Elvana Gjata: Kush është pranë meje!

Intervista/ e veçantë, pikante, e thjeshtë, fine. Është Elvana Gjata. Dashuria e këngëtares, jeta mes muzikës dhe regjisurës dhe pasioni për gatimin. Koncerte, fama, para.

Të kesh fatin e Elvanës!

Ajo vjen përherë ndryshe dhe ç'është më e rëndësishmja ka qëlluar gjithmonë në shenjë. Elvana Gjatë është konsideruar shpesh si "pop-diva" e muzikës shqiptare. Ishte vetëm 16 vjeç kur doli për herë të parë në skenë, por, atëherë, ndoshta nuk e kishte menduar që muzika në jetën e saj do të merrte dimensionet që do t'i kalonin kufijtë e vendit.

Zëri dhe pamja e saj ishin në harmoni, duke u bërë kështu një ndër më të preferuarat të publikut shqiptarë. Pasi kaloi vetëm pak kohë fama e saj u shtri edhe në Kosovë, duke vijuar edhe atje më një sur bashkëpunimesh më emra të njohur të muzikës kosovare.

Ndërsa tani... Elvana është vazhdimisht e ngarkuar me projekte koncerte, studime, aq sa dëshira e saj më e madhe është; pak pushime. Recetat, me të cilat ajo i është servirur publikut kanë qenë pikante gjë që e ka bërë që të jetë e kërkuar në të gjithë Evropën ku ka shqiptarë dhe jo vetëm.

Por, duket se ky do të jetë viti i Elvanës. Vajza diplomohet! Në muzikë? Jo, në regjisurë, profesion të cilin pretendon e shikon vetën të realizuar ashtu si edhe në muzikë. Por, në një intervistë për SH2-shin, Gjata na ka treguar se nuk është vetëm një "vip" që di të këndojë, por edhe një "vajzë për shtëpi" që di të gatuaj.

Ndërsa, për sa i përket aspektit personal, në këtë rrëfim Elvana na tregon se në këto kohë i gjendet dikush pranë dhe që mashkulli i saj ideal duhet të jetë i suksesshëm në atë që bën.

Elvana, me çfarë melodie u zgjuat sot në mëngjes?

Me alarmin e telefononit...

Për çfarë ke menduar më shumë ditët e fundit?

Më mungojnë shumë miqtë e mi, familja...


Cila është ajo gjë pa të cilën nuk e shtyn dot ditën?


Pa muzikë dita nuk ka kuptim, dhe pa romanin që po lexoj nga Harold Robins.


Si po shkojnë turnet nëpër botë, na trego pak?


Shumë, shumë mirë. Aktualisht isha në Gjermani në turneun tim të radhës në Evropë, por jo vetëm. Më pas udhëtova për në Amerikë, ku atje kisha 4 koncerte, New York, Chikago, Didroit, etj.


Cilat janë vendet që ke shkuar deri më tani dhe si ju kanë pritur shqiptarët andej?

Pothuajse në çdo vend të Evropës. Kam kaluar shumë mirë në çdo koncert që kam bërë. Por, do veçoja një koncert në Suedi, ku pjesëmarrja dhe pritja ka qenë e jashtëzakonshme...


Çfarë ndryshmi ka të këndosh për shqiptarët në Shqipëri dhe të këndosh për shqiptarët në botë?


Është emocion pak më i madh të këndosh për shqiptarët në botë, sepse kanë shumë mall dhe ne artistët me muzikën tonë i bëjmë të ndjehen më afër Shqipërisë.


Ke një aktivitet të ngjeshur muzikor, çfarë të bën të jesh kaq energjike?

E dua këtë që bëj, me frymëzon, më emocionon, më mbush me energji dhe si pasojë jap atë që marr.

Përveç muzikës, ju vazhdoni studimet për regjisurë, pse keni zgjedhur këtë degë?

Teatrin e kam dashur gjithmonë. Këtë vit diplomohem dhe jap shfaqjen në fillim të shkurtit. Është një monodramë nga Angelo Longoni, pjesa quhet "Hot line".

Dhe interpreton Valbona Imami. Jam shumë entuziaste për këtë projekt, pasi është bërë një punë e madhe së bashku me bashkë regjisoren Jonida Vokshi.

Në të ardhmen më shumë e shihni veten si regjisore apo këngëtare?

E shikoj veten të realizuar në të dyja fushat...

Këngëtarët janë kategoritë më të paguara të momentit, ju jeni e kënaqur më të ardhurat tuaja?

Absolutisht po. Sa për mua më bëjnë shumë mirë që puna më është vlerësuar dhe momentalisht shumë mirë.

E ndjeni veten të pasur në këtë moshë që jeni?

Për moshatarët e mi kam një status ekonomik të kënaqshëm.

Nga kënga magjike dolët me një çmim, je e kënaqur për këtë?

Jam shumë e vlerësuar, sepse çmimin e dytë ma dhanë vetë artistët dhe për këtë i falënderoj.

Për çmimin e internetit ishte vlerësimi i dytë nga publiku dhe në sallë pritja ishte shumë e ngrohtë. Mendoj që bashkë me Florin me punën tonë kemi goditur sërish në shenjë.

Ndihesh e përkëdhelur e fatit Elvana, apo keni punuar për të ardhur deri këtu ku jeni?

Është fakt që është bërë një punë e madhe që në fillim, por ndihem e përkrahur nga Zoti. I falem Atij për çdo hap në jetën time.

Përveçse jeni këngëtare, jeni një njeri që bëni jetë normale, është Elvana gocë për shtëpi?

Jam një amvisë e shkëlqyer, falë mamasë sime. Shumicën e kohës së lirë e kaloj në shtëpi, i vetmi vend që më fal qetësi.

Ju jetoni vetëm apo me prindërit?

Po jetoj me prindërit.

Pse keni zgjedhur këtë mënyrë jetese?

Sepse edhe pse e kam mundësinë të jetoj vetëm, nuk dua të shkëputem nga familja ime, që është e shenjtë për mua.

Cila është pjata e preferuar?

E kam hobi gatimin dhe jam ngrënëse e madhe dhe si pasojë kam shumë pjata të preferuara.

Çfarë i kërkove babagjyshit të vitit të ri si dhuratë për fund vit?

Pak pushim, mbase...

Ku të gjeti nata e ndërrimit të viteve?

Në Zvicër, duke kënduar, por me familjen afër.

Çfarë bën për të dal nga rutina e përditshme?

Asnjë ditë për mua nuk është njësoj.

Je krahasuar gjithmonë për nga pamja me Xhenifer Lopez, e keni vënë edhe ju re që i ngjani asaj?

Në fakt unë nuk mendoj se i ngjaj, mbase looku im jep përshtypjen e një artisteje të huaj.

Kush kujdeset për pamjen tuaj të jashtme?

Kujdesem vetë. Kam 2 vjet që për evente më speciale artistike ia besoj veshjen stilistes Jona Muça. Ka shumë sharm, dhe finese në veshjet e saj.

Edhe pse ju nuk keni dashur të flisni për jetën private herë pas here thashethemet kanë dalë, sa të vërteta janë ato që fliten për ju?

Për sa kohë që janë thashetheme, kanë mbetur të tilla.

Keni ju një person më të cilin ndani mbrëmjet, momentet e veçanta, një të dashur?

Është dikush pranë meje.

Çfarë duhet të ketë një mashkull që të jetë përkrah jush?

Duhet të jetë i suksesshëm në atë që bën, dhe të meritoj respekt jo vetëm për atë që bën por dhe për njërin që është.

Aktiviteti juaj është shumë i gjerë edhe në Kosovë, çfarë të pëlqen në këtë vend?

Mikpritja dhe rinia e gjallërueshme.

Sipas jush, cili është ndryshimi midis rinisë kosovare dhe asaj shqiptare?

Pak a shumë kemi të njëjtin mentalitet pa ndonjë ndryshim të madh.

Po ndryshimi i muzikës në këto dy vende, cili është?

Kanë prekur zhanre të ndryshme muzikore para nesh, por me kalimin e kohës kjo gjë nuk vihet më re, sepse ne kemi mundur të ecim shumë përpara.

Ke miq dhe mikesha në Kosovë?

Po kam.

Çfarë dëshiron të të sjellë 2010-ta?

Akoma më shumë sukses se 2009-ta.