Facebook në Shqipëri: Kërcënime, arrestime, xhelozi, vrasje

Facebook është një rrjet social, që në Shqipëri filloi të përdoret masivisht diku nga fundi i vitit 2008. Të gjitha kategoritë kanë një faqe të tyren, ku kanë dhënë detaje mbi jetën e arsimimin dhe komunikojnë pafund me njerëz të ndryshëm, të njohur e të panjohur. Ky rrjet së fundi ka filluar të ketë vlerë edhe për Policinë. Kjo e fundit ka skeduar emrat e personave të kërkuar dhe përmes kërkimit ka mundur të gjejë foto të tyre, por në pamundësi për t’i arrestuar ata, Policia merret me shokët e tyre, ata që janë të njohur apo të panjohur, ku si një element pozitiv shërbejnë fotot e ndryshme. Ka edhe më shumë se kaq. Persona të ndryshëm dalin në mbrojtje të vrasësve; siç ishte rasti i Dritan Dajtit dhe Ledion Marës. Edhe pse i vdekur, Mara, bashkëpunëtori i Dritan Dajtit, nga dora e të cilit u vranë 4 policë, ka grupin e tij të fansave në Facebook. Pak kohë më parë grupi i fansave nuk hezituan të shprehen se do ia merrnin hakun Ledionit, shokut dhe mikut që u vra nga dora e policisë në kapjen e superkriminelit. Në atë kohë, një person me emër të koduar ka hapur blogun me mbishkrimin për Marën me citimin: “Kujtimi yt do të vazhdojë të mbetet i gjallë, hakun nuk ta lëmë pa e marrë”. Në një rast të tillë, duket se Policia fillimisht nuk e besoi, por më pas veproi dhe mbajti për shumë muaj nën kontroll shokët e Ledion Marës dhe Dritan Dajtit. Klubi i fansave përbëhej nga grupi siç janë identifikuar dhe ata vetë, djemtë e “Rrugës Ypsilon”, adresë e cila u gjet nga Policia. Deri këtu, duket se me “facebook” paska edhe sukses. Por të martën në Elbasan ndodhi një vrasje. Një djalë nga Vlora kishte lidhje me një vajzë gjimnaziste në Elbasan. Ata ishin parë fizikisht gjatë një ekskursioni në Vlorë, më pas përmes “Facebook”. Kishin komunikuar vazhdimisht në chat online të Facebook dhe për një kohë të gjatë mes tyre gjithçka ishte normale. Por duket se xhelozia nisi kur djali Endri Llambraj nga Vlora pa në faqen e “Facebook” të vajzës që donte disa foto, ku ajo kishte dalë me persona të tjerë, një pjesë e të cilëve djem. Por kjo nuk është pritur mirë dhe sipas Policisë, një gjë e tillë mendohet të ketë qenë shkak për vrasjen. Të shkojmë më tej. Dy persona u arrestuan nga policia në Itali me akuzën se kanë tentuar të vrasin me armë një 26-vjeçar për shkak të ofendimeve në “Facebook”. Sipas policisë, ngjarja e ka zanafillën te disa fyerje të kryera në “Facebook” nga autorët e ngjarjes adresuar gruas së një 26-vjeçari. Kjo e fundit ka lajmëruar të shoqin e saj për personat që po e fyenin në “Facebook” dhe menjëherë ka nisur të kërkojë personat. Policia bëri të ditur se dy personat, një burrë 41 vjeç dhe një 29-vjeçar kanë qëlluar me armë në drejtim të personit që u kishte kërkuar sqarime për fyerjet në Facebook në adresë të gruas së tij. Ka edhe më. Mashtrimet me facebook. Edhe për shqiptarët. Dikush hap faqe facebook, sikur është Lorik Cana, Adi Krasta, Sali Berisha, e shumë, e shumë të tjerë, që në fakt nuk kanë një faqe të tyre në këtë rrjet social. Mashtruesit flasin në emër të tyre. Hiqen si ata dhe sa për të dhënat nuk e kanë aspak të vështirë. Mjafton një kërkim i thjeshtë në Google dhe gjen edhe foto edhe të dhëna sa të duash. Pak ditë më parë Facebook kishte bërë disa ndryshime që i jepnin mundësi përdoruesve të zgjidhnin opsionet dhe informacionet që do të shfaqeshin në profilet e tyre.
Edhe pse “Facebook” angazhohet për garancinë e të dhënave, është konsideruar si një rrezik serioz për informatat personale të anëtarëve të rrjetit. Një kontraktues i Qeverisë amerikane ka thënë se “Facebook është bërë më i frikshëm se sa i bukur”. Presidenti i Facebook për politikat e jashtme, Elliot Schrage, ka thënë se ndryshimet e vazhdueshme kanë ardhur si pasojë e rritjes së numrit të anëtarëve, më tepër se 400 milionë aktualisht në të gjithë botën.