Blerim Destani: Dashuria, shija e jetës!

Intervistë me aktorin nga Tetova Blerim Destanin

Karriera e tij në kinema duket se po njeh kulmet e saj, por Blerim Destani, aktori i bukur, nuk mbetet pas as në dashuri, në intervistën e mëposhtme rrëfen jo vetëm për djalin që shohin në ekran.

Na tregoni ndonjë rrëfim të dashurisë

Është një ndër aktorët që po njeh sukses të njëpasnjëshëm, jo vetëm në kinemanë shqiptare, por edhe atë botërore, aktori nga Tetova, Blerim Destani flet ekskluzivisht për “Botën sot”, duke rrëfyer për profesionin, jetën dhe dashurinë. Aktor, jo thjesht i suksesshëm, por edhe një mashkull shumë i bukur, që jo rrallë herë është renditur në top-listën e meshkujve shqiptarë më të bukur.

Së pari, Blerim na tregoni se me se po merreni aktualisht?

Destani: Jam në fazën e përmbylljes së kontratave për dy vitet e ardhshme. Ky është angazhimi im kryesor në fillim të këtij viti. Si dhe në parapërgatitje për filmat që do xhiroj këtë vit. Pas “Berlinales” ku do të prezantohet filmi belg “Dossie K”, ku unë kam një nga rolet kryesore do të vazhdoj distribuimi i filmit në tregun gjerman. Unë do jem i angazhuar edhe në prezantimin e filmit.

U bëtë i famshëm në mbarë opinionin shqiptar veçanërisht me filmin “Koha e kometës”, përveç famës çfarë tjetër iu tha ky film?

Destani: “Koha e kometës” nxori në pah përkushtimin tim ndaj punës, dhe kjo punë u vlerësua si nga publiku ashtu edhe nga kritika. Me rolin e Shestanit unë u imponova seriozisht si aktor me ambicie të qarta artistike. Ky film përveç famës, më caktoi edhe përgjegjësinë time për projektet që pasuan më pas. Kështu që duke e ndjekur në radhë të parë këtë përgjegjësi, në biografinë time artistike lista e projekteve ndërkombëtare zë vendin kryesor. “Koha e kometës” ishte projekti im i tretë ndërsa më tre dhjetor të vitit të kaluar unë kisha premierën e filmit tim të tetë në Belgjikë “Dossier K”.

Keni pasur bashkëpunime me emra të mëdhenj të kinemasë, qoftë botërore qoftë shqiptare, a do të veçonit këtu një emër?

Destani: Çdo bashkëpunim sjell edhe miqësi të reja, dhe pikërisht këto janë gjëja që më bën më shumë të lumtur. Jam i kënaqur që në listën time të kolegëve dhe miqve ka emra të spikatur të kinematografisë shqiptare dhe botërore. Nuk preferoj të përmend emra pasi në listën e miqve kam shumë koleg me të cilët nuk kam bashkëpunuar, dhe këto raporte për mua janë shumë të çmuara. Ndërsa sa i përket emrave të kinemasë botërore, mund të them që jam i privilegjuar që kam pasur fatin të bashkëpunoj me yje nga majat e kinematografisë siç janë Robert Duvall, Bill Murray, Sissy Spacek, Rhona Mitra, Thomas Kretschmann, Koen de Bouë, Werner De Smedt, Hilde De Baerdemaeker etj.

Përkrah kujt aktore femër do të donit të interpretonit?

Destani: Naomi Watts

Sa e lehtë apo e vështirë është ta gjesh veten në hapësirat kinematografike në Maqedoni, pasi shpesh herë artistët shqiptarë mënjanohen nga aktivitetet që organizohen aty?

