Duhet një histori e letërsis!

U desh një vepër nga gjiri i akademikëve që këta të pohojnë "po, është koha për një histori të re, të plotë, të letërsisë shqiptare". Duhet të jetë hera e parë apo që kur s'mbahet mend, që sheh një unitet tek kjo kërkesë që i bashkohen studiues të rinj po edhe ata të një brezi, që dje, u binte në sy një ton i dyshimtë tek angazhimi i zërave në kor. Kurse "Sfida teorike të historiografisë letrare" i Floresha Dados, i prezantuar dje provokoi këto pohime publike. Akademikja Dado, duhet t'ia ketë arritur qëllimit. "Ka 15 vjet që thuhet të shkruhet një histori e letërsisë", tha ajo, "ka debate interesante, ama nuk na lejohet që të mbetemi në sferën e diskutimeve.

Vendosa ta shkruaja këtë libër, në një kohë rekord, sepse pata një lloj inati: kështu do të vazhdojmë ne? Histori letërsie mund të shkruajë kushdo, por kur flitet për një monument kulture, duhet një organizim akademik. "Shaban Sinani e cilësoi "vepra më e arrirë në mendimin tonë teorik letrar"; Kristaq Jorgo i njohu vlerat e një vepre që "po mundëson frymëzimin e një tradite në fushë të historishkrimit të letërsisë shqipe." Një ngjarje shkencore së paku për dy arsye: për prurjen e një mendimi teorik mbi historinë e letërsisë, që, siç pohoi pedagogu Bashkim Kuçuku, nga gjithë disiplinat e letërsisë, ka qenë më pak e përpunuara dhe mund të thuhet që nuk ekziston.

Prof. Dr. Dado, mendon se një Histori e letërsisë shqipe që do të rrokte zhvillimin historik të një letërsie pesëshekullore, si një projekt i madh ndërakademik, do kishte nevojë edhe për ndihmën e studiuesve nga Kosova dhe arbëreshë të Italisë.