Big Mama: “Tani ndjehem pas seksi, pak big”

Këngëtarja Big Mama ka prezantuar këngën e saj të re në emisionin “RTK Blu”. Kënga mban titullin “Çka po ta nin” dhe është punuar në studion e Bertan Asllanit, i cili tashmë ka nisur të ushtrojë edhe profesionin e kompozitorit. Bigu thotë se ai është një djalë i talentuar, edhe pse është i ri. Kësaj kënge këngëtarja thotë se do t’i realizojë edhe një videoklip së shpejti.

Big Mama: Gazetarët, arsyeja pse u dobësova

Në këtë emision Bigu edhe një herë ka folur për dobësimin e saj, duke treguar arsyet pse e kanë shtyrë të heqë madje edhe 30 kile nga trupi i saj. Por e dini e cila ka qenë arsyeja kryesore që e ka shtyrë atë të marrë këtë vendim? Gazetarët. “Arsyeja e parë ishin gazetarët, të cilët gjatë tërë kohës shkruanin për peshën time, për kilet e mia dhe kjo që bëra unë ishte për inat të tyre, që t’u tregoja atyre se mund të dobësohesha dhe pastaj të shihja se çfarë do të shkruanin ata”, shprehet Big Mama. Megjithëse me këtë veprim ajo më shumë ka shfryrë inatin ndaj gazetarëve, gjithsesi tashmë ka kuptuar se edhe ua ka parë hajrin atyre, sepse tani Bigu thotë se ndjehet më mirë fizikisht dhe një dobësim i tillë është i mirë edhe për shëndetin.

Pas dobësimit, edhe operacion estetik

Pas dobësimit ajo i është nënshtruar edhe një operacioni estetik jo për rritje apo fryrje të ndonjë pjese të trupit, sikur e kanë bërë këngëtare të tjera, por për të hequr pjesë të lëkurës së rrudhur që kishte mbetur si pasojë e dobësimit. Edhe pas këtij dobësimi të dukshëm, ajo do të vazhdojë të mbajë emrin Big Mama (Nënë e Madhe), emër ky artistik që ajo ia ka vënë vetes në fillim të karrierës duke marrë shkas nga pesha dhe madhësia e saj. Por a vazhdon të ndjehet ajo akoma Big Mama? “Tani ndjehem pas seksi e pak big”, thekson ajo buzagaz.

‘Show girl”-i Big Mama

Big Mama shquhet edhe si prezantuese televizive, duke pasur emisionin e vet “Big Mama Show” në televizionin shtetëror të Maqedonisë. Por më shumë se prezantuese, ajo e quan veten një ‘show girl’, e cila në emisionet e saja përpiqet të bëjë më shumë muhabete shtëpie. Hëpërhë ky emision nuk është duke u realizuar, por ajo thotë se së shpejti do të nisë angazhimin në edicionin e ri të tij.

Cila do të jetë çmenduria e radhës e Bigut?

Përveçse pa komplekse, Big Mama vlerësohet edhe si një këngëtare simpatike. Por ajo thotë se vlerëson më shumë te njerëzit drejtësinë, mirësinë dhe pozitivitetin, të cilat virtyte thotë se i ka edhe vetë. Ajo nuk ka lënë gjë pa provuar në jetë, por i ka ngelur peng vetëm një gjë: të lëshohet më parashutë. “Dua të lëshohem me parashutë, por kam fobi nga lartësia, por do ta provoj edhe këtë, sepse s’kam lënë çmenduri pa provuar”, tregon ajo.

Bigu feston ditëlindjen në Shkup

Sa i përket muzikës, ajo ka shumë plane për këtë vit, por nuk i tregon, sepse ndodh që të mos mund t’i jetësojë dhe kështu nuk dëshiron ta zhgënjejë publikun. Vetëm shton se gjithçka të mirë që do të bëjë, publiku do ta shohë dhe do ta vlerësojë. Të dielën, më 28 shkurt, ajo ka festuar ditëlindjen në “RTK Blu”, ndërsa pas emisionit menjëherë ka shkuar në Shkup, ku ka festuar me miqtë e saj. “Mezi po pres të shkoj të shoh se çfarë më ka blerë shoqëria, të gjithë i kemi në qejf dhuratat dhe edhe pse u themi miqve të mos na blejnë asgjë, në vetvete kemi dëshirë të madhe ta bëjnë atë”, pohon ajo.