Cfare permban cigarja?

Në laboratorin e analizave të cigareve për të zbuluar se çfarë ka brenda atyre false. Doni të dini se çfarë ka brenda tyre? Ç’nuk janë gjetur: flokë, plastikë, gjak, feçe…

Menyja është shumë e pasur: vezë insektesh, miza të ngordhura, qime minjsh, grimca metalesh, plastikë, fije floku, feçe kafshësh e njerëzish, copa të mpiksura gjaku, si dhe allci e ngrirë. Ja çfarë gjendet nëpër cigaret e falsifikuara, që prodhohen në laboratorët e paligjshëm të Kinës, Ukrainës, Rusisë, Polonisë dhe shiten kontrabandë në gjysmën e botës. Tashmë dihet, duhani të bën keq, por nëse nikotinës, oksidit të karbonit dhe katranit të cigareve normale që gjenden në treg u shtojmë elementët e listës së mësipërme, e shkurtojmë në maksimum jetën tonë.

Laboratori i analizave “British American Tobacco” (Bat) gjendet në Southampton, në jug të Anglisë, dhe është bashkëpunëtori i kompanisë që prodhon dhe tregton markat e famshme të cigareve si “Lucky Strike”, “Pall Mall”, “Ms”, “Dunhill”. Në një ndërtesë tjetër gjendet “Anti illicit trade intelligence unit”, që është një udhëkryq mes njësive hetimore dhe atyre shkencore. Skuadra drejtohet nga Ewan Duncan, një skocez me fytyrë të bardhë e të rrumbullakët, i cili tregon: “10 për qind e tregut të cigareve është i paligjshëm dhe prej këtyre një e treta është e falsifikuar. A e dini që në Kinë një fëmijë arrin të shesë 500 pako në ditë? Kontrabanda vazhdon të rritet në të gjithë botën dhe sa vjen e tërheq më shumë krimin e organizuar, sepse sjell fitime të mëdha. Për fat të keq, politika e shumë qeverive po rrit taksat dhe si pasojë rritet edhe çmimi i duhanit. Kjo gjë lehtëson edhe përhapjen e kontrabandës. Me një çmim të ulët mund të blihen cigare që vetëm nga pamja e jashtme u ngjajnë atyre të vërtetave”.

“Nga analizat e mostrave të konfiskuara që na vijnë nga e gjithë bota, vërejmë se cilësia e duhanit është jashtëzakonisht e ulët. Përveç shpifësirave që ju tregova më parë në mikroskop, duhet theksuar se këto cigare janë shumë herë më toksike. Në cigaret e gjetura në Britaninë e Madhe ka 160% më shumë katran, 133% më shumë oksid karboni, 80% më shumë nikotinë dhe 300% më shumë arsenik”, thotë Aideen Daly, eksperte ligjore e këtij sektori.

Njësoj sikur të jenë policë, nëpunësit e “Ait intelligence unit della Bat” takohen me kolegët e markave të tjera të cigareve (“Philip Morris”, “Japan Tobacco International”, “Imperial”) dy herë në vit dhe së bashku përpiqen në gjejnë linjat e përbashkëta në luftën kundër falsifikimit dhe kontrabandës së cigareve. Ka laboratorë shumë artizanalë, siç janë ata kinezë, që prodhojnë tonelata cigare paketimi i të cilave është i përafërt me origjinalin, gjë që për ekspertët e bën më të lehtë njohjen. Në disa nga këta laboratorë, nuk përdoren makineri për t’i paketuar cigaret, por vetëm fëmijë duart e të cilëve nuk mbajnë më shumë se 20 cigare. Pra gjithçka bëhet me dorë, duke shmangur çdo masë higjiene. Megjithatë, ka edhe laboratorë të tjerë ku të njëjtët ekspertë të antifalsifikimit lodhen shumë për të dalluar paketën e falsifikuar nga ajo origjinale.

“Tregu i paligjshëm është i lirë nga çdo lloj rregulli. Një nga pasojat jo të menjëhershme, por që mbetet shqetësuese, është pirja e duhanit nga fëmijët. Për shkak të mungesës totale të kontrollit të shitjes dhe çmimit të ulët që mbizotëron në tregjet zyrtare, kontrabanda mund të jetë një nxitje për të vegjlit që të pinë duhan”, thekson Duncan.

Çdo vit qeveritë europiane humbasin rreth 10 miliardë euro për shkak të kontrabandës dhe falsifikimit të cigareve. Organizata Botërore e Shëndetësisë ka llogaritur se në vitin 2020 cigaret kontrabandë do t’i kalojnë ato të shitjeve të ligjshme. Edhe agjencia amerikane për alkoolin, duhanin dhe armët e zjarrit ka denoncuar lidhjet e ndryshme mes organizatave kriminale të kontrabandës dhe terrorizmit ndërkombëtar. Duncan tregon disa fotografi që dokumentohen fshehjet e cigareve kontrabandë: një ngarkesë me detergjente të rreme, një cisternë e rreme në naftë... Çdo ngarkesë është një biznes (vetëm një kontejner sjell një fitim neto prej 1 milion e 100 mijë euro) dhe vetëm 3 për qind e trafikut të paligjshëm zbulohet nga policia e Europës.

Ky është një biznes i madh që vetëm sipërfaqësisht konsiderohet më pak i dëmshëm se trafiku i drogës, i armëve dhe i qenieve njerëzore; vetëm se këtu gjithçka përfundon në tym si qimet e minjve ashtu edhe insektet e ngordhura. (Gazeta Shqip)