Inspirimi i Erion Korinit

I duket sikur është zgjuar nga një ëndërr e keqe dhe e ka lënë pas krahëve të shkuarën e tij. Pas katër vitesh mungesë, këngëtari i njohur realizon një këngë baladë me titull sa intrigues, aq dhe shpërfillës, “S’meriton as të urrehesh”. Një reflektim artistik i frymëzuar dhe nga historia e dashurisë së tij, që mori fund shumë zhurmshëm. Kjo këngë u dedikohet të gjithë atyre që s’dinë ç’është dashuria e vërtetë, e në çdo kohë dinë të dhurojnë vetëm dhembje.

Erion, sapo ke realizuar një këngë të re me titull “S’meriton as të urrehesh”, i referohesh dikujt me këto vargje?

Kuptohet nga titulli, pavarësisht se fjalët janë të Arben Dukës, se unë i kam kënduar me dëshirë të madhe ato vargje duke ua dedikuar gjithë njerëzve me shpirt të kalbur, atyre që s’njohin dashuri, atyre që dinë të dhurojnë veç dhembje, atyre që njohin vetëm artin e shitjes së trupit dhe shpirtit. Dhe nuk dua ta personalizoj si temë këtë këngë, sepse me njerëz si këta, Shqipëria dhe bota është mbushur plot, është fakt që e vuajnë të gjithë.

Kjo këngë është realizuar këta muaj, pas zhurmës mediatike në lidhje me një incident me ish-të dashurën tuaj. Ka lidhje me atë histori?

Nuk mund të them që s’ka lidhje me atë çka më ndodhi, por unë mora iniciativën ta publikoj, sepse histori të tilla janë me qindra ditët e sotme në vendin tonë e kudo.

Shumë zhurmë dhe komente për ty, gazetat shkruan pa fund në lidhje me tipin dhe karakterin tuaj, pra një Erion tjetër…

Ju garantoj dhe ju betohem që ishin shpifje të shëmtuara dhe më vinte keq kur dëgjoja të flitej për një Erion që askush nuk e njihte për të tillë. Më vjen keq që njerëz të ligj mezi presin ngjarje të tilla për ta bërë fatkeqësinë e tjetrit shilarës, ku koloviten me buzëqeshjet e tyre ironike ... Unë kam qenë dhe jam një njeri që dua dhe përpiqem të jetoj në harmoni me atë çfarë më rrethon. Por ndodh në jetë të njihesh me njerëz të kamufluar, të cilët na bëjnë keq dhe na bëjnë të dalim nga vetvetja ...

Çfarë ishte ajo që ndodhi mes teje dhe ish-të dashurës? Si do e komentoje tani?

Ajo që më ndodhi mua ishte tragji-komedi, njeriu që thoshte “shteti s’duhet të lërë të lirë këta kriminelë”, ishte me vetë kriminelin me pushime, vetëm 15 ditë pas ngjarjes. Por besoj se njerëzit tashmë janë mësuar me disa media që nuk ngurojnë të shpifin e të abuzojnë me jetën e njerëzve dhe kjo për qëllime të caktuara…

Si u sollën miqtë këngëtarë, pati nga ata që u larguan ty?

Miqtë e mi? Ata ishin aty me mua çdo sekondë, çdo minutë, e ndjenin që kisha nevojë për mbështetjen e tyre dhe nuk u larguan asnjëherë nga unë dhe çuditërisht, në ato kohë unë kuptova se ajo që s’më ka munguar asnjëherë është miqësia e mirë. I falënderoj të gjithë për fjalët e mira që më kanë thënë, ndërkohë që u kërkoj dhe falje për shqetësimin që u solla.

Çështja me ish-të dashurën është mbyllur tashmë në prokurori. E falët njëri-tjetrin vërtet?

Jo, çështja ka kohë që është mbyllur, që në shtator. Ishte e vetmja gjë e mirë që bëri personazhi në fjalë.

Shumë nga komentet e ish-të dashurës ishin që jeni tip xheloz. Ç’mund të thoni për këtë?

Ju thashë njëherë që ishin të gjitha shpifje. Këtë gjë e di mirë dhe shoqëria e asaj që akuzonte për gjëra të tilla. Po sinqerisht, nuk kam dëshirë të flas më në lidhje me atë person, normal ajo ka jetën e saj dhe kërkon privatësinë, ashtu si unë dhe çdo njeri tjetër… Ndërrojmë temë ju lutem?!

Atëherë, si i ke kaluar këta gjashtë muaj pas zhurmës mediatike?

Më duhej një pushim i gjatë, edhe pse me pasoja ekonomike, sepse dikush që largohet kaq gjatë nga tregu muzikor, i humbet reklamacioni dhe normal që reklama është shpirti i biznesit, por unë vazhdoja kontaktet me studiot dhe përgatitesha për një rikthim të mirë. Pavarësisht se tregu muzikor vazhdon të jetë rrëmujë dhe i paqartë, unë do përpiqem të bëj më të mirën nga ana ime … Zërin e kam mbajtur në punë vazhdimisht, duke kënduar “live” në shumë klube në Tiranë apo me ftesat që kam pasur jashtë Shqipërisë. Mendoj se materialet që do të sjell në vazhdim do të jenë ndryshe nga ç’kam bërë dhe jam i sigurt që do të pëlqehen, sepse impaktet e para kanë qenë shumë pozitive në lidhje me materialet që po punoj.

Ndërkohë, sapo keni realizuar klipin “S’meriton as të urrehesh”. Kjo është kënga e parë pas katër vitesh mungesë në skenë. Pse kaq gjatë?

Asnjëherë nuk kam qenë dhe nuk do të jem pjesë e kompromiseve, nuk ka gjë më të shëmtuar për një artist të vërtetë, që një prodhim artistik e shpirtëror siç është kënga, ta lërë në dorë të atyre që do e përdorin për interesa të rëndomta një vepër artistike. Edhe kur kam pasur këngë të bukur në festival, asnjëherë nuk kam bërë kompromise dhe asnjëherë nuk jam përpjekur të vlerësohem në mënyra të çuditshme, siç bëjnë shumë “këngëtarë” sot, të cilët e mbushin sallën me kushërinj, vetëm e vetëm që të marrin . Ky është turp! Këta e bëjnë pis këngën.

Mesa dimë, këngën e re po e bën klip. Mund të na tregosh detaje për klipin?

Po, këngës së re po i bëj një klip, është e vërtetë, por klipi do të jetë shumë modest, sepse e vetmja gjë që dua të nxjerr në pah është zëri dhe kënga. Atyre që u mungojnë elementë të tillë shpenzojnë mijëra euro për të nxjerrë një figurë të bukur e asgjë më shumë. Klipi harrohet, kënga ngelet gjithmonë.

Pak këtij rikthimi, si do të vazhdojë karriera jote, ke plan të realizosh këngë të tjera, ndonjë album apo të konkurrosh në festivale?

Karriera ime sapo ka njohur një kthim pozitiv dhe normal që do të vazhdojë, sepse e vetmja dashuri e madhe e jetës sime është kënga. Jam duke punuar këngë të tjera dhe midis tyre dhe dy materiale, të cilat janë duke m’i punuar një grup anglez, ndaj dhe unë shpresoj që të dalë një bashkëpunim i suksesshëm.

Po t’u rikthehesh konkurrimeve, e ke menduar?

Sa për pjesëmarrjen në festivale, tani për tani nuk e mendoj, nuk më pëlqen ideja e të rreshtuarit si dele nëpër konkurrime midis këngëtarëve të tjerë. Këngëtarët kanë të drejtë të zgjedhin vetë se ç’do bëjnë me këngët e tyre, por mua s’më pëlqen të jem thjesht një element mbushës i një makinacioni të paramenduar siç janë festivalet, ku dihet që çmimet janë të mjegulluara dhe ndahen pa filluar gara. Bota i mbledh artistët vetëm për t’i ndarë çmimet dhe jo për t’i vënë në garë me njëri-tjetrin.

Dhe nëse i rikthehemi dhe njëherë konfliktit të shumëpërfolur, tashmë të ndodh të paragjykohesh nga femrat?

Ajo që ndodhi ishte antireklamë e çuditshme, sepse m’i ka afruar më shumë femrat. Shaka! Ajo ishte diçka vetëm midis meje dhe dikujt tjetër dhe me sa kam parë, askush nuk e ka përgjithësuar opinionin e një personi të vetëm.

Je duke jetuar ndonjë histori të re dashurie dhe tashmë je bërë më i kujdesshëm apo më i shpërfillur?

Kam bërë shumë njohje të reja kohët e fundit, por mendoj se është shpejt të flasësh për një lidhje të vërtetë. Më duhet t’i kushtoj shumë vëmendje këngës këto kohë.