Xhani Shqerra: Top Fest-i, dritare për vlerat e mia!

Pse keni zgjedhur pikërisht Top Festin për të konkurruar me këngën tuaj?

Ky është një nga projektet që pasojnë pas prezantimit të këngës "Pa Fund". Mendoj se ky format i përshtatet mjaft mirë dëshirës për t’u prezantuar denjësisht për herë të parë në një event shqiptar dhe profesionalitetit që një artist kërkon kur bashkëpunon. Përveç këtyre karakteristikave, mendoj se Top Fest është një dritare mjaft e mirë, ku mund të hyj në majë të gishtave në shtëpitë e të gjithë shqiptarëve dhe të gjykohem për vlerat e vërteta që më karakterizojnë!

-Cili është çmimi që do të donit të merrnit?

Atë çka pres është shkëmbimi i eksperiencave me artistët e tjerë pjesëmarrës, me stafin realizues, i cili me shumë përkushtim këtë vit do të na japë mundësinë të tregojmë vlerat tona dhe t'i ofrojmë publikut ndjenja, emocione dhe spektakël. Çmimi më i madh për mua do të ishte realizimi i gjithë kësaj, duke u manifestuar me duartrokitjen e publikut ardhur si rezultat i një ndjenje të sinqertë!

-I keni dëgjuar këngët e tjera konkurruese në Top Fest? A ka ndonjë këngë që të ka pëlqyer?

Kam dëgjuar disa këngë të viteve të shkuara, të cilat kanë pasur vlera të vërteta artistike, i kanë dhënë mundësi artistëve të shumtë, të rinj, të nisin hapat e tyre të parë në këtë fushë, duke realizuar ëndrrën e tyre e të punojnë për të sjellë projekte të tjera, të cilat i kanë bërë që sot të jenë artistë të afirmuar e të respektuar nga publiku shqiptar!