Udhëtime të lodhshme? Krijohet “valixhja dembele”

Pothuajse të gjithë ata persona, që udhëtojnë shpesh e ndjejnë lodhjen e mbajtjes së valixheve në dorë.

Për këtë arsye, një student ka arritur të shpikë valixhen e së ardhmes, të etiketuar si “valixhja dembele”, e cila ka vetëm rrota dhe nuk ka dorezë mbajtëse, raporton noa.al

Në fakt kjo valixhe mund të cilësohet e tillë, pasi nuk mbahet në dorë kur udhëton dhe është si një robot që i shkon nga pas të zotit.

Ende nuk është qartësuar mënyra sesi arrihet kjo lidhje, por për drejtimin e saj mjafton të ndezësh sinjalin e “bluetooth”, të telefonit dhe valixhja të ndjekë ngado që shkon.

Kjo është një shpikje e kohëve të fundit, që është transmetuar në internet nëpërmjet një video, tepër të shikueshme.

Nëse sinjali humbet, valixhja mund të bllokohet automatikisht dhe pronari informohet nëpërmjet dridhjes së telefonit të tij.

Studenti 28-vjeçar që ka krijuar këtë lloj valixheje, shprehet se ende nuk është funksionale 100% dhe si pasojë ende nuk është e gatshme për të dalë në treg.

“Por është diçka që unë dua të zhvillojë edhe më tej. Besoj se në të ardhmen, do të jetë një ndër valixhet e shumta që do të përdoret nga udhëtarët”, shprehet studenti.