Destani: Për artistët shqiptarë në hapësirën kinematografike në Maqedoni asnjëherë nuk ka qenë e lehtë. Besoj që tani duhet të kenë ndryshuar pak gjërat. Për këtë duhet vet artistët të jenë më të organizuar dhe të konkurrojnë me projekte të mirëfillta, pasi projekti me vlerë sot e ka më të lehtë për të gjetur edhe partner ndërkombëtar. Asnjë film në Ballkan nuk mund të përfundohet pa ndihmën apo partneritetin me ndonjë partner ndërkombëtar, mu për këtë artistët duhet të krijojnë vlera për të cilat do të jenë të interesuar edhe partner ndërkombëtar.

Blerimi jashtë profesionit si aktor, a keni hobi apo pasion tjetër gjë?

Destani: Kuptohet që kam hobi dhe pasione tjera nëpërmjet të cilave e rigjeneroj energjinë time. Pasioni im kryesor është pikërisht profesioni im, më pas vijnë makinat e mira. Pastaj... e bukura në përgjithësi. Ajo më shton për çdo ditë dashurinë për jetën.

Jeni shfaqur edhe në videoklipin e Sonit, a keni marrë të tjera oferta?

Destani: Nuk kam pranuar oferta tjera.

Jetoni mes Tetovës dhe Gjermanisë, sa e vështirë është për ju që ta ndani “jetën” mes këtyre dy vendeve?

Destani: Kohëve të fundit jetoj atje ku kam punën, dhe shikuar nga ky kontekst shumë kohë kam qenë edhe jashtë Gjermanisë, ndërsa shumë pak në Tetovë. Por, përherë e kam theksuar se vendlindja është diçka prej të cilës nuk mund të ndahesh edhe kur je larg saj. Nuk e shoh veten “të ndarë mes “Gjermanisë dhe Tetovës”, por disi të dy vendet i ndjej të bashkuara në mua.

Kur ka ndodhur herën e fundit që ju kanë thënë jeni tipik shqiptar?

Destani: Unë përherë ndjehem se jam shqiptar, dhe në asnjë çast nuk e kam fshehur apo mohuar këtë. Përkundrazi, krenohem kur më prezantojnë si aktor shqiptar.

A e vizitoni shpesh Prishtinën?

Destani: Çdo vend, apo më saktë çdo qytet në mua personifikohet me njerëzit apo miqtë e mi që jetojnë aty. Prishtina është një prej qyteteve ku kam shumë miq, dhe shpesh kur nuk kam mundësi ta vizitoj Prishtinën, nëpër mendime më kalojnë pikërisht miqtë e mi, që Prishtinën e mbajnë gjallë brenda meje. Kur kam mundësi me shumë dëshirë e vizitoj Prishtinën.

E megjithatë edhe Tirana nuk është larg për ju....

Destani: Kuptohet. Sot asnjë skaj i botës nuk është larg. Nëse ke motivin e duhur apo njeriun që duhet ta takosh, gjithçka është afër.

A jeni i dashuruar?

Destani: Njeriu që nuk është i dashuruar ai nuk mund të thotë se e shijon jetën. Unë kam ende shumë dashuri brenda vetes dhe më pëlqen shumë që ta shijoj jetën në mënyrë maksimale.

Nëse do ta përkufizonit dashurinë si do ta quanit atë?

Destani: Gjendje feste, që të jep shijen e të jetuarit.

Na tregoni ndonjë rrëfim të dashurisë së hershme?

Destani: Vet emërtimi si “dashuri të hershme” do të thotë se të gjitha kanë ndodhur në një kohë tjetër kur unë kam qenë në tjetër moshë. Nuk dua t’i përmend, pasi do të tregoja mos respekt ndaj atyre ndjenjave të mia. Dua të qëndrojnë në mua ashtu siç kanë ndodhur dhe me po të njëjtin intensitet.

Së fundi, cilat janë projektet e ardhshme?

Destani: Janë shumë. Këtë vit kam kontrata për dy filma në Gjermani, po ashtu edhe jashtë Gjermanisë. Por nuk dua të flas për to, tani. Më pëlqen që të flas pasi veprat do të përfundojnë dhe do të prezantohen para publikut. Dua që t’i shijoj emocionet për punën time bashkë me publikun.