Tendencat pranverore që sjellë stilistja Enkelejda Shatri!

Intervistë me stilisten Enkelejda Shatri

Është një ndër stilistet tashmë që ka zënë një vend të rëndësishëm në fushën e modës këtu në Kosovë, Enkelejda Shatri, e nisi karrierën e saj në Tiranë, ndërsa rrugëtimi i saj vazhdon këtu. Në një intervistë për “Botën sot”, stilistja e mirënjohur tregon për pasionin e saj stilimin, për mënyrën sesi vishen politikanët tanë, folëset e lajmeve, por edhe shoqëria. Gjithashtu tregon për tendencat e kësaj pranvere, për ngjyrat dhe format që sjellë kjo stinë, më poshtë intervista me stilisten.

Si ka filluar karriera apo pasioni juaj për stilimin e veshjeve?

Znj.Shatri: Në fakt ky pasion më ka lindur prej gjyshes sime, sa herë shkoja në Korçë, ajo ka qepur gjithmonë, duke e parë atë kisha dëshirë që të mësoja të qepja. Atëherë nuk kishte stiliste po rrobaqepës, por unë mund të them se gjyshja ime ka qenë stiliste. Ajo si duket ma ka futur egon e veshjes së veçantë dhe më kujtohet në moshën 10 vjeçare, kur jam futur fshehurazi dhe e kam thyer gjilpërën. Nga mosha 11 vjeçare kam qepur të parin fustan që doli shumë i bukur. Por, duke i lënë anash këto, puna e stilistes është rritur brenda meje, është rritur pa e kuptuar. Nuk kam menduar të bëhesha stiliste, por oficere dhe gjithmonë e kam dashur. Por në atë kohë kur patëm kohën për të konkurruar ndryshuan sistemet dhe babai më këshilloi të mos bëhem oficere. Kam dashur të bëhem kostumografe, por ka qenë një konkurs tmerrësisht i madh, mbi 300 vetë për 4 vende. Regjistrova anglishten jo me shumë dëshirë, ndërkohë punova për vetën time. Nuk kam punuar për klientelë derisa kam mbarur shkollën. Pastaj u hap një shkollë, e cila edhe pse i mbarova dy vjet nuk i përmbushi kërkesat e mia. Mora një bazë por jo të kompletuar atë çka desha. Pas 3-4 viteve kam filluar edhe dizajnin e modës në Milano. Një pjesë të lëndëve i kam dhënë në provime dhe kanë qenë shumë të kënaqur. Diplomën e kam marrë nga një komision me personalitete shumë eminentet të modës botërore.

Duke qenë këtu te shkollat, a kemi ne baza të mira për të përgatitur stilistë apo dizajner të mirë?

Znj.Shatri: Kur e kam hapur shkollën në Prishtinë, nuk ka pasur shkollë fare dhe kjo ka ardhur me ndihmën e Instituti de Moda, ku unë kam mbaruar. Më ndihmuan në këtë iniciativë timen, dhe pasi formova stafin tim më ndihmuan me planprogramin e tyre.

Di vetëm një gjë, që dy komisione të akreditimit i kemi kaluar me ekspertë të huaj, dhe mendoj se po përgatisim stilistë me te ardhme.

Si një stiliste me përvojë, si mendoni a vishen bukur politikanët tanë?

Znj.Shatri: Politikanët në përgjithësi i sheh mirë, nuk është se dallohen shumë nga politikanët nëpër botë. Një pjesë i kanë disa pika të dobëta, si disa kravata që nuk kombinohen shumë me veshjen apo me vendin, por në përgjithësi vishen mirë. Shihet se shpenzojnë për gardërobën e tyre. Puna e tyre nuk është të duken bukur, dikush tjetër e bënë atë punë për politikanët dhe fatkeqësisht as politikanët nuk e kanë atë mundësi që të kenë pas një këshilltar, që është edhe njohës i dukjes së jashtme për politikanët apo diplomatët. Me aq sa kanë mundësi vishen bukur në tërësi. Ndërsa një kritikë për femrat politikane i shohim shpesh herë që veshin kostume me çizme, assesi një politikane nuk duhet ta bëj një kombinim të tillë.

