Flaka Krelani: Tirana, vendi ku unë linda artistikisht

Është unike në stil dhe në këngë, rockere me një potencial vokalistik për t’u admiruar jo vetëm nga publiku i thjeshtë, por edhe nga kolegët e saj. Këtë vit në “Top Fest 7” ajo konkurroi me këngën “Ëndërr”. Bëhet fjalë për Flaka Krelanin, “rebelen”, e cila në muzikën shqiptare ka sjellë një frymë të re interpretimi, zëri dhe stili.

- Një ndër rockeret më të mira në Shqipëri dhe Kosovë. Çfarë ndjesie të krijon ky fakt?

Gjithmonë për mua ka ekzistuar një lloj frike, përsa i përket arritjes së famës dhe suksesit. Shpeshherë më ka munduar ideja, nëse ndonjëherë do arrija të bëhesha e famshme dhe nëse do kisha sukses me këtë lloj muzike që unë kam dëshirë ta kultivoj, pra me rock music. Por besoj që puna e madhe dhe vlerësimi maksimal i publikut, më kanë bërë që të jem ajo që gjithmonë kam pasur motiv!

- Çfarë është muzika “rock” për ju?

Është ajo që më përfshin mua në gjithë aspektet e jetës!

- Keni qenë shpesh pjesëmarrëse në “Top Fest”. Sa e vlerësoni këtë eveniment?

Vetë pjesëmarrja ime në “Top Fest” tregon, sesa e çmoj këtë eveniment! Është një eveniment, të cilin unë e vlerësoj shumë, e sidomos këtë vit që ishte “live”! Besoj që me këtë gjë “Top Fest” ka arritur një vlerë edhe më të lartë që tani e tutje do jetë me të vërtetë eveniment me plot kuptimin e fjalës. Sidomos e vlerësoj shumë punën e orkestrës profesionale që meritojnë një falënderim të madh për realizimin shumë origjinal të këngëve pjesëmarrëse!

- Këndimi “live” këtë vit ju motivoi edhe më shumë për të qenë pjesëmarrëse?

Absolutisht që po! Pasi këndimi “live” është me të vërtetë gjëja më e rëndësishme që një “këngëtarë” duhet të ketë!

- Kënga “Ëndërr” në forume të ndryshme është vlerësuar shumë. Sa ju lumturon ky vlerësim?

Është vlerësimi më i çmuar, për sa i përket suksesit të një kënge!

- Kë veçoni si bashkëpunimin më të frytshëm?

Bashkëpunimi më i frytshëm dhe më i suksesshëm që kam pasur ndonjëherë është bashkëpunimi me grupin "Troja"! Kënga që kemi realizuar ne është e gjitha në version anglisht! Titullohet "Beautiful World" dhe ju këshilloj që ta dëgjoni, sepse është një këngë e kompletuar, me tekst dhe mesazh të fortë!

- Mendimi juaj për festivalet muzikore që organizohen në Shqipëri?

I vlerësoj të gjitha festivalet që organizohen në Shqipëri, sepse tashmë kanë një traditë shumëvjeçare!

- Po në Kosovë?

Në Kosovë fatkeqësisht organizohen pak festivale!

- Lidhja juaj me Tiranën?

Fatmirësisht lidhja ime me Tiranën është jashtëzakonisht e fortë! Më lidhin shumë kujtime të bukura! Tirana ishte vendi ku unë linda artistikisht. Tirana më ka dhuruar një përkrahje të madhe në të gjitha aspektet që një artisti i duhet!

- Karriera juaj ka nisur që në moshën 13-vjeçare. E mbani mend atë moment?

Është momenti i vetëm i paharruar për mua! E kujtoj me kënaqësi gjithmonë.

- Përveç muzikës, ju i jeni përkushtuar dhe shkollës në degën Ekonomik. Sa të vështirë e keni të jeni në koherencë me të dyja këto degë?

Është me të vërtetë një vështirësi e madhe, duke qenë se janë me të vërtetë dy degë shumë të ndryshme, mirëpo falë përkushtimit dhe vullnetit që kam mundohem t’ia arrij! Gjithmonë më ka interesuar të bëj gjëra të ndryshme, pse jo të kem njohuri për diçka më tepër!

- A i mbetet kohë e lirë Flakës?

Jo edhe aq shumë.

- Dhe ku e kaloni atë?

E gjitha varet nga momenti dhe vendi ku jam në atë kohë të lirë!

- Motoja, me të cilën e nisni ditën?

Qeshni sa më shumë!

- Çfarë vlerësoni më shumë tek vetja?

Kujdesin që kam ndaj të tjerëve dhe origjinalitetin tim!

- Ku ngjasojnë dhe ndryshojnë jeta e natës në Tiranë me atë në Prishtinë?

Mendoj që të dyja janë të njëjta, pasi janë metropole!/gameove