Kujdesi për dietën dhe pamjen më bën të dukem në formë

Kantautori Pirro Çako zbulon formulën e Festivalit të Këngës në RTSH. “Pas ‘Anjushka’- s'do të tërhiqem për albumin e ri”:

Keni pohuar si drejtor artistik i Festivalit të 47-të të Këngës në RTSH, se ky edicion do të jetë ndryshe. Cila është formula e re?

Një komision prej nëntë vetash bëri një përzgjedhje shumë të mirë të këngëve. Formula e re bëri që të kualifikoheshin vetëm 20 krijime, nga 32 këngë që kualifikoheshin më parë.

Nuk janë pak këngë duke pasur parasysh se ka kaq shumë këngëtarë dhe ky është një festival i përmasave të mëdha?

Festivali ka një pigment. Mendoj që do ishte e dhimbshme që këta këngëtarë të përgatitur për festivalin, të s’kualifikohen në natën finale. Konkurrentët e s’kualifikuar nuk