Deri kur ...?

Artistja Majlinda Kelmendi është pjesëmarrëse në ekspozitën e hapur disa ditë më parë titulluar “Martesa e Bardhë”, një ekspozitë që nëpërmjet veprave të tyre artistët u bëjnë apel që qytetarët e Kosovës të përfshihen në procesin e liberalizmit. Ndërsa të bien në sy dy veprat artistike të piktores Kelmendi të titulluara “Burokracia” dhe “Ballkani”. “Po, marrë pjesë në këtë projekt -ekspozitë me një performancë dhe dy piktura nga cikli im “Ballkani”. Sigurisht që nëpërmjet konceptit të punimeve të mia dhe figuracionit që kam zgjedhur, kompozimit, kam shprehur shqetësimin tim për situatën që ne jetojmë në mënyrë artistike dhe bashkëkohore”, u shpreh për “Botën sot”, piktorja e mirënjohur.

Sipas saj ndoshta kjo ekspozitë nuk do ta zgjidh përfundimisht problemet por, ajo këmbëngul se iniciativa të tilla janë shumë të rëndësishme dhe të domosdoshme në shoqërinë ku jetojmë. “Është e vërtet që nuk janë përcaktuese, por ama sensibilizon opinionin dhe politikën në mënyrën dhe formën që zgjedh për të trajtuar temën dhe problemin që e shqetëson shoqërinë ku jeton dhe vetë artistët që janë pjesë e saj”, thotë artistja, e cila, ashtu si artistët e tjerë, përdorin artin e tyre, si gjuha më e mirë për të komunikuar dhe për të mos qëndruar indiferentë ndaj këtyre probleme, pasi ata janë pjesë e rëndësishme e shoqërisë.

Ndërsa për sa u përket dy veprave të saj, janë dy koncepte shumë të veçanta, të goditura, ndoshta pikërisht për këtë përbëjnë edhe stilin e veçantë apo tiparet e personalitetit të piktores. “ Në punimin “Burokracia”, pra njeriu i mbërthyer në litarë, tregon privimin nga liria fizike dhe nga liria e të vepruarit dhe të menduarit. Ky është i riu ynë, njeriu ynë i getoizuar i kufizuar nga burokracia evropiane e vizave, për të vepruar si subjekt sovran, për të lëvizur si qenie e lirë nëpër vendet e Evropës, botës. Pra ky njeri nuk ik nga liria, por është i privuar nga ajo. Nuk dihet në është ky paradoks i kohës, apo imperativ i kapitalit dhe i politikës selektive evropiane? Sidoqoftë të jetë, të zhvishet njeriu nga identiteti e virtyti i vet njerëzor e pastaj të lidhet me litarë, nuk është imazh i mirë e aq më pak i bukur, në fillimin e këtij mileniumi”, shpjegon piktorja.

Ndërkaq në veprën e dytë të prezantuar kemi “Ballkanin”, autorja komunikon nëpërmjet kësaj vepre me institucionet të cilat e kanë në dorë ta ndryshojnë këtë situatë. “Të jesh i mbyllur në kohën e lirisë, të jesh i cunguar në kohën e demokracisë, të integrohesh dhe mos pranohesh, të kërkojnë të zhvillohesh dhe në vend të bllokohesh. Ekzistojnë elitat me prejardhje të vjetër, por ne kërkojmë dritën e gjelbër...Deri kur ...?”, shprehet Mr. Kelmendi, duke shpresuar se kjo ekspozitë të ketë veçanërisht efekt në Bruksel.