Produktet zbardhuese prishin dhëmbët

“Një buzëqeshje vezulluese”, ky është premtimi i shumë produkteve për zbardhimin e dhëmbëve që mund të blihen në farmaci. Por së bashku me dyshimin e rezultatit, është edhe një efekt i dytë jo më pak i rëndësishëm: dëmtimi i smaltit. Lajmi vjen nga një studim i publikuar në revistën “Journal of Dentistry”, që, sipas tij, duhet të bëjmë kujdes me disa produkte, veçanërisht ato të “kategorisë së parë”, të cilat përmbajnë formula të rrezikshme.

Studiuesit e “Ohio State University” (SHBA) kanë zbuluar se këto lloj produktesh, edhe pse nuk mund të dallohen me sy të lirë, prishin smaltin, i cili mund të rikuperohet nëse dhëmbi është i shëndetshëm. “Po flasim për një shkallë shumë të vogël. Por, edhe pse efekti mund të mos jetë i dukshëm për syrin e njeriut, është njëlloj i rëndësishëm për studimin, sepse na tregon se sa duhet të përmirësohen produktet”, ka thënë doktori, i cili drejton studimin.

Testi i pesë produkteve zbardhuese është kryer duke i aplikuar trajtimet te dhëmbët e njeriut. Duke krahasuar rezultatet dhe gjendjen shëndetësore të dy dhëmbëve të trajtuar në krahasim me të tjerët që nuk i ishin nënshtruar trajtimit, është vënë re se smalti dhe elasticiteti i sipërfaqes së dhëmbëve të trajtuar ishte reduktuar, edhe pse në masë të vogël. Në fakt, efekti zbardhues nuk e përmirëson gjendjen e dhëmbëve.

Zbardhja e dhëmbëve arrihet falë peroksidit të hidrogjenit, i cili “sulmon” molekulat pigmentale të smaltit, duke bllokuar refl ektimin e ngjyrës së verdhë (natyrale) poshtë. Pas rezultateve, doktori ka komentuar: “Sot njerëzit janë të prirur të mendojnë se bukuria e dhëmbëve qëndron te zbardhja, që mund të arrihet pas disa seancave trajtim. Ne e dimë se çdo mjekim, sado i lehtë të jetë, ka efekte anësore. E njëjta gjë ndodh edhe me zbardhjen”. Pra është më mirë të kemi dhëmbë pak të zverdhur dhe të shëndetshëm.

Një buzëqeshje e bukur, që nxjerr në pah dhëmbë të bardhë e të shkëlqyeshëm, është padyshim një armë e fortë joshjeje dhe veçanërisht vetëvlerësimi. Por, me kalimin e kohës, ngjyra natyrale e dhëmbëve tona fillon të errësohet, për shkak të pigmentit të ushqimeve dhe pijeve që konsumojmë, ose substancave të tjera si duhani, kafja etj. Gjithsesi, ngjyra natyrale e dhëmbëve është subjektive. Në natyrë nuk ekzistojnë dhëmbë të bardhë si porcelani: ngjyra e tyre anon tek e verdha dhe grija. Zakonisht kaninët (dhëmbët e qenit) kanë ngjyrë më të errët se dhëmbët e tjerë.

Të kujdesesh për dhëmbët do të thotë t’u ofrosh personave që të rrethojnë simpati dhe dashamirësi, duke kontribuar kështu që imazhi juaja të përmirësohet para të tjerëve. Sipas rezultateve të disa statistikave të fundit, në nivel botëror, 50 për qind e popullsisë nuk janë të kënaqur me ngjyrën e dhëmbëve të tyre. Do të dëshironin t’i kishin më të bardhë. Në fakt, shumë të rinj dhe të moshuar u janë nënshtruar trajtimeve të ndryshme për zbardhjen e dhëmbëve. Arritjet aktuale të odontologjisë kozmetike lejojnë zbardhjen dhe shkëlqimin e dhëmbëve si njëherë e një kohë.

Ai që dëshiron të ketë një buzëqeshje të ngjashme me yjet e Hollivudit mund ta arrijë lehtësisht ngjyrën e bardhë të porcelanit. Duhet të keni parasysh se trajtimet zbardhuese nuk duhet të aplikohen para moshës 14-vjeçare. Nëse njerëzit që kryejnë trajtime për zbardhjen pinë duhan dhe konsumojnë shumë kafe, përveç substancave të pasura me kromogjene, rezultatet për të pasur dhëmbë të bardhë nuk janë maksimale, madje ngjyra e bardhë nuk do t’u qëndrojë gjatë.

Për të rritur efektin zbardhues, këshillohet larja e dhëmbëve pas çdo vakti me një pastë të mirë. Nëse kjo nuk është e mundur për arsye të ndryshme, atëherë përdorni fi llin dentar ose drejtojuni dentistit për një pastrim më të imtësishëm. Për të pasur dhëmbë të shëndetshëm duhet t’i kontrolloni të paktën një herë në gjashtë muaj.