Camaj, i plotë në 85-vjetorin e lindjes

Në vëllimin e dhjetë do të njohim Camajn përmes arkivit të tij letrar, trashëgimi që ne kemi për Camajn si kritik letrar, mendimet që jep ai për zhvillimin e poezisë, prozës, së letërsisë shqipe në përgjithësi.

Plot dhjetë vëllime, ku përfshihet vepra letrare, studimore, madje edhe variante, të cilat ai vetë i kish lënë mënjanë, si jo shumë të “denja”. Mbushen 85 vjet që nga lindja e poetit dhe albanologut, Martin Camaj. Një vit jubilar, i cili do të përkujtohet përmes aktivitetesh në Universitetin e Mynihut, ku ai themeloi degën e Albanologjisë. Drejtuesi i Degës së Albanologjisë në Universitetin e Mynihut, prof.dr. Bardhyl Demiraj, thotë se tashmë përgatitjet kanë nisur për të festuar këtë vit. Dhe nuk bëhet fjalë thjesht dhe vetëm për konferenca shkencore, por për botime veprash, të cilat janë një trashëgimi e pashlyeshme e letërsisë shqipe. “Kemi në plan dy projekte, njëri prej të cilëve është i përfunduar.

Bëhet fjalë për një vëllim përkujtimor, në të cilin shkruajnë studiues të disa fushave, jo vetëm letrarë, por edhe gjuhëtarë, etnologë e historianë të kombësive të ndryshme, që na bashkon ne albanologët. Jemi 33 albanologë ndër më të njohurit në Evropë dhe në SHBA, që marrin pjesë në këtë vëllim me një kontribut që ia përkushtojnë këtij personaliteti të ekzilit dikur politik, pastaj kulturor, shqiptar në gjysmën e dytë të shekullit të kaluar. Nuk janë kontribute që kanë të bëjnë me atë çka personi Camaj i ka dhënë letërsisë, gjuhësisë, apo kulturës shqiptare në përgjithësi, pasi këtë nuk do ta donte as vetë Camaj, po të ishte gjallë, por është një punim që i kushtohet emrit të tij, ku secili specialist trajton një nga fushat e caktuara nga aktiviteti i vet shkencor”, tregon Demiraj. Sipas pasardhësit të Camajt, bëhet fjalë për një punim që i ka kaluar 600 faqet dhe botohet në shtëpinë më të njohur botuese në Gjermani, vetë Camaj, gjuhëtar dhe dialektolog i ka botuar studimet e veta shkencore.