Olti Xhezo: Jam në kërkim të vajzës së duhur!

Ai do të mbahet mend gjithmonë. Ka qenë i pari mashkull që ka marrë kurorën e djalit më të bukur në Shqipëri në vitin 2000. Sot pas 9 vitesh nga ai moment Olti Xhezo është një avokat në kërkim të karrierës. Sapo është kthyer nga Londra, ku edhe ka mbarur masterin njëvjeçar për "Ligj Ndërkombëtar Tregtar". Largimi në Mbretërinë e Bashkuar, përveç se një mundësi shkollimi, ka qenë edhe një "arratisje" nga vëmendja dhe syri i njerëzve. Pas një eksperience pune në Ministrinë e Drejtësisë, si Drejtor i Marrëdhënieve me Jashtë, tani Olti është në kërkim të një provoje tjetër në fushën e drejtësisë.

Por, duke qenë një mashkull i pashëm, për të nuk kanë munguar as ofertat televizive, duke qenë disa herë drejtues i një sërë spektaklesh, por në këto momente, televizioni është zhvendosur në plan të dytë, pasi Xhezo ka dëshirë t'i kushtojë pak më shumë vëmendje të ardhmes së tij si jurist. Ndërsa, për sa i përket marrëdhënies me vajzat, ai tregon se është shumë pasionant dhe i përkushtuar kur behët fjalë për një lidhje. Duke vazhduar më tej ai rrëfen se është në kërkim të një vajze që ta durojë me të mirat dhe të këqijat e tij, deri më sot, nuk ka një të tillë. Në një intervistë për SH2-shin, ish-misteri na tregon gjithçka për jetën e tij të momentit.



Sa po jeni kthyer nga Londra pas një masteri, na shpjegoni për çfarë ishte ky specializim dhe çfarë mësuat ju, nga shkolla atje, por edhe nga jeta sociale?
E vërtetë, s'ka dy muaj që jam kthyer nga Londra (mua më pëlqen ta quaj kryeqytetin e Evropës edhe pse jam i ndërgjegjshëm që po tregohem subjektivist) dhe përfundova studimet pas-universitare të nivelit master LLM për Ligj Ndërkombëtar Tregtar. Subjektet e trajtuara lidhen me të Drejtën e Konkurrencës, Legjislacion Bankar dhe Lëvizjen e Lirë në Komunitetin Evropian. Ta mbyll me kaq, që mos të na mërzitet lexuesi pa filluar akoma  në aspektin social, mendoj se influenca ka qenë po aq e rëndësishme dhe e paharrueshme, pasi të tilla qytete që ofrojnë hapësira pafund për edukim, argëtim, kulturë dhe ekspansion mentaliteti, lënë gjurmë të thella jo vetëm në kujtesë, por edhe në perceptimin e së ardhmes dhe këndvështrimit mbi të.


Deri para se të shkonit në Londër ishit pjesë e stafit të Ministrisë së Drejtësisë si Jurist, po tani pas kthimit, jeni më atje, apo po mendoni për diçka tjetër?
Deri para largimit kam qenë pjesë e stafit drejtues së Ministrisë së Drejtësisë dhe kam mbajtur pozicionin e Drejtorit të Marrëdhënieve me Jashtë dhe Publikun, duke asistuar Ministrin dhe institucionin në marrëdhëniet me publikun e gjerë dhe institucionet e huaja homologe apo që operonin në fushën e drejtësisë. Ka qenë një eksperiencë e bukur, por që mendoj se ka ardhur koha për të hedhur një tjetër hap, ndaj ky institucion nuk është më në fokusin tim profesional.


Gjatë kohës së qëndrimit në vendin ku realizuat masterin, menduat për ndonjë moment: "Nuk po kthehem më në Shqipëri, më mirë një punë këtu dhe je ok!?"

Fatkeqësisht e kam menduar disa herë të vlerësoj mundësitë për të zgjatur qëndrimin tim në Mbretërinë e Bashkuar, kryesisht për qëllime studimi të avancuar dhe një doktoraturë të mundshme. Them fatkeqësisht, sepse gjithmonë e kam projektuar të ardhmen time në Shqipëri dhe u çudita dhe me veten kur fillova të bluaj të tilla mendime. Por, me sa duket, ëndrra Shqiptare ka filluar të na shkërmoqet para syve, dhe jo vetëm mua, por dhe plot idealistëve të tjerë.

Drejtësia është një fushë e gjerë dhe ka disa hallka në të cilat mund të specializohesh dhe të punosh, ju cilat specifika juridike ju pëlqejnë më shumë? E shikoni veten, prokuror apo gjyqtar në të ardhmen?

Ke të drejtë, madje drejtësia sot e më tepër po gjen përdorim në çdo fushë të jetës, duke u lidhur pashmangshmërisht me specifikat e secilës prej tyre. Në këtë aspekt, Londra duke qenë kryeqendër financiare e Evropës dhe një demokraci e vjetër me institucione solide, mbetet një indikator i mirë për të bërë zgjedhjen e duhur, pasi ajo lexon dhe përpunon më shpejt informacionin mbi trendin e zhvillimit dhe detyrimisht të jep mundësinë të nuhatësh kush është nevoja e momentit. Personalisht, nuk e kam parë veten kurrë në petkun e atyre që japin drejtësi, qofshin këta gjyqtarë apo prokurorë. Natyra ime gjithmonë ka anuar drejt konsulencës, studimit të anës rregullatore dhe avokatisë së opinioneve ligjore. Në këtë kontekst, e gjej veten më mirë në institucione shtetërore ose private, ku të mund të kontribuoj me ekspertizën time mbi kuadrin ligjor, në rastin konkret në legjislacionin tregtar.

Deri tani duket se dy kanë qenë pikat e tua të forta, pamja e jashtme, për të cilin dhe jeni vlerësuar si misteri i parë shqiptar, por edhe puna juaj, pasi keni punuar në një institucion të rëndësishëm. Keni diçka tjetër, një pasion apo hobi që e praktikoni shpesh dhe është shumë e rëndësishme?

Paraqitja e jashtme është një aset ekstra që në një mënyrë apo në një tjetër gjithkund vlerësohet, por që kurrsesi nuk prevalon përgatitjen profesionale. Në ditët e sotme avokatia ka nevojë jo vetëm për aftësi profesionale, por edhe për elokuencë, diplomaci, forcë bindëse, paraqitje estetike e një mori vlerash. Ndaj dhe paraqitja e jashtme ka ardhur koha të marrë vendin që meriton. Sportet mbeten një pasion imi i përjetshëm.



Me kaq formim dhe njohuri sa kini, mund të na thoni, a ka ligje të mira Shqipëria dhe në qoftë se ka diçka për t'u ndryshuar, cila është ajo?
Unë mbetem një jurist i ri dhe pasionant, por ligji dhe njohja e tij nuk kanë fund. Sidoqoftë, nëse do të përmblidhja mendimin tim në pak fjalë do të thosha që Shqipëria nuk vuan nga mungesa e ligjeve, por nga mungesa e shtetit ligjor. Ne kemi ligje të reja që i referohen legjislacioneve me përvojë shumëvjeçare, por vuajmë mungesën e kulturës ligjore dhe forcës implementuese. Pa i hyrë diskutimit që ligjet në Shqipëri kanë një tendencë kohët e fundit të shndërrohen në mjete elektorale dhe afatshkurtër, gjë që përgjithësisht vjen kundër thelbit dhe qëllimit që mbart një mjet ligjor në vetvete.

Dashje pa dashje në Shqipëri jeni një njeri i njohur, gjatë kohës që qëndruat në Londër, e konsideruat këtë si një "arratisje"; më në fund nuk më njeh njeri, apo edhe aty... na tregoni ndonjë ndodhi?

Shqipëria është një vend i vogël dhe i etur për thashetheme të vogla, çka të lë të kuptosh që dhe njerëzit në shumicën e rasteve janë mendjevegjël. Në këtë pikëvështrim, kam qenë i lumtur në Londër që gjithsecili respektonte lirinë dhe privatësinë e njëri-tjetrit dhe gjithsecili i promovonte këto vlera në një mënyrë apo një tjetër.

Londra ishte edhe një shkëputje nga televizioni, tani që jeni këtu do të riktheheni?

Londra ishte një shkëputje nga gjithçka në fakt. Televizioni? Nuk e di të them të drejtën, më duhet të marr disa vendime të rëndësishme për të ardhmen time dhe fatkeqësisht televizioni nuk qëndron në faqet e para të axhendës.

Nëse do të duhet të zgjidhje midis punës së Juristit dhe televizionit, cila do të ishte më e preferuara?

Absolutisht profesionin e juristit dhe për këtë nuk kam më asnjë pikë dyshimi, madje dhe ditët e fundit kam bërë zgjedhje që kanë konfirmuar këtë bindje timen që sa vjen e forcohet.

Jeni shprehur dikur që koha nuk më lë të kem të dashur dhe t'i kushtohem asaj, tani që ndoshta jeni në i lirë, është një vajzë pranë jush, nëse mund të na zbuloni diçka rreth saj?

Koha nuk është asnjëherë e mjaftueshme, çështja është se çfarë vendosim prioritet në jetën tonë të përditshme, ky është mendimi im. Vajzë pranë meje? Ende nuk kam gjetur një të tillë që dhunshëm apo natyrshëm (quajeni si të doni) të okupojë ditën time e të ridimensionojë radhën e prioriteteve . Nejse, është ende shpejt për të folur, por besoj që do të dalë një femër që do të më durojë me gjithë të mirat e të këqijat që kam

Duket si i keni plotësuar gjërat më elementare në jetë, ka Olti ndonjë plan për fejesë apo martesë dhe si e mendon atë?

Plan për martesë pa diskutim që kam. Familja mbetet një koncept i shenjtë që unë mezi pres ta ndaj me një person të cilit mund t'i besoj gjithçka. Patjetër që do të ndodhë, sapo të vijë personi dhe momenti i duhur.

Cila është ajo gjë që të bie menjëherë në sy te një femër?

Boooh, shumë gjëra, mos më pyet më mirë. Sa më shumë kalon koha aq më sqimatarë bëhemi, do të ngelim pa martuar kështu si e kemi nisur më duket.

Po te ty, cila është ajo gjë që femrat pëlqejnë më shumë?


Ato thonë sytë, unë them shikimi. Ato thonë trupi, unë them qëndrimi. Ato thonë manierat, unë them kultura, e kështu me radhë. Vendos ti si të duash .

Jeni tip i qëndrueshëm në një marrëdhënia apo...?

Jam natyrë e vështirë, por pasionante. Nëse ka një marrëdhënie jam i qëndrueshëm.

Bëni shumë dhurata, nëse po, cila është ajo e fundit që keni bërë?

U bëj dhurata personave për të cilët ndjej vërtet, qofshin familjarë apo miq. Dhuratat e fundit që kam bërë dhe që më vijnë në mendje kanë qenë për familjen time kur jam kthyer nga Londra.

Po më e shtrenjta?

Dhurata më e shtrenjtë? Përkushtimi.

E konsideron vetën "sex simbol" shqiptar?

Do të më pëlqente, por e di që nuk jam i tillë. Besoj jam një personazh që në kompleksitetin e tij është tërheqës.

Si e keni përjetuar të qenit djali më i bukur në Shqipëri dhe që për më tepër ishe i pari që mbaje këtë status?

Ka qenë një eksperiencë e bukur nga ato që rrallë të ndodhin në jetë, duke gjykuar nga dimensionet që marrin në një vend të vogël siç është Shqipëria. Një zgjedhje e bërë, me gjithë të mirat e të këqijat e veta. Por, nuk rri ta mendoj gjatë, koha nuk kthehet mbrapsht.

Ku do ta shohim Oltin tani, cilat janë planet e tua?

Oltin si gjithmonë do të vazhdoni ta shihni zyrave të institucioneve mes letrave e debateve legaleve, në auditorët e universitetit, herë si lektor e herë si dëgjues, në fushat e sportit dhe rrugëve të Tiranës, bashkë me të gjithë miqtë e tij të përhershëm. Pas ekranit, nuk i dihet, por dhëntë Zoti jo nëpër rubrikat e thashethemeve