Të vërtetat rreth martesës

Dihet se martesa është një periudhë e rëndësishme në jetën e njeriut, meqë është hapi i parë për krijimin e familjes. Por, ju që ende nuk jeni martuar, e mendoni t’ia mësyni kësaj rruge, a i dini të gjitha sekretet e martesës?

Princat jetojnë vetëm në përralla

Kur martoheni, mendoni se do të jeni të lumtur deri në vdekje. Pastaj, një ditë ju del gjumi dhe kuptoni se burri juaj, pa marrë parasysh se sa i mirë që është, nuk ju bën të lumtur çdo minutë të jetës. Do ta pyetni veten sesi nuk e keni kuptuar këtë më parë dhe mos ndoshta jeni ngutur tepër kur jeni martuar. Lumturia deri në fund të jetës haset vetëm në përralla e, në jetën reale, jeta ka të mirat e të këqijat e saj. Martesa juaj testohet çdo ditë nga problemet dhe obligimet e llojllojshme. Sapo të arrini të kuptoni se martesa ideale nuk ekziston, atëherë do ta keni më lehtë që të ballafaqoheni me probleme.

Jeta martesore, një etapë e jetës me më shumë obligime

Kur, para se të martoheni, nëna ua ka tërhequr vërejtjen se jeta me burrin nuk është aspak e lehtë, me gjasë keni menduar se ajo është duke e tepruar, se është duke folur për kohën e saj. Por, kur të martoheni, ndoshta jo menjëherë, por me kalimin e viteve, do të bindeni se jeta martesore, krahasuar me jetën e beqarisë, është një etapë e jetës me më shumë obligime dhe stres.

Gjatë grindjeve mos e kërkoni fajtorin

Të gjithëve ju pëlqen që gjithmonë të kenë të drejtë, bile edhe gjatë grindjeve. Disa gra, kur të kenë mosmarrëveshje me burrin, më të rëndësishme e shohin që tërë fajin t’ia hedhin atij, sesa që të zgjedhin problemet që kanë çuar deri te grindja. Këtë sjellje fëmijërore duhet ta harroni menjëherë. Nëse ia dilni që ta frenoni egon tuaj, do ta shihni se me rastin e ndonjë keqkuptimi, nuk ka fajtor dhe të pafajshëm, sidomos jo në martesë.

Ndonjëherë do të mungojë edhe seksi

Gjatë jetës martesore, do të ketë periudha kur thjeshtë, nuk do të jeni të interesuar për seks. Ditët pa seks janë pjesë përbërëse e çdo martese, por kjo nuk dmth se është shuar dashuria. Thjeshtë, mund të jetë se jeni lodhur nga obligimet e përditshme dhe doni që të ngiheni gjumë. Në vend të seksit, atë ditë mund të bisedoni, të putheni e të ledhatoheni.

Meshkujt nuk ndryshojnë

Çdo grua e ka një dëshirë thellë në veten e saj – që ta bëjë burrin sipas shijes së saj, apo edhe të përsosur. Natyrisht, ato thonë se këtë e bëjnë për të mirën e tij. Por, për fat të keq, kjo nuk është e mundshme. Nuk është e mundshme që të ndryshohet një njeri i rritur, me shprehitë dhe besimet shumëvjeçare. Më lehtë e keni që ta ndryshoni reagimin tuaj ndaj veprimeve të tij.

Mos u lidhni tepër me të

Burrin tuaj e doni aq shumë sa që mendimi se mund të mbeteni pa të, thjeshtë ju tmerron. Një qëllim i tillë nuk është i mirë. Duhet të mos e humbni besimin në vetvete dhe në kualitetet tuaja. Duhet ta ruani mendimin tuaj, shoqërinë tuaj, hobit tuaja. Nuk është e thënë se duhet të mendoni atë që mendon burri juaj, se duhet të rrini vetëm me ata njerëz që rri ai, apo të hani atë që ha ai. Dashuria është OK, por jo edhe robëria. Ikub