Ç'farë mund të na thuash për folëset e lajmeve, që përbëjnë edhe imazhin për një publik më të gjerë?

Znj.Shatri: Është një problem se televizionet e Kosovës nuk e kanë buxhetin për të pasur punëtoritë dhe stilistë për folëset e punëtorët e vet. Sepse buxheti është ai që dikton çdo gjë, por në krahasim me disa vite më përpara janë përmirësuar dukshëm. Por ende ka punë për të bërë sidomos te folëset e lajmeve, sepse ato janë përballja e parë më shikuesit dhe më e rëndësishmja. Shoh që ka vend për të përmirësuar për xhaketat, format e jakave, kombinimet e bluzave me xhaketat. Se shikuesit nuk duhet të merren me veshjen e saj, por informacionin që ajo përcjellë. Ndërsa drejtueset e emisioneve apo spektakleve të ndryshme janë shumë të varfra në veshje. Nuk funksionon mirë dhënia e veshjeve nëpër butikë, nuk e kanë gjetur një gjuhë të përbashkët. Andaj shpesh herë lënë për të dëshiruar në veshje te tyre se u duhet të sajohen vet. Ajo çfarë më bën përshtypje janë gazetarët e televizioneve që shkojnë në institucione apo delegacioneve, u mungon një veshje e duhur, pasi në këto ambiente ekziston një kod i veshjes.

Ndërkaq do të thosha për qytetarët e thjesht, për të cilët vlen thënie, më thuaj ku rri, në cilën zonë të Prishtinës, të them sesi vishesh. Pra, ka në disa vende që në përgjithësi vishen shumë bukur ndërsa në disa vende të tjera që nuk kanë lidhje me atë që është aktualisht në modë. Sigurisht që ka disa arsye, arsye parë është gjendja ekonomike, dhe se çfarë të ofrojnë dyqanet në Prishtinë. Së dyti është edhe kultivimi i shijes që në fëmijëri, merret prej nënës, shoqërisë, etj. Megjithëse kohët e fundit ka një ndërgjegjësim të shoqërisë sesi të vishet, e dinë që është çfarë është në modë, kërkojnë këshilla nga stilistët për trupin e vet etj.

Cilat janë tendencat dhe ngjyrat e kësaj pranvere që po vjen?

Znj.Shatri: Ajo çfarë është karakteristikë, dhe që prej vitesh në botë, po futet si tendence, është aplikimi i veshjes së mbrëmjes edhe ditën. Arsyeja është se njerëzit janë aq të zënë në punë, sa nuk kanë kohë të përkushtohen edhe të vishen për në mbrëmje, andaj ndodh që shumica prej punës të shkojnë në një klub. Janë veshjet me shumë shkëlqim, që vishen ditën dhe përfundojnë deri në mesnatë, ajo çfarë ndryshon është këpuca që shpesh herë merret në çantë se duhen me taka në mbrëmje. Të njëjtën tendencë e kemi edhe tani. Ndërsa për ngjyrat janë të theksuara, e gjelbërta e theksuar, e verdha, pinku që vazhdojnë të jenë të pranishëm. Ndërsa përfundimisht e zeza, e bardha, pinku dhe e kuqja nuk kanë për të dalë kurrë nga moda. Pinku është futur si ngjyrë pas të bardhës e të zezës, këto i kemi pasur si ngjyra që nuk diskutohen hyjin apo dalin nga moda. E zeza është prezentë në veshjet e mbrëmjes, ka më shumë klas, po të tregon edhe më të thjesht, kurse e bardha është ajo që tërheq vëmendjen, më karakteristike, jo kushdo mund ta mbaj, sepse të zezën mund ta vesh kushdo. Pinku është futur në shijen e të gjithë popullatës e po ndodh prej disa vitesh. E kuqja është e rrezikshme si ngjyrë, sepse një femër e veshur me të kuqe tërheq vëmendjen. Ndërsa për format e pranverës,do të thosha janë format e fryra, supet në formë gjeometrike, po ndodh një ndryshim në modë me këto lloj formash si dhe prerjet gjeometrike.