“Veshje tradicionale shqiptare” në Zvicër

Libri pasqyron pamje me veshje të shumta që i kanë rezistuar kohës dhe që janë ruajtur më shumë nga femrat duke ruajtur edhe identitetin e popullit.

Në Gjakovë është ribotuar vepra me interes për trashëgiminë tonë kulturore “Veshje Tradicionale shqiptare”. Rëndësia e këtij libri përmes pasqyrimeve me pamje artistike dhe faktografike janë pikërisht veshjet që janë bartur për shumë shekuj nëpër trojet shqiptare. Pas një botimi që e kishte mbështetur komuna e Gjakovës vepra në 300 kopje është ribotuar edhe nga Ministria e Kulturës me qëllim që të plasohet jashtë Kosovës. Për t’i dhënë rëndësinë më të madhe, nesër do të promovohet edhe në Delamond të Zvicrës, organizuar nga Lidhja e Arsimtarëve dhe Prindërve Shqiptar. Redaktori i librit, Engjëll I. Berisha, ku do të paraqesë fjalën e rastit, thekson se “ashtu si të gjithë popujt e botës edhe shqiptarët, ndonëse të vogël në numër, e kanë këtë begati kulturore. Me kohë u krijuan edhe tipet etnike të veshjeve popullore shqiptare. Shijet estetike të përdorura për zbukurim, por edhe mënyra e stilimit janë ato që pasqyrojnë veçanti etnike. I gjithë zhvillimi i veshjeve është i lidhur ngushtë me historinë e zhvillimit te kjo popullsi, por duke iu nënshtruar edhe pasojave me vetë historinë e këtij popullit”.

Libri pasqyron pamje me veshje të shumta që i kanë rezistuar kohës dhe që janë ruajtur më shumë nga femrat duke ruajtur edhe identitetin e popullit. Më shumë dominon veshja nga Dukagjini, Drenica, Shkodra dhe Dibra. Kështu, kolazh veshjesh paraqesin në këtë libër trashëgiminë tonë ndër shekuj. Sipas një hulumtimi të bërë nga kompania “Borafashion” në Kosovë janë bartur afro 200 lloje veshjesh duke u transformuar nëpër kohë dhe duke ndërruar pamjen nëpër treva. Në këtë promovim, do të marrë pjesë edhe ministri i kulturës, Valton Beqir, krijuesi Agim Vinca, redaktori i librit Engjëll I. Berisha, akademiku i fotografisë Shkelzen Rexha dhe autorja Bora Balaj, etj.