Të shkruash për dashurinë në kohën e sms-ve!

Në një shoqëri globale, ku teknologjia ka zënë vendin kryesor, edhe gjërat në dashuri kanë ndryshuar. Tashmë flitet për një Kupid të ri modern.

Nuk ka nevojë të ju tregoj emrin tim. Kur mund të takohemi? Si t’ia bëj që të njoh? Fjali të tilla dikur ishin të famshme. Kur njerëzit nëpërmjet internetit takoheshin, njiheshin dhe dashuroheshin. Gjithashtu kjo vlen për sms-t e famshme të dashurisë. Mesazhet në telefon janë bërë gjuha e vërtet e dashurisë, seksit apo dhe joshjes. “Të dua” tashmë merr tjetër dimension kur dërgohet me një mesazh, ndërsa shkruhen fraza të tëra nga më të magjishmet. Sa poemat e Shekspirit me ato mijëra sms që qarkullojnë çdo minutë, orë, ditë nëpër botë, do të dukeshin të thata e boshe. Kupidi i ri i dashurisë janë sms-t, ato të vijën kur nuk i pret dhe të ndryshojnë ditën qoftë edhe me një fjalë.

Nëse dikush nga ju do të thoshte se sms-t nuk e kanë vlerën e letrave apo afërsisë, gabohet. Sepse sot mund të jesh në një cep të botës e mos të jesh vetëm, pa të dashurin, mjafton një sms, një telefonatë e të përjetosh të njëjtin pasion, të shuash mallin dhe ta kesh po aq pranë. Gjithashtu një sms t’i lehtëson punët për të qenë një “Romeo” apo “Zhulietë”, ti mund të shprehesh aq lirshëm me një sms, sa sigurisht që nuk do ta kishe marrë guximin ta bëje këtë kur ta kishe njeriun që dashuron përballë, natyrisht përjashtohen “don zhuanët’. Nëpërmjet sms-ve ne japim premtime, ne flasim se çfarë shkon dhe nuk shkon në lidhjen tonë, ne flasim gjithçka. Ja një ndër tekstet e dashurisë sms më të famshme që bën xhiro nëpër internet.

“Dashuria është si dielli.

Ajo sjell një shkëlqim të artë për t'u përballur me të dhe një ndjenjë të ngrohtë që të përshkon gjithë trupin. Dashuria zgjon shpirtrat dhe të hap sytë. Dhe kur ajo mbaron, lë mbrapa miliarda kujtime të vogla që quhen yje. Për t’i kujtuar botës se ajo ende ekziston. Koha ka kaluar, por dashuria ime për ju nuk do të përfundoj kurrë. Ti je dashuria ime e parë dhe e fundit”.

Cili poet apo shkrimtar nuk do t’i kishte zili këto fjalë të thjeshta që kanë dalë nga një zemër e lënduar në dashuri?! Dhe cila femër apo mashkull nuk do të dashurohej sërish nëse këto vargje do t’i dedikoheshin?!

Kjo është që në këtë kohë të shkruash, të flasësh, të dashurosh në kohën e sms-ve.