shqiptar, Sali Berisha, ai që të gjithë e njihnin si njeriun që jetonte në një apartament të vjetër të periudhës komuniste e që kishte mbi shpirt vetëm pagën e tij dhe të bashkëshortes, sërish gjatë gjithë vitit të kaluar ka deklaruar si pasuri shtesë të tij vetëm pagën e tij dhe të së shoqes. Në deklaratën e depozituar pranë Inspektoratit të Lartë të Deklarimit dhe Kontrollit të Pasurisë ai ka shpjeguar në mënyrë të detajuar se si ka lëvizur çdo qindarkë në llogaritë e tij bankare. E duhet thënë patjetër që lëvizjet kanë qenë kryesisht në qindarka.

Por nuk ndodh kështu me të birin, Shkëlzenin, e me të bijën, Argitën. Këta të fundit brenda një viti, të paktën zyrtarisht, e kur flitet për zyrtarisht të gjithë e dinë sa shumë mund të mësojmë për ta, deklarojnë lëvizje të mëdha në pasuritë e tyre.

Kryeministri, Sali Berisha


Në deklaratat e pasurisë për vitin që lamë pas, dorëzuar pranë Inspektoratit të Lartë të Deklarimit dhe Kontrollit të Pasurive, shënohen vetëm ndryshimet që ka pësuar pasuria e zyrtarëve gjatë vitit që kaloi, pa shënuar pasuritë e tyre të patundshme.

Kështu, për një vit, d.m.th., për vitin 2008, kryeministri, Sali Berisha, ka pasur si të ardhura vetëm rrogën e tij, saktësisht 2.149.592 lekë të reja dhe atë të bashkëshortes, e cila punon pranë qendrës shëndetësore nr. 4. Ajo ka marrë për një vit 576.947 lekë të reja. Ndërkohë, kryeministri ka marrë dhe një shpërblim, modest duhet thënë, prej punës në Kryeministri. Besohet se bëhet fjalë për fundvitin. Kryeministri i ka dhënë vetes vetëm 9 mijë lekë të reja.

Shtesa më e madhe që ka bërë Berisha në llogaritë e tij ka qenë ajo në llogarinë pranë Raiffeisen Bank, ku ka shtuar 122.796 lekë të reja. Ndërsa e shoqja ka shtuar më së shumti në llogarinë e saj në Bankën Credins, pronë e kushërirës së saj. Liri Berisha ka depozituar aty si shtesë në llogari 406.735 lekë të reja.

Ndërsa kryeministri ka dy llogari, në bankën Raiffeisen dhe në atë SanPaolo, këtë të fundit së bashku me Lirinë. Ai nuk mund të linte pa i bërë xhiro edhe Bankës Credins, me gjithë shumën modeste prej vetëm 5.824 lekësh të reja.

Shkëlzen Berisha


Sivjet në deklaratat e pasurive të zyrtarëve të shtetit janë shtuar dhe fëmijët e të afërmit që mund të ndikojnë në pasurinë e tyre. Por fëmijët e kryeministrit, Sali Berisha, kanë bërë dhe deklarime të mëparshme, kështu që kësaj here dhe ai ka deklaruar se ç'ka shtuar në pasurinë e tij brenda një viti.

Shkëlzen Berisha ka deklaruar se ka një llogari rrjedhëse në bankën Intesa SanPaolo, ku janë në gjendje aktuale 84.659 euro. Vetëm vitin që shkoi, Shkëlzeni ka shtuar në këtë llogari 82.882 euro. Më vonë ka tërhequr prej saj 7.750 euro.

Ai ka deklaruar gjithashtu se ka një llogari në bankën e familjes së tij, Credins, me gjendje 460.497 lekë, të cilat deklaron se i ka akumuluar, kur punonte si drejtor juridik pranë Eagle Mobile.

Shkëlzen Berisha deklaron se ka gjithashtu një tjetër llogari rrjedhëse me 6.000 euro në total, ku janë shtuar në vitin 2008 5.000 euro, e janë pakësuar 1.000 të tilla.

Djali i kryeministrit deklaron se ka një fitim neto nga puna e tij prej 6.930 eurosh.

Megjithatë, pavarësisht se ka një rrogë të tillë, djali i kryeministrit ka deklaruar se shumat e mëdha që ka në llogaritë e tij i ka fituar falë ndërmjetësimeve.

Në vitin 2008, duke punuar si sekser, ai thotë se ka fituar 82.882 euro. Ai deklaron se ka bërë ndërmjetësim në shitblerje. Gjithashtu, duke bërë të tilla ndërmjetësime, ai ka fituar edhe 6.930 euro, që i bie të jetë sa paga e tij si konsulent.

Djali i Berishës është akuzuar e për të janë botuar të dhëna të forta që e lidhin me ndërmjetësimin për kontratën e Gërdecit, por dhe me të tjera ndërmjetësime, kryesisht në shitblerje pasurish të patundshme. Berisha i vogël është një nga njerëzit më me influencë në agjencitë që janë marrë me kthimin e kompensimin e pronave.

Argita Malltezi


E bija e kryeministrit prej kohësh ka deklaruar një pasuri të madhe, të cilën pretendon se e ka bërë gjatë periudhës kur punonte për ndërkombëtarët në Kosovë. Është e dukshme se edhe gjatë vitit që shkoi, ajo të ketë vjelë fryte nga pasuria që ka ngritur dhe që pjell pará.

Argita Malltezi përfiton kështu nga puna që bën si avokate 5.264.363 lekë të reja në vit, nga puna që bën pranë Fakultetit të Drejtësisë merr 821.500 lekë të reja, ndërsa nga puna tjetër, po si pedagoge, po kësaj radhe në Prishtinë, ajo merr 3 mijë euro në muaj për gjashtë muaj pune, d.m.th., 1800 euro.

Puna që ka bërë pranë Organizatës së Kombeve të Bashkuara, vazhdon të gjenerojë para për të. Vitin që shkoi ajo ka marrë 9.069 euro. Nga dhënia e dy apartamenteve me qira, ajo përfiton për të dy nga 900 euro e 1170 euro në muaj.

Por, ajo që bie në sy është se gjatë vitit që shkoi, Argita ka shlyer një shumë të jashtëzakonshme që e kishte si detyrim kredie ndaj bankës Emporiki. Brenda një viti ajo ka shlyer 138.019 euro, duke mos pasur më detyrime ndaj kësaj banke.

Lulzim Basha


Ministri i pasur i qeverisë Berisha, ashtu si udhëheqësi i tij, vitin që shkoi ka fituar vetëm pará nga rroga e tij. Në deklaratën e tij të pasurisë ai shkruan se ka fituar nga paga e tij si ministër i Jashtëm 1.590.924 lekë të reja. Nga shpërblimi i fundvitit ka marrë më shumë se shefi i tij, 21.000 lekë.

Basha ka deklaruar dhe pagën e bashkëshortes së tij. Kjo e fundit ka marrë për vitin që shkoi 29.753 euro, falë punës part time si drejtoreshë Programesh në Fondacionin EWPP në Amsterdam, Holandë.

Bashkëshortja e tij, Aurela Basha, ka deklaruar se ka shitur një apartament në Golem, Durrës për shumën e 45 mijë eurove, dhe ka paguar një pjesë të lekëve për një tjetër apartament në zonë turistike. Ajo ka paguar 40 mijë euro për një apartament në Qerret të Kavajës.

Genc Ruli


Ministri i Ekonomisë, Genc Ruli, jeton më së shumti duke vjelë interesat e depozitave të tij në disa banka. Gjatë vitit që shkoi, ai ka përfituar 3.075 dollarë interesa nga depozita pranë Raiffeisen Bank, 6.085 dollarë interesa nga depozita pranë Intesa SanPaolo, 200 euro interesa nga një tjetër depozitë pranë Intesa SanPaolo, 369.558 lekë të reja interesa nga bonot e thesarit të Bankës së Shqipërisë, 581.881 lekë të reja nga interesa të llogaritura në bono thesari pranë Alpha Bank dhe Bankës së Shqipërisë, 1.801 euro interesa nga depozita pranë Alpha Bank dhe 1.232 dollarë interesa nga depozita "Futura" e vajzës pranë Intesa SanPaolo.

Investimi në Fondet e Investimit pranë Raiffeisen Bank nuk i ka dhënë asnjë fryt Rulit për vitin që shkoi, ndërsa ka deklaruar se ka pakësuar 40.000 dollarë nga pasuria e tij për banesën. Përveç kësaj, Ruli merr disa pagesa nga pjesëmarrja në borde.

Vitin që shkoi Ruli ka marrë dhe një kredi të madhe për shtëpi pranë Bankës Kombëtare Tregtare. Për 15 vjet Ruli do të paguajë këste mujore prej 1.064 eurosh për këtë shtëpi. 150.000 euro ka marrë për shtëpinë Ruli, ndërsa vjet ka arritur të shlyejë një kredi të marrë për makinën "Toyota" të gruas së tij.

**********


Qeveria vijon të mbetet në dietë, por ministrat jo. Nga "të pastrehë", "borxhlinj" e "të varfër" që rezultonin në '05-ën kur erdhën në pushtet, në fund të mandatit 4-vjeçar ata janë shndërruar në "kapitalistë" të mëdhenj. Respektivisht, familja e ministrit në detyrë të Mjedisit, Lufter Xhuvelit figuron më e kamura, por me një baba "të varfër". Xhuveli deklaron se burimi i tij i vetëm i të ardhurave është paga e tij dhe pensioni i bashkëshortes. Ndërkohë tre fëmijët e tij, dy vajzat dhe djali rezultojnë pronarë të mëdhenj tokash e apartamentesh banimi si edhe me shuma të konsiderueshme eurosh, lekësh e dollarësh të depozituara në llogari bankare. Nga ana tjetër, ministri i Mbrojtjes, Gazmend Oketa përveç pagës vijon të përfitojë të ardhura nga dividenti i studios private "GA +2 Projekt", ndërkohë që ministrja e Shëndetësisë, Anila Godo vijon me ritme të shpejta të depozitojë shuma në disa dhjetëra mijëra euro në mbi 3 llogari bankare të hapura në emrin e saj. Gjithashtu edhe familja e ministrit të Bujqësisë, Jemin Gjana, figuron pronare e një numri të madh pronash të patundshme, në një kohë që Gjana deklaron se burimi i tij i vetëm i të ardhurave është paga si anëtar qeverie. Ish-Ministri i Mbrojtjes, Fatmir Mediu, gjithashtu deklaron se burim kryesor të ardhurash ka pasur pagën e tij si deputet, por duke vijuar të lërë enigmë mënyrën se si do të shlyejë kredinë prej 300 mijë eurosh që ka marrë nga BKT tani që ai është "i papunë". Ndërkohë një tjetër ish-ministër, Ylli Pango, i shkarkuar pas skandalit seksual, pretendon që burim kryesor të të ardhurave ka shitjet e librave bashkë me pagën që ka pasur si deputet.

Nderkaq Kreu i Gjykatës Kushtetuese, Vladimir Kristo renditet i pari në "top-listën" e zyrtarëve më të pasur të sistemit të drejtësisë. Kjo rezulton nga deklarata e pasurisë që ka depozituar pranë Inspektoriatit të Lartë të Deklarimit të Pasurisë për vitin 2008. Të ardhurat e tij vjetore që burojnë nga paga kapin vlerën prej 2.620.794 lekësh. Ndërkohë që nga mësimdhënia si pedagog i jashtëm në universitetin privat "Luarasi", ai ka përfituar shumën prej 200 mijë lekësh. Një burim i konsiderueshëm të ardhurash për kreun e Gjykatës Kushtetuese janë edhe qiratë e dy apartamenteve 1+1 në Tiranë dhe Durrës, të cilat i sigurojnë një fitim vjetor prej 900 mijë lekësh.
Kurse sa i përket pagës së bashkëshortes, që punon si notere, vlera e përfituar për familjen Kristo nga ky aktivitet rezulton në shumën e 1.400.000 lekëve. kryeprokurorja Ina Rama ka deklaruar kursime nga të ardhurat prej pagave familjare, 2.100.000 lekë. Në deklarimin e saj për vitin 2008, të ardhurat nga paga, shpërblimet dhe dietat shkojnë 2.262.587 lekë. Paga e marrë nga Shkolla e Magjistraturës është 105.750 lekë, ndërsa paga e bashkëshortit është 1.264.784 lekë. Prokurorja e Përgjithshme ka paguar shumën prej 2879.24 USD si detyrim për shlyerje kredie, teksa i mbeten edhe 18.853 USD të tjera për t'u shlyer. Rama ka shlyer si detyrim qiraje të banesës shumën prej 60.000 lekësh dhe i mbeten për të shlyer 180.000 lekë.