Blerina Kllokoqi –Rugova: Jeta ime në “oborrin” presidencial!

Një ditë me Blerina Kllokoqi-Rugovën

Si nisë një ditë e zakonshme e juaja, a nisë ajo me shtypin ditor dhe në cilën faqe ndaloni?

Kllokoqi-Rugova: Po, çdo ditë unë e nisë ditën time me gazetat, i përcjellë shumë. Sigurisht, së pari shikoj çfarë ka në ballinën e tyre, dhe mandej ndalem në temat që më duken më interesante apo që më interesojnë.

Si e organizoni një ditë pune në atelienë tuaj?

Kllokoqi-Rugova: Agjenda ime është shumë e ngjeshur duke marrë parasysh angazhimin tim të shumëfishtë dhe po të zgjaste dita më tepër se 24 orë do të ishte në favor timin. Ditën e filloj me pirjen e kafes se mëngjesit së bashku me Mendimin dhe anëtarët e tjerë të familjes. Pastaj me rutinën ditore me ushqim, pastrim dhe kujdesin ndaj Evës, vajzës sime. Vazhdoj në atelie ku më presin ide dhe kreacione të reja për realizimin e dizajneve të ndryshme. Fillimisht merrem me vizatime, ku imagjinatën dhe vizionin e paraqes në letër në mënyrë që ta kenë më të qartë bashkëpunëtoret e mia qëllimin tim. Në vijim janë prerja, qepja, prova dhe në fund produkti final i kërkuar dhe i mirëpritur nga klientet tona, të cilat më japin force që të profesionalizohem edhe më tepër. Po ashtu një pjesë të ditës ia kushtoj Fakultetit të Modës "Design Factory", ku jam ligjëruese dhe këshilltare. Në orët mbrëmjes kthehem në shtëpi me padurim që ta takoj Evën, e cila më relakson dhe më jep vullnet për punë dhe për jetë. Ndonjëherë gjejmë kohë për t’u argëtuar në lokalet e kryeqendrës sonë, ku pastaj e përmbyllim ditën duke pushuar me qëllim që të fillojmë ditën e re.

Sa kohë i kushtoni familjes suaj?

Kllokoqi-Rugova: Familja është gjithçka për mua. Mundohem sa më shumë që të jem sa më gjatë me ta. Gjatë ditës zakonisht jam e ngarkuar pas punës, por pas orës 17.00, kur kthehem në shtëpi gjithçka ndryshon, i harroj stresin, ngarkesën e punës duke luajtur me Evën.

A keni ndonjë vend të preferuar që shkoni me familjen në fundjavë apo ku i kaloni ato?

Kllokoqi-Rugova: Jo nuk kemi ndonjë vend të preferuar ku shkojmë. Pro kur vendosim apo kemi kohë që të dalim shkojmë në ato vende që janë të përshtatshëm për vajzën tonë, Evën.

A ju pëlqen të bëni shopping dhe çfarë preferoni më së shumti?

Kllokoqi-Rugova: Jam e pasionuar pas këpucëve, sandaleve, gjithçka në lidhje me të mbathurat dhe çantat. Ndërkaq shoping për veshje, tesha shumë pak e preferoj. Sepse është shuam e vështirë që të më pëlqejë diçka, kështu që nuk jam shumë e pasionuar.

Në lidhje me punën tuaj, stilimin, nga kush jeni ndikuar më së shumti dhe çfarë ndikoi që kjo ndjenjë të rritet edhe më shumë?

Kllokoqi-Rugova: Pamja e jashtme e njeriut e posaçërisht e femrës që të duket çdo herë më e bukur, më interesante dhe ndryshe se herëve të tjera, më shtyu të merrem me kreacione. Që nga fëmijëria e hershme jam zhytur në këto ujëra duke eksperimentuar me veten time me dizajne dhe modele të ndryshme. Gjeta përkrahjen e familjarëve të mi e posaçërisht të motrës sime, e cila më është prezentë shumicën e kohës. Me rritjen e kërkesave nga klientet tona rritet edhe më shumë ndjenja për të krijuar kreacione të reja, interesante dhe realizime te shumta.

Çfarë ju frymëzon më së shumti kur nisni një krijim tuajin?

Kllokoqi-Rugova: Rezultati përfundimtar gjegjësisht produkti final se si do të dalë, sesi do t’i rrijë klientes, si do të reagojë ajo, më frymëzojnë më tepër për nisjen e krijimit.

Cilat janë karakteristikat e stilit tuaj?

Kllokoqi-Rugova: Edhe unë si çdo stiliste shquhem me karakteristikat e mia, që kanë të bëjnë me detajet e veçanta që i përshtaten rrethit dhe kohës. Me anë të stilit kreatoret veçohen dhe identifikohen njeri prej tjetrit.

Si e vlerësoni zhvillimin e modës në Kosovë, e veçanërisht të vajzave shqiptare?

Kllokoqi-Rugova: Me zhvillimin e teknologjisë, me lëvizjet e popullatës nëpër vende të ndryshme, moda në Kosovë ka pësuar ndryshime rrënjësore gjatë viteve të fundit. Pasi që vendi ynë është në tranzicion këto ndryshime kanë qenë të pritshme dhe vajzat e Kosovës e kanë dëshmuar këtë gjë. Me punën dhe angazhimin e tyre kanë arritur suksesin në zhvillimin e modës në Kosovë dhe vendet në rajon, duke bërë shkëmbimin e detajeve moderne.


Na flisni për ngjyrat, masat që preferohen apo ju sugjeroni këtë pranverë?

Kllokoqi-Rugova: Ngjyrat që do të përdoren për këtë sezon do të jenë ngjyrat e ngrohta, që të ambientohemi sa më shumë me natyrën dhe bukuritë e saj pas një dimri të ftohtë. Kryesisht do të përdoren këto ngjyra, ngjyrë pjeshkë, ulliri, e kuqe e domates, shampanjë, rosë.

Kemi një rikthim të modës të viteve '60-'70, ju ngacmon ajo periudhë, a përfshihet në krijimet tuaja?

Kllokoqi-Rugova: Ndodh rikthimi i modës nëpër vite të ndryshme, mirëpo jo kreacione identike se çdo herë lind diçka e re e po ashtu secili kreator shquhet me disa elemente të veta origjinale që e bëjnë një realizim të veçantë gjegjësisht unikat. Mund të përfshihet edhe në realizimet e mia por në një masë shumë të vogël, prapëseprapë do të dominojë vetvetja ime sesa lëvizja e modës nëpër vite.

Cilat janë projektet tuaja të ardhshme?

Kllokoqi-Rugova: Të krijoj sa më shumë kreacione, të shpërndaj dijen dhe përvojën nëpër gjeneratat e ardhshme, që të kenë një baze prej nga mund të fillojnë.

Së fundi Blerina, bashkëshorte, nënë dhe stiliste e njohur sa e vështirë është që një ditë e juaja të shkojë ashtu si ju e keni parashikuar?

Kllokoqi-Rugova: Shumë obligime por kur ti dëshiron të arrish diçka do t’ia dalësh. Sigurisht me përkrahjen e familjes.