Një tripikësh e bën Partizanin pretendent

Të kuqve nuk u bën përshtypje ecuria e debutuesve të Mamurrasit, por kërkojnë të jenë vetvetjaPërgatitjet e të kuqve për ndeshjen me Mamurrasin janë në vazhdën e përballjeve të mëparshme, ku dihet se grupi nuk i ka kushtet për të bërë një stërvitje normale. Fitorja me Gramozin dhe barazimi në Berat kanë bërë të mundur që grupi të jetë i plotë në aspektin moral dhe shpresohet që kjo frymë të ruhet edhe ndaj Mamurrasit. Kundërshtari i së dielës është i panjohur për Partizanin, pasi Mamurrasi është debutues në kategorinë e parë dhe në 9 javë ka arritur rezultate të paparashikuara në fillim. Deri para dy javësh situata në kampin e kuq ishte e tillë sa ekipi ishte kandidat real për të rënë. Por tani të kuqtë kanë oreks dhe me ritmin e kapur kërkojnë të bëhen pretendentë për një biletë në kategorinë superiore. “Kam deklaruar që para ndeshjes me Gramozin që Partizani do të vijë dhe është vetë emri që bën diferencën në këtë kategori. Vijmë pas dy rezultateve pozitive, por ato i kemi arkivuar dhe të dielën do të synojmë vetëm fitoren. Për Partizanin pak rëndësi ka emri i kundërshtarit, sepse ata të gjithë njëlloj janë. Mamurrasi vërtet i ka bërë një nisje të mirë sezonit, por them se përballja e parë mes dy ekipeve do të jetë i Partizanit dhe ne si skuadër nuk duhet ta diskutojmë tripikëshin,”- u shpreh për “Sportin shqiptar” mbrojtësi Besmir Berberi. Sipas mbrojtësit Indrit Hithi, në kategorinë e parë nuk ka diferenca të mëdha mes ekipeve, kështu që Partizani duhet ta marrë tripikëshin e radhës dhe të mbajë gjallë shpresën për një rikthim në superligë. “Askush nuk e kishte menduar para dy javësh se Partizani do të merrte 4 pikë në përballjet me Gramozin dhe Tomorin, kjo për faktin se kundërshtarët tanë kanë bërë investime të mëdha. Ndonëse ekipi ka problemet e tij, përsëri ndihemi gati për ndeshjen me Mamurrasin dhe fitorja është i vetmi rezultat që na kënaq. Me një një tripikësh Partizani hyn në vallen e pretendentëve dhe shpresoj që kjo gjë të realizohet, pasi ekipi po pëson ngritje nga java në javë,”- pohoi mbrojtësi Indrit Hithi.