Anët pozitive dhe negative të lenteve të kontaktit!

Janë një alternativë e përdorur nga shumë persona, të cilët kanë eliminuar syzet, në të shumtën e rasteve kjo për arsye estetike, por lentet shkaktojnë problem serioze jo vetëm për shikimin tonë, por edhe për shëndetin në përgjithësi. Lentet e kontaktit shërbejnë për të korigjuar pjesën më të madhe të defekteve në shikim, madje janë në gjendje që të rregullojnë defekte, të cilat zor se mund t’i rregullojnë syzet. Megjithatë përzgjedhja e lenteve duhet të jetë shumë e kujdesshme dhe për të marrë një vendim, lente apo syze, duhet të kemi parasysh dy faktorë: atë praktik dhe estetik. Janë të padukshme, nuk bien, nuk thyhen, nuk lagen kur bie shi dhe nuk krisen. Por çdo medalje ka dy anë, kështu që veç anëve pozitive, lentet paraqesin edhe rrezik. Kjo ndodh në rastet kur ato nuk përdoren mirë, kur neglizhohet në higjienën e tyre, gjë e cila mund të shkaktojë problem më të avancuara, duke prekur në tërësi shëndetin tonë. Kush mban lente, mund të përballet me disa probleme Shëndeti, jo vetëm të syve. Njerëzit që kanë kaluar një sëmundje të rëndë në fëmijërinë e hershme, apo ata të cilët kanë tiparet shumë të çelta nuk mund të mbajnë lente. Një pjesë e konsiderueshme e atyre që përdorin lentet e kontaktit në përmirësimin e shikimit , kanë edhe alergji nga to. Në këtë rast, është më se e domosdoshme konsulta me mjekun okulist, i cili duhet të përcaktojë fillimisht natyrën e syrit. Kjo nënkupton aftësinë e syrit për të prodhuar lëndë të lëngshme, pasi në mungesë të tyre, syri irritohet nga përdorimi i lenteve. Ja pse kjo metodë e korigjimit të problemeve në shikim nuk përdoret asnjëherë tek të moshuarit, të cilët vuajnë nga lubrifikimi okular. Dëmet konkrete të lenteve të kontaktit në shëndet

Problematika më e zakonshme e shkaktuar nga përdorimi i lenteve është acarimi i bardhemës, pjesë e syrit. Ky acarim mund të jetë skuqje, e cila jo vetëm identifikohet në pjesën e bardhë të syrit, por edhe në qepallë, duke i dëmtuar të dyja këto pjesë. Sipas statistikave në të gjithë botën, ky problem prek çdo vit, një në pesëdhjetë individë. Ky lloj acarimi mund të jetë në dy lloje, infektiv dhe alergjik. Problematike është sepse të gjitha llojet e skuqjes dhe acarimit të bardhemës nga lentet, sjellin shqetësimin e tipit sikur keni në sy kokrriza të imta rëre, fillojnë sekrecionet e ndryshme, por jo të tipit të lotëve dhe ngandonjëherë, ky problem i shkaktuar nga lentet, nga ana e tij mund të shkaktojë edhe fotofobi, ose e thënë ndryshe frikë nga drita dhe pamundësi të të parit të dritës e shoqëruar edhe me fryrje të qepallave, çka do të ishte vërtet problem.

Diagnoza përcaktohet në bazë edhe të syrit. Nëse dyshohet për infeksion, merret në konsideratë evidentimi se cili mikroorganizëm ka shkaktuar infeksionin. Në këtë rast, ky lloj problemi mund të kurohet duke bërë seanca të ndryshme, gjatë të cilave aplikohen kremra apo pomada të ndryshme me bazë antibiotiku, të përcaktuar paraprakisht për të luftuar mikrobin që ka shkaktuar infeksionin. Mund të ndodhë që gjatë kësaj faze, të krijohen rreth syve sekrecione të padëshiruara, të cilat fare lehtë mund t’i hiqni duke shpëlarë sytë me solucion të sterilizuar, ose ujë të ngrohtë. Është mirë që kura të merret e dhënë nga mjeku, pasi vetëm ai mund të përcaktojë qartë problemin që keni dhe metodën që duhet të përdorni në kurimin e tij. Një tjetër problem të cilin mund ta shkaktojnë lentet e kontaktit, është pikërisht edhe gërvishtja e pjesës së brendshme të qepallës së syrit. Bëhet fjalë për një gërvishtje e cila shërohet me kalimin e kohës, mirëpo për aq sa zgjat, është jo vetëm e dhimbshme, por edhe shqetësuese dhe penguese në shikim, madje në të shumtën e rasteve shkakton edhe fotofobi. Kjo gërvishtje mund të sjellë edhe hiperlakrimizim, e thënë ndryshe edhe sasi mbi normalen të lotëve dhe lëngjeve të tjera të syrit. Dhimbja nga një problem i tillë, mund të trajtohet duke e mbuluar syrin me një fashë sterile, ndërkohë që jeni duke e trajtuar atë me medikamentet e rekomanduara nga mjeku. Ky lloj trajtimi bëhet në dy aspekte, e para shërben për ta mbrojtur syrin që të mos preket nga infeksionet e ndryshme gjatë gërvishtjes dhe së dyti, paralizohen muskujt e njërit sy, për të evituar dhimbjet gjatë trajtimit. Duhet pasur shumë kujdes në të tilla raste, pasi nëse merret një infeksion gjatë kësaj faze të trajtimin, ku ndjeshmëria e syrit është shumë e lartë, mund të kalohet edhe në një gjendje verbërie, ndonëse kjo ndodh shumë rrallë.

Lentet e kontaktit mund të përdoren në disa raste edhe si terapi për disa tipe shqetësimesh. Personat me miopi të theksuar, apo edhe të tjerë të cilët mund të kenë pësuar dëmtime të syrit si pasojë e traumave të ndryshme, mund të mbajnë lente kontakti, që ndër të tjerat shërbejnë edhe për të fshehur shenjat e ndryshme nga gërvishtjet në bardhemë. Megjithatë, përdorimi i tyre nuk duhet të bëhet asnjëherë pa konsultën tek okulisti. Veç kësaj, duhet të përdoren në mënyrë korrekte, duke zbatuar të gjitha këshillat e mjekut, që nisin që prej mënyrës si vendosen e deri te higjiena, për të pasur përfitimin e dëshiruar nga lentet. /ikub/