Vllaznia, ikën Hasan Lika vjen Roland Luçi!

Shkodranët nuk presn të djelën por mbyllin që të martën bashkëpunimin me trainerin kryeqytetas


Nuk u desh ndeshja me Vlorën deri të djelën pasi Lika me Vllazninë ka mbyllur të gjithë bashkëpunimin e nisur që para disa muajsh, para fazës përgatitore të Vllaznisë për Kupat e Europës, ku kaloi një tur, ndaj Sligo Roversit, ndërkohë që në turin tjetër të "Europa League" pësoi dy humbje, 5-0 në Vjenë, me Rapidin, ndërsa në Shkodër u mund 3-0.

Presidenti Valter Fushaj ka vendosur t'i jape fund bashkepunimit me trajnerin tiranas pas polemikave te javeve te fundit per shkak te formes se dobet te treguar nga kuqeblute.

Lajmin e shkarkimit te Likes e ka konfirmuar vete presidenti Fushaj. Humbja e fundit në Durrës nuk është kapërdirë mirë nga presidenca shkodrane, e cila, e vënë edhe nën presion të madh nga tifozët kuqeblu, ka parë të udhës që të bëjë lëvizjen e parë, duke larguar trajnerin Lika.

Nisja shumë e keqe e kampionatit nga skuadra shkodrane, vetëm 4 pikë në pesë javë kampionat, vetëm një gol i shënuar në po kaq javë, përbëjnë bilancin më negativ të kuqebluve. Presidenti i Vllaznisë, Valter Fushaj, e ka konfirmuar këtë lëvizje, ashtu sikurse e ka justifikuar largimin e Likës me rezultatet e dobëta në pesë javë kampionat.

Gjithashtu, burimet pranë klubit shkodran bëjnë të ditur se është menduar dhe gati për t'u vendosur edhe zëvendësuesi i Likës te Vllaznia. Kësaj here drejtuesit kuqeblu do të besojnë tek futbollisti i viteve 80-të, që është shpallur edhe kampion me Vllazninë në edicionin 1982-1983. Ky është Roland Luçi, i cili jeton prej vitesh në Austri dhe ka kryer të gjitha specializimet dhe kualifikimet e nevojshme në fushën e trajningut.

Bisedimet paraprake me Luçin janë zhvilluar dhe parimisht është gjetur akordi, ndërkohë që pritet që kandidati kryesor për stolin kuqeblu të vijë në Shkodër dhe të zyrtarizojë gjithçka, për të nisur edhe nga puna. Në lidhje me këtë situatë te Vllaznia, traineri Lika do të deklaronte: "Kur skuadra funksionon dhe merr rezultatet e dëshiruara, trajneri gjithmonë qëndron disi në hije, meritat e tij harrohen.

Por, sa herë që gjërat nuk ecin ashtu si të gjithë dëshirojnë, trajnerët dhe ndihmësit e tyre bëhen shkaktarët kryesorë. Gjithsesi, dua të them se unë nuk jam e keqja e Vllaznisë. Natyrisht që kam pjesën time të përgjegjësisë, por situata duhet analizuar në tërësi dhe përgjegjësitë duhen ndarë.

Së bashku me stafin teknik kemi punuar me përgjegjësi e profesionalizëm, duke dhënë gjithçka për skuadrën".Java e gjashtë e kampionatit e vë Vllazninë përballë një tjetër skuadre zhgënjyese deri më tani, që e ka ndryshuar trajnerin e saj para 1 jave, Flamurtari i Vlorës, në fushën e këtij të fundit. Ikja e Likës ishte e katërta në këtë start kampionati.

Pas dorëheqjes së Maganit dhe mbërritjes së Miles te Shkumbini, dorëheqjes së Memushit dhe mbërritjes së Maganit te Flamurtari, shkarkimit të Qirjakos dhe mbërritjes së Canajt te Gramozi, vjen edhe largimi i Likës dhe mbërritja, ende e pazyrtarizuar, e Luçit te Vllaznia.Shekulli