Blerim Destani: Zoti e krijoi femrën, duke korrigjuar gabimet që bëri te mashkulli!

Për të, bota e kinematografisë është shumë e vështirë dhe për të gjitha ata që besojnë se brenda natës mund të ndodhin mrekulli ai mendon se përpara vetes kanë vetëm një iluzion. Të paktën kështu shprehet aktori i njohur Blerim Destani lidhur me sakrificat e shumta me të cilat një aktor duhet të përballet gjatë karrierës së tij. Rolet e tij tashmë janë bërë të shumta edhe për t’u numëruar, e megjithatë ata të cilët i kanë ngelur në mendje janë interpretimet përkrah hollivudianëve, Robert Duvall, Bill Murray, Sissy Spacek etj,. Aktualisht Blerim Destani është i angazhuar në filmin më të ri të titulluar “Get Low”, i cili pritet që këto ditë të prezantohet në SHBA dhe më gjerë.

- Tashmë jeni shumë i njohur në botën e aktrimit Blerim. Na thoni diçka për “startin” e këtij pasioni. Kur ka lindur kjo dëshirë për të qenë pjesë e botës së madhe të kinematografisë?

Në çdo vepër që krijon artisti në një masë të madhe e hulumton vetveten. Kështu që edhe unë duke bërë hulumtime të tilla arrita në konkludim se pasionin ndaj kinemasë e kam trashëgim nga babai, ndërsa admirimin ndaj së bukurës nga nëna ime. Pra, që në moshë të re unë i detektova këto dy pasione brenda meje dhe një sintezë e të dy pasioneve thjesht kërkoi nga unë që të orientohem në këtë profesion duke i zhvilluar me shumë dashuri pikërisht këto pasione të miat.

- Roli juaj i parë në film?

Roli im i Shestanit në “Koha e Kometës” është roli im i tretë dhe unë me shumë dëshirë dua ta llogaris si rolin tim të parë, pasi në këtë film unë arrita të prezantoj veten në kuadër të pasionit tim të mirëfilltë për këtë profesion.

- Po në teatër keni provuar?

Ende nuk jam paraqitur në skenë teatri. Kuptohet përveç punëve që kam bërë në “Akademinë e Kellnit”, por e përkrah mendimin e të madhit Lorence Olivier që thotë; “Teatri për aktorin është një dëshmi konstante ku ai i lëvron fshehtësitë e aktrimit. Teatri është një raport i qëndrueshëm dhe i shëndoshë, ashtu siç mund të jetë një martesë e qëndrueshme dhe përplot me dashuri reciproke. Ndërsa filmi për shkak të natyrës së vet më shumë është si një flirt jashtëmartesor me erupsione emocionale dhe me një kohë të shkurtër të zgjatjes”. Pra në këtë kontekst në aktrim unë ende jam në fazën e “flirtit” emocional që më sjell shumë përjetime të fuqishme dhe jam duke menduar që ta shijoj edhe skenën e teatrit me qëllim që të zbuloj edhe fshehtësitë e tjera të aktrimit.

- Roli juaj më i veçantë?

Nëse më duhet të përmend role do të thosha Shestani te “Koha e Kometës”. Unë kam një gradacion shumë të mirë të angazhimeve deri te filmi belg “Dossier K”, ku luajta rolin e Nazimit, që ishte një nga rolet kryesore. Në mes të këtyre dy roleve ka shumë ngjashmëri dhe mund të them që brenda meje Shestani u rrit, u zhvillua në Nazim.

- Ku po jetoni aktualisht?

Njeriu jeton atje ku edhe punon. Puna ime është e tillë që kërkon vazhdimisht lëvizje dhe udhëtime të shumta, si në fazën përgatitore, ashtu edhe në fazën e xhirimeve. Kështu që kohëve të fundit kam qenë në relacione: SHBA, Belgjikë, Gjermani, Spanjë, Austri, Hungari, Zelandë e re, Australi etj..

- Sapo kemi mësuar se së shpejti do të jeni pjesë e një filmi holliwood-an me titull “Get low”. Çfarë do të thotë kjo për ju?

Filmi “Get low” tani pritet të fillojë prezantimin në SHBA dhe më gjerë. Jam i bindur se ky film do të shënohet si filmi me interpretim të mrekullueshëm të ikonës së aktrimit Robert Duvall. Për mua ishte privilegj dhe kënaqësi të luaja përkrah aktorëve siç janë: Robert Duvall, Bill Murray, Sissy Spacek, Scot Cooper, Lucas Black, Bill Cobbs, etj..

- Na përmendi disa nga filmat që keni interpretuar dhe ju?

“Metropolet“, Kosova – Desperate Search“ (Etjet e Kosovës), “Koha e kometës“, “The Truth about Men“, “At World´s End”, "Get low", “Dossier K”, "Die Wanderhure".

- Sakrificat më të mëdha që ju është dashur të bëni për të arritur këtu ku jeni sot?

Sakrificat përherë janë të mëdha dhe të domosdoshme, por ato tejkalohen lehtë nëse para vetes ke prioritete të qarta. Ajo që më është dashur të sakrifikoj është koha e lirë për miqtë dhe shokët e mi, por kam mirëkuptim për këtë gjë nga ana e tyre.

- Sa e vështirë është bota e kinematografisë Blerim?

Është shumë e vështirë dhe të gjithë që mendojnë, apo besojnë se brenda natës mund të ndodhin mrekullitë mendoj se kanë para vetes një iluzion.

- Thuhet që rivaliteti është shumë i madh, sidomos kur bëhet fjalë për një pjesëmarrje në filma të përmasave të mëdha. Në fakt a ka hasur “bërryla” gjatë karrierës së tij Blerimi?

- Ç’është femra për ju Blerim? Me çfarë do ta krahasonit atë?

Më pëlqen mendimi se, pasi Zoti e ka krijuar njeriun - mashkullin më pas e krijoi edhe femrën, duke i korrigjuar të gjitha gabimet që kishte mashkulli.