Pritet te prodhohet gjak nga orizi i modifikuar gjenetikisht!

Rezervat me gjak nëpër spitale shpesh mungojnë veçanërisht kur në një zonë ndodhin fatkeqësi të mëdha. Për momentin spitalet mbështeten në dhuruesit vullnetarë, por në të ardhmen ky problem i madh mund të zgjidhet përmes orizit. Telegraphi britanik ka raportuar për suksesin e shkencëtarëve kinezë të cilët nga kokrra e orizit të modifikuar gjenetikisht kanë arritur të prodhojnë përbërësin kyç të gjakut të njeriut. Fjala është për proteinat e plazmës së gjakut, albuminat, që do të duhej të mundësojnë prodhimin e gjakut artificial dhe kështu të ofrojnë alternativë të sigurt për dhurimin vullnetar të gjakut. Me rritjen e orizit të modifikuar gjenetikisht në fusha mund të prodhohen sasi më të mëdha të proteinave të cilat kanë rol thelbësor në transferimin e hormoneve dhe mineraleve, pastrimin e gjakut nga materiet e dëmshme dhe rregullimin e tensionit të gjakut. “Albuminat nga orizi janë identike me gjakun njerëzor, ndërsa testimet në minj kanë treguar që nuk kanë efekte anësore të padëshiruara”, ka deklaruar dr. Daichang Yang, shkencëtar i cili ka udhëhequr hulumtimin. Ai ka shtuar që prodhimi i albuminave nga orizi jep shpresë edhe për krijimin e proteinave tjera si hemoglobina dhe imunoglobulina. (standart)