Rasmusen, shefi i ri i NATO-s. Mesazh nga Presidenti Topi

Ish-kryeministri danez, Anders Fog Rasmusen mori sot postin e Sekretarit të Përgjithshëm të NATO-s nga Jap de Hop Shefer, i cili largohet nga ky funksion pas përfundimit të mandatit 5-vjeça. Sekretari i sapoemëruar do të përballet me shumë çështje të hapura si drejtimi që po merr Aleanca dhe roli i saj.

Një nga detyrat e tij të para do të jetë misioni i NATO-s në Afagnistan, i cili deri tani nuk ka dhënë rezultate të kënaqshme. Mes çështjeve të hapura do të jenë edhe marrëdhëniet me Rusinë në kuadër të Këshillit Rusi - NATO.

Ndër prioritet e Rasmusenit renditen marrëdhëniet me Moskën, pas ftohjes që vijoi për shkak të luftës së vitit të kaluar në Osetinë e Jugut. Rasmusen, si shef i ri i Aleancës ushtarake, do të udhëheqë procesin e uljes së numrit të ushtarëve të NATO-s në Kosovë, ndërsa një nga çështjet me të cilat do të merret do të jetë edhe angazhimi i vendeve të Ballkanit Perëndimor për tu bërë anëtare të Aleancës.

Sfidë për shefin e ri të NATO-s do të jetë edhe zgjerimi i Aleancës me ish-republikat sovjetike Ukrainën dhe Gjeorgjinë.


Urimi i Presidentit te Shqiperise, Bamir Topi

Presidenti i Republikës, Bamir Topi i drejtoi sot një mesazh urimi Sekretarit të Përgjithshëm të Aleancës së Atlantikut të Veriut, Anders Fog Rasmusen, me rastin e marrjes së detyrës së re. Në mesazh Kreu i shtetit pasi i shpreh urimet për suksese në këtë mision angazhues e domethënës, e siguron z. Rasmusen se Shqipëria si anëtarja më e re e Aleancës do të kontribuojë në mbrojtjen e vlerave të lirisë dhe paqes në botë.

"Populli shqiptar dhe Shqipëria, anëtarja më e re e kësaj Aleance, janë të vendosur të kontribuojnë maksimalisht për arritjen e vlerave dhe objektivave të përbashkëta në mbrojtje të lirisë, paqes dhe stabilitetit afatgjatë, rajonal e global, dhe të përgjegjshëm për të qenë aleatë të denjë dhe miq të sigurt të të gjitha vendeve anëtare të NATO-s", thuhet në mesazhin zyrtar të Presidentit Topi.