“Muzgu”, për një dashuri jo të zakonshme

“Muzgu”, libri me fantazi të jashtëzakonshme i Stephenie Meyer i jep lexuesit mundësinë të zbulojnë një çift të dashuruarish me kokën mbi re. Bela adhuron Eduardin e pashëm dhe ai ia kthen dashurinë. Por Eduardi kalon një periudhë të vështirë pasi duhet të përballojë etjen që ndjen për gjakun e Belës... ai është vampir. Bela parapëlqen të vdesë se sa të qëndrojë larg tij, duke rrezikuar kështu vetë jetën e saj. Ata të dy janë në luftë të vazhdueshme, për ta bërë marrëdhënien e tyre të funksionojë, për t’i mbijetuar çdo lloj tundimi dhe çdo lloj kërcënimi që mund t’u shfaqet. Autorja ia ka dalë mbanë për bukuri, që ta bëjë këtë skenar të besueshëm dhe njerëzor. Libër i cili mahniti aq shumë njerëz dhe që fitoi shumë çmime. Tani njihet si libri më i lexuar dhe më i pëlqyer nga të gjitha moshat.

Ky roman fillon me një parashtrim të zakonshëm: Bela ka ardhur në qytetin e vogël e të zymtë, Forks, për të jetuar me të atin. Në shkollë, ajo mahnitet me një grup prej pesë adoleshentësh, jashtëzakonisht të bukur, që ulen së bashku në mensë, por që asnjëherë nuk hanë. Motivin e dashurisë e gjejmë edhe në raportin mes njeriut dhe njeriut vampir. Bela do bjerë në dashuri me Eduardin, djalin më të pashëm të shkollës, prej të cilit do të mësojë të fshehtën e tyre. Ata janë të gjithë vampirë, pjesëtarë të një familjeje, të kryesuar nga Çarlisll. Për hir të Eduardit ata e mirëpresin Belën, por kur një grup vampirësh fiksohet pas saj, familja tërhiqet në ndjekje të tyre për të mbrojtur vajzën që gjendet me ta. Me gjithë vështirësitë e shfaqura, dashuria ideale e dy të rinjve triumfon. “Muzgu”i Stephenie Meyer, është një libër pas të cilit çdo njeri që do ta lexojë, ‘do të dashurohet’ Një libër që edhe të rriturit i kthen në periudhën e adoleshencës.