Shqipëria ia del, merr 4 pikë në dy ndeshje

UPDATE- Në dy ndeshja Shqipëria ia ka arritur që të grumbullojë 4 pikë, duke nisur eleminatoret 'Euro 2012' në mënyrën më të mirë të mundshme. Përfaqësuesja jonë ka arritur të mposhtë modestët e Luksemburgut, me rezultatin 1:0, me një gol të shënuar nga Hamdi Salihi në minutën e 37'. Me një lojë bindëse dhe më ofensive, Shqipëria i ka kënaqur sot tifozët e shumtë që mbushën shkallët e stadiumt 'Qemal Stafa". Që nga minuta e parë Kuzhe ka hedhur në fushë, Beqaj, Dallku, Cana, Curri, Agolli, Bulku, Duro, Skela, Salihi, Muzaka, Bogdani, ndërsa vetëm në pjesën e dytë kanë ardhur zëvendësimet. Muzaka i ka lënë vendin Jahmir Hykës, ndërsa Klodian Duro, Andi Lilës. Pas kësaj ndeshje Shqipëria është në krye të grupit me pikë të barabarta bashkë me Bjellorusinë. Ndeshjet e tjera të grupi kanë përfunduar Bjellorusi - Rumani 0:0, ndërsa ndeshja tjetër mes Bosnie Hercegovinës dhe Francës është me rezultatin 0:0, ndërsa luhet minuta e 55.


**************************************************


Një prej lojtareve me te rendesishem te kombetares se Shqiperise, mbrojtesi i Gallatasaray, Lorik Cana ndihet optimist për një fitore në takimin e rradhes kualifikue me Luksemburgun, por kërkon kujdes nga skuadra. " Duhet te tregojme kujdes ndaj Luksemburgut pasi është skuadër që mbrohet shumë dhe luan e tërhequr. Unë mendoj që dhe ndeshjet miqësore që kemi zhvilluar me ekipe si Luksemburgu, që janë të tipit Andora e ndonjë tjetër do të na ndihmojnë për ndehshjen e sotme për të marrë një rezultat pozitiv. Ne duhet ta fitojme kete ndeshje dhe jam optimist se skuadra do te tregoje vlerat e saj per te arritur nje rezultat pozitiv", perfundoi Lorik Cana

***************************


Portieri i sapo rikthyer i kombëtares shqiptare, Arian Beqaj, është shprehur se barazimi 1-1 ndaj Rumanisë ishte një rikthim i mrekullueshëm për të.
Megjithatë gardiani i portës së kombëtares ka thënë se kuqezinjtë duhet të qëndrojnë me këmbë në tokë pas këtij rezultati pozitiv dhe nuk duhet të pushtohen nga euforia.
"Ky rikthim ishte i mrekullueshëm. Por duhet të kemi kujdes me këtë luks që po na duket pas barazimit ndaj Rumanisë. S'duhet të kapemi nga euforia. Herët për të folur për objektivat. Tani duhet të marrim sa më shumë pikë duke luftuar nga ndeshja në ndeshje", ka thënë Beqaj pas takimit me Rumaninë.
Ndeshja e radhës për Shqipërinë është ajo ndaj Luksemburgut e cila zhvillohet të martën më 7 shtator në stadiumin Qemal Stafa në Tiranës.


***********************


Dinamoviti shënon golin e barazimit për Shqipërinë duke fiksuar rezultatin në 1-1. Kuqezinjtë nisin me këmbë të mbarë aventurën europiane


Shqipëria e nisi aventurën e saj të 11-të në kampionatet europiane me një barazim historik 1-1 në Rumani, ndaj një skuadre ndaj së cilës nuk merrnin një rezultat pozitiv qysh prej 23 tetorit të vitit 1949, kur edhe atëherë kishim barazuar po 1-1 (gol i Pal Mirashit). Kjo është nisja e tretë pozitive në Europiane pas barazimeve 1-1 me Zvicrën për Euro 2004 (në Tiranë, trajner Dosena) dhe 2-2 Bjellorusinë për Euro 2008 (në Minsk, trajner Oto Bariç).


Nga ana tjetër, kjo është ndeshja e pestë radhazi që Shqipëria e nis me rezultat pozitiv një fushatë ndërkombëtare, duke futur në këtë llogari edhe fitoren 2-1 kundër Greqisë për Botërorin 2006 (trajner Hans Peter Brigel) dhe barazimin 0-0 me Suedinë për Botërorin e vitit 2010 (trajner Ari Han).


Golit të minutës së 80-të të Rumanisë të realizuar nga zëvendësuesi Bogdan Stançu, iu kundërpërgjigj në minutën e 87-të një tjetër zëvendësues Gjergji Muzaka, në të parin gol të tij zyrtar me Kombëtaren. Fitorja e pritshme e 7 shtatorit në "Qemal Stafa" kundër Luksemburgut modest do të na çojë në kuotën e katër pikëve, përpara se të përballemi me Bosnjën në 8 tetor, por që ajo vetë do të vijë nga sfida e fortë me Francën.


Pjesa e parë


Trajneri Kuzhe rreshtoi një Shqipëri me karakter të theksuar mbrojtës, madje me gjashtë, nëse dhe Lorik Canën dhe Debatik Currin, do ta konsideronim të tillë, ndërkohë që Bogdani ishte i vetmi në sulm, i mbështetur nga kapiteni Ervin Skela dhe Klodian Duro. Një start, që prodhoi qysh në minutën e parë një rrezik të jashtëzakonshëm për portën tonë, kur rumunin Ciprian Marica nga shumë afër goditi shtyllën e djathtë pingule të portës së mbrojtur nga Arjan Beqaj.


Momenti i dytë i vështirë për portën tonë erdhi në minutën e 12-të, kur Beqaj priti në dy kohë (por pa rrezikuar), një gjuajtje nga jashtë zonës të Mirel Radoit. Goditja e parë e Shqipërisë drejt portës rumune të mbrojtur nga Lobont u fiksua në minutën e 14-të, kur Ansi Agolli lëshoi nga larg një silurë, por jashtë kuadratit.


Shqipëria e barazpeshoi lojën në njëzet minutat e para, duke u rreshtuar mirë në mesfushë, dhe përveç rastit të minutës së parë, Rumania nuk pati ndonjë rast të artë për të shënuar. Në minutën e 24-t, një pasiguri e mbrojtjes sonë i dha mundësi mesfushori të Shalke 04, Ciprian Deac të shënjestronte portën tonë me një gjuajtje brenda zonës, por Beqaj, në gatishmëri, e devijoi topin në goditje këndi.
Pjesa e dytë


Në minutën e 53-të, Ciprian Marica shënoi për Rumaninë, por gjyqtari austriak Shërgenhofer e anuloi golin për pozicion jashtë loje. "Koincidencë", anësori ishte shqiptaro-austriaku Alain Hoxha. Dy trajnerët ishin mesa duket në një mendje për zëvendësimet, pasi si Razvan Luçesku ashtu dhe Josip Kuzhe i bënë ndërrimet në të njëjtën minutë, 56'.


Mureshan zëvendësoi veteranin Kontra dhe Salihi hyri në vend të veteranit Bogdani. Në të 64', Luçesku i pakënaqur nga forma e të tijve, realizoi zëvendësimin e dytë, duke hedhur në fushë Stançu në vend të Nikuale.


Në të 64', Ansi Agolli u shndërrua në shpëtimtarin e madh të Shqipërisë kur hoqi një top që dukej se do të kalonte vijën e portës, madje i vështruar nga afër nga Marika. Një rast i madh goli për Rumaninë, por i shpërdoruar keq. Ansi Agolli në vijën fundore të sulmit tonë harkoi brenda zonës për Hamdi Salihin dhe sulmuesi shqiptar rrezikoi seriozisht portën rumune në minutën e 73-të. Rasti i parë i Shqipërisë për gol.


Por në minutën e 80-të Rumania prodhoi golin e shumëpritur. Goditje nga këndi të ekzekutuar nga Deac, topi mbërriti në zonë dhe aty në rrëmujë e sipër zëvendësuesi Bogdan Stançu i Steausë së Bukureshtit gjunjëzoi nga afër Arjan Beqajn. 1-0 për Rumaninë. Për Shqipërinë luhet edhe letra e fundit, dinamoviti Muzaka, i cili është edhe shpëtimtari i natës për kuqezinjtë.


Në të minutën e 87-të, Ansi Agolli realizoi një goditje të lirë nga rreth 30 metra, sfera mbërrin në zonën rumune, dhe aty Gjergji Muzaka me një kërcim madhështor mposhti tre mbrojtës të Rumanisë, përfshirë dhe portierin Lobont. 1-1. Vetëm tri minuta më pas, Salihi ndërmori një inkursion drejt zonës rumune, por goditja e tij u prit në dy kohë nga Lobont.


*********************************

UPDATE- Shqipëria i ka nisur me barazim eleminatoret e Euro 2012, me një lojë jo shumë bindëse. Pjesa e parë është mbyllur me rrjeta të paprekura, ndërsa është dashur pjesa e dytë që të shënoheshin gola. Kanë qenë rumunët që kanë kaluar në avantazh të parët, rezultat i cili nuk ka zgjatur shume minuta. Muzaka i futur në lojë në pjesën e dytë, si zëvendësues i Klodian Duros, pas një krosimi të Hansi Agollit në zonë, me kokë ka shënuar golin e barazimit vetëm 3 minuta nga fundi i kohës së rregullt.

Ndërkaq të marten, kombëtarja do te prese në Qemal Stafa, Luksemburgun


Europianët e Shqipërisë në shifra
Shqipëria do të nisë sot, kundër Rumanisë, për herë të 11-të aventurën e saj në eliminatoret e një Kampionati Europian, pavarësisht se ai i Euro 2012 është i 14-ti për nga radha, kjo pasi në tre fushata kualifikuese: 1960, 1976 dhe 1980, Kombëtarja jonë (për arsye të ndryshme, edhe politike) nuk ka marrë pjesë. Shqipëria ka luajtur kundër 26 ekipeve kundërshtare. Nga 73 ndeshje të zhvilluara, Shqipëria ka mundur të fitojë vetëm 10 prej tyre. 17 takime janë mbyllur në barazim, ndërkohë që kemi humbur 46 ndeshje. Shqipëria ka shënuar 55 gola, ndërsa ka pësuar 140 gola. (Në eliminatoret e Botërorëve, Shqipëria ka këtë bilanc: 83 ndeshje; 11 fitore, 11 barazime, 62 humbje).

**************************************


"Shqipëria, kundërshtarja e Francës në eliminatoret e Euro 2012-s, është një ekip solid në mbrojtje, por transparent në sulm". Ky është thelbi i një shkrimi të botuar në faqen zyrtare të FIFA-s mbi kombëtaren shqiptare të futbollit.
"Trajneri kroat, Josip Kuzhe, duke dashur të marrë maksimumin e mundshëm nga objektivi i skuadrës që drejton, duke parë që edhe se rezultatet në nivelin europian dhe botëror kanë qenë shumë modeste, ka aplikuar një lojë shumë mbrojtëse. Të paktën gjashtë lojtarë të formacionit bazë, Cana, Dallku, Curri, Vangjeli, Lila dhe Bulku mbulojnë vetëm mbrojtjen. Katër të parët luajnë në linjën përpara portierit titullar Beqaj, ndërkohë që Lila dhe Bulku janë mesfushorë mbrojtës, por që shohin pak drejt sulmit", - thuhet në këtë artikull.
Sipas FIFA-s, problemi më i madh i formacionit shqiptar është sulmi dhe gjallëria ofensive. "Mesfushorët sulmues dhe sulmuesit kanë qenë gjithmonë në problem madhor për formacionin shqiptar. Por dhe vetë lojtarët e përfaqësueses rrallë ia kanë dalë të përshtaten në ekip dhe të ndërtonin një profil sulmues që do të bënte të shpresonin për rezultate më të mira".
Titullarët kuqezinj, Skela, Duro dhe Bogdani, janë tashmë të moshës nga 32 deri në 34 vjeç dhe luajnë shumë pak ose aspak në klubet e tyre respektive, vetëm pak ditë larg një cikli të ri të kompeticionit, ç'ka nuk premton për një të ardhme ofensive në përfaqësuese. "Me gjithë eksperiencën e tyre me përfaqësuesen, këta lojtarë janë në fund të karrierës së tyre ndërkombëtare, sepse luajnë pak me klubet respektive. Megjithatë, ata përfaqësojnë problemin më të madh në ekipin shqiptar, me një organizim jo aq të gjallë në lëvizshmërinë ofensive. Por, ekipi shqiptar është i aftë që, në ditët e tij të mira, të shkaktojë surpriza. Për të vënë në dukje janë fitoret kundër Rusisë dhe Gjeorgjisë dhe barazimet kundër Zvicrës dhe Irlandës, po kështu pathyeshmëria e shqiptarëve në shtëpi gjatë eliminatoreve të Euro 2004-s. Në shtator të vitit 2004, ekipi kombëtar mundi Greqinë në Tiranë, me rezultatin 2-1. Greqia ishte kampione e porsakurorëzuar e Europës. Gjatë eliminatoreve të Botërorit 2010, shqiptarët morën një barazim 0-0 në Portugali (në tetor të vitit 2008)."

*********************************


Shtypi rumun nuk kishte si të mos kontaktonte me një yll shqiptar, që ka luajtur në kampionatin e vendit të tyre, Sulejman Demollarin, para ndeshjes eliminatore të 3 shtatorit. Për të marrë mendimin e tij në lidhje me pritshmëritë e verdiktit të kësaj sfide, bazuar në forcat reale të të dyja palëve. Dhe Demollari, një njohës i mirë i futbollit rumun, por edhe atij shqiptar, natyrisht, duke qenë edhe trajner i kombëtares kuqezi U-15, nuk ka ngurruar të qëmtojë situatën, duke dhënë mendimin e vet. I cili shkon në anën e Rumanisë, si favorite për ta fituar ndeshjen e parë eliminatore në grup me Shqipërinë. Në sintezë të fjalëve të ish-lojtarit të Dinamos së Bukureshtit, Sulejman Demollari, është vlerësimi: "NE JEMI TË DOBËT, SI NË VITIN 2007, KUR NA KENI MUNDUR ME REZULTATIN E THELLË 6-1!"
- Le të flasim pak për ndeshjen Rumani-Shqipëri. Përpara kemi ndeshjen mes dy kombëtareve tona...?
- Hmm, një ndeshje shumë e vështirë për ne. Duhet ta pranoj, Rumania ka një ekip shumë më të fortë se Shqipëria. Por, siç e dini, në futboll çdo gjë mund të ndodhë.
- Vërtet ju duket e fortë Rumania aktuale?
- Po, sepse ka lojtarë që në planin individual janë më shumë si numër se tanët, por kanë edhe vlera më të mëdha. Ju keni Mutunë, por a është rikthyer në kombëtare?
- Jo, akoma, pas rreth një muaji pezullimi i tij përfundon...
- E pra, edhe kështu, pa Mutunë, edhe pse ai ishte numri një, sa i takon rrezikut që sjell, Rumania është ende ekip më i fortë se yni, këtë duhet ta pranoj.
- Cilin ekip shihni më favorit në grupin tonë kualifikues?
- Natyrisht, Francën. Pastaj, sipas mendimit tim, vjen Rumania.
- Na e bëni pak "spiunin" shqiptar për këtë ndeshje...
- (Qesh) Unë po ju them disa të fshehta të vogla. Fjala vjen, ne kemi një trajner kroat, shumë ambicioz, që kanxitur shumë lojtarë të rinj nga kombëtarja U-21.
- A ka vend për t'u përsëritur "cirku" i ndeshjes së fundit mes nesh, rezultati 6-1?
- Edhe nga kjo gjë duhet të kemi frikë.
- A keni ndonjë lojtar, i cili mund të jetë vendimtar në kombëtaren shqiptare?
- Po, Lorik Cana, lojtar i Gallatasarajit. Ka lindur në Kosovë, por përfaqëson prej disa vitesh Shqipërinë.
- Trajneri ynë është Razvan Luçesku. E njihni ndopak?
- Oh, vërtet, ai tani është trajneri juaj? Kam një mendim të mirë për të. Ishte një djalë inteligjent në këtë sport, kjo dukej që kur unë isha lojtar i Dinamos së Bukureshtit.
- Shqipëria do të kërkojë hakmarrje pas humbjes së thellë 6-1 në Rumani?
- Unë nuk dua ta kujtoj atë ndeshje, që për mua ishte më shumë "cirk". Nuk dua të flas vërtet për atë lojë, sepse nuk e di çfarë ndodhi në të vërtetë.
- Por, na thoni diçka. Shqipëria e tanishme a është më e fortë se e asaj humbjeje të thellë?
- Jo, në asnjë mënyrë. Asokohe kombëtarja shqiptare ishte më e mirë.
- Tani çfarë po bëni?
- Punoj në federatë, në Tiranë, drejtoj kombëtaren U-15 të Shqipërisë.