Meta: LSI do të qëndrojë larg tensioneve false

Kryetari i Lëvizjes Socialiste për Integrim, Ilir Meta, së bashku me
nënkryetarin e Kuvendit dhe deputetin e LSI-së në qarkun e Beratit,
Nasip Naço, zhvilluan dje disa takime me strukturat e LSI-së në Berat,
Poliçan, Skrapar. Gjatë zhvillimit të këtyre takimeve, anëtarët dhe
simpatizantët e LSI-së kanë vlerësuar pjesëmarrjen dhe angazhimin e
LSI-së në Qeverinë e Integrimit.
Në fjalën e tij kryetari i
LSI-së, Meta, është ndalur gjerësisht në procesin e integrimit të
Shqipërisë dhe reformat integruese që përbëjnë angazhimin kryesor të
kësaj qeverie. Kreu i LSI-së u shpreh se koalicioni midis Partisë
Demokratike dhe Lëvizjes Socialiste për Integrim është garancia e
qytetarëve për realizimin e këtyre reforma. Meta ka garantuar anëtarët
dhe simpatizantët e LSI-së se kjo forcë politike do të qëndrojë larg
tensioneve false. Veprimi politik i LSI-së, deklaroi Meta, do të ketë
si orientim vetëm integrimin e Shqipërisë dhe shqiptarëve.
Kreu i
LSI-së i bëri thirrje PS-së të vlerësojë momentin historik për
Shqipërinë, siç është plotësimi i pyetësorit të KE-së. “Dorëzimi i
Pyetësorit nga Komisioni Evropian përbën një moment historik për
vendin, moment që kërkon kontributin dhe energjitë e gjithë aktorëve të
politikës, si dhe përfshirjen e faktorëve të tjerë, të shoqërisë
civile, ekspertëve e më gjerë”, tha Meta.
Në përfundim të këtyre
takimeve, duke bërë thirrje për një etikë të re politike në vend, Meta
u shpreh se “në Evropë nuk shkohet me mllefe personale”.