Xhesika Berberi: Nuk do të pozoja kurrë nudo

Xhesika Berberi e kurorëzuar si “Miss Universe Albania”, vjen në një rrëfim për gazetën Trafik Vip duke treguar emocionet që e kanë shoqëruar gjatë gjithë karrierës së saj si modele… Bukuroshja shqiptare e cila do të na përfaqësojë në konkursin “Miss Universe” premton se do të bëjë të pamundurën për të dhënë më të mirën e Shqipërisë në këtë kompeticion. Ndërkaq të tjera pyetje marrin përgjigje nga goja e më të bukurës së universit shqiptar. Le të zbulojmë bashkë se çfarë mendon Xhesika për konkurrenten e saj nga Kosova, Afërdita Dreshajn, si dhe shumë gjëra të tjera…

Xhesika përshëndetje!

Si fillim të përgëzojmë për çmimin dhe lidhur me këtë natyrshëm na vjen pyetja, si ndihesh tani që je mbretëreshë e bukurisë?

Natyrisht që ndihem mjaft e lumtur, pasi do të përfaqësoj Shqipërinë në kompeticionin më të madh të bukurisë ndërkombëtare.

Siç e the edhe do të përfaqësosh vajzat shqiptare në një kompeticion shumë të rëndësishëm botëror, çdo të thotë kjo për ty?

Është një nder tepër i madh për mua dhe sigurisht shpresoj që ta përfaqësoj sa më denjësisht bukurinë shqiptare. Pjesëmarja në këtë event mund të ndodhë vetëm një herë në jetë dhe sigurisht unë këtë mundësi që kam fituar do ta shfrytëzoj në maksimum.

Përveç teje në këtë konkurs është edhe një tjetër shqiptare… Afërdita Dreshaj do të jetë gjithashtu pjesëmarrëse, a e ndjen konkurrencën me të?

Afërditën e njoh dhe nga afër dhe gëzoj një respekt tepër të madh për të. Ajo është një femër e kompletuar. Sigurisht që mes meje dhe asaj nuk do të ketë konkurrencë, pasi e rëndësishme është që njera nga ne të dyja të fitojë diçka dhe nëse Afërditës i ndodh kjo gjë unë do të isha shumë e lumtur.

I ke parë vajzat e tjera konkurrente? Si të duken?

Po i kam parë vajzat e përzgjedhura në internet dhe do të thoja që konkurrenca është me të vërtet e fortë. Vajzat janë tepër të bukura dhe gjithsecila ka nje veçanti që e karakterizon.

Kur do të nisesh për në Brazil?

Nga mesi i gushtit.

Dimë që ti edhe më parë ke konkurruar për të qenë pjesë e konkurseve të bukurisë, por si pasojë e moshës së vogël nuk ia dole. Ka qenë kjo ëndrra jote?

Jo e këtij konkursi por e “Super Model of Albania 2005”. Kam qenë 14 vjeç kur i jam futur botës së modelingut, pra kam 6 vjet që aderoj në këtë fushë. Ky angazhim më ka dhënë eksperiencën e duhur përsa i përket kësaj fushe. Sigurisht që kjo ka qenë ëndrra ime dhe më në fund nuk është më ëndërr, por realitet.

I preke pak më lart fillimet e tua në rrugën e modes, po çfarë mund të na thuash diçka më shumë?

Kam qenë tepër e vogël dhe sigurisht që kam punuar me një dashuri tepër të madhe për këtë profesinon. Siç e përmenda edhe më sipër, rruga ime në fushën e modelingut ka nisur me “Super model of albania 2005” dhe që atëherë kam marrë pjesë nëpër sete fotografike dhe sfilata të ndryshme.

Sa e vështirë është të mbijetosh në këtë fushë?

Kur e dashuron profesionin që bën dhe jep maksimumin mendoj që shpërblehesh me frytet e punës dhe vështirësitë janë të papërfillshme.

Çdo të thotë të jesh modele në Shqipëri?

Në të vërtet fusha e modës në Shqipëri nuk është aq e zhvilluar sa në vendet e tjera të botës. Të jesh modele në Shqipëri është kënaqësi pasi ti përfaqëson një pjesë të rëndësishme të bukurisë, por është e padiskutueshme që të jesh modele në një vend më të zhvilluar të krijohen mundësi më të mëdha për arritje profesionale dhe ekonomike.

Mendoni se kjo është puna që do bëni përfundimisht, apo mbetet vetëm një hobi juaj?

Jetëgjatësia e një modeleje nuk është e njëjtë me atë të shumë profesioneve të tjera ndaj dhe une duke menduar më gjatë po studioj në degën e inxhinierise dhe besoj se do t’i alternoj të dyja profesionet.

A paguhen aq sa duhet modelët në Shqipëri… dhe a nuk mendoni se në Shqipëri ka shumë njerëz që e mbajnë veten për model. Mjafton një set profesional dhe të gjithë vetëquhen model….

Jo aspak, nuk paguhen aq sa duhet. Jane të paktë ata që janë të tillë.

Rikthehemi pak tek fillimet tuaja në këtë fushë, më saktë tek reagimi që ka pasur familje…

Ato më kanë mbështetur gjithmonë dhe për këtë i falenderoj.

Nuk kishte asnjë pjestar të familjes që ishte skeptik për angazhimin tënd në këtë fushë?

Jo, asnjë.

E ke pasur kompleks ndonjëherë “zhveshjen”?

Po sigurisht që e kam pasur kompleks, ndaj asnjëherë nuk e kam tepruar me veshjen.

Mendon se modelet janë “femra të sponzorizuara”?

Modelet nuk sponsorizohen, por paguhen për punën që bëjnë.

Ku ke bërë plan t’i kalosh pushimet këtë verë, a ke bërë ndonjëherë plazh topless?

Nuk i kam planifikuar akoma dhe asnjëherë nuk kam bërë plazh toples.

Për çfarë shume parash do kishe pozuar “nudo”?

Për asnjë lloj shume nuk do të pozoja nudo, kurrë.

Të flasim tani pak për jetën private, ke përjetuar ndonjë lidhje dashurie apo simpati?

Jam duke e perjetuar.

Djemtë kanë frikë të të afrohen tashmë që je e njohur, apo ndodh e kundërta?

Nuk e di se çfarë ndodh me ta pasi vëmendjen e kam të përqëndruar tek personi i jetës sime.

Çfarë tipi meshkujsh të pëlqen?

Ai që kam zgjedhur.

Po profesioni ka rëndësi?

Sigurisht, profesioni na krijon mundësi për të pasur një jetë më të mirë.

Na fol pak tani edhe përditshmërinë tënde, si është ajo?

E zakonshme. Shkollë, studim, palestër, kafe me miq.

Zakonisht vajzat e bukura përgjithësisht nuk njihen për një inteligjencë të lartë, ose të paktën ky është botëkuptimi që është krijuar. Sa e vërtetë është kjo sipas teje duke e lidhur edhe me koleget e tua në këtë fushë?

Te jesh e bukur është një privilegj që i shtohet zgjuarsisë kur e ke atë. Kjo është thjesht një shprehje pa baza. Vipat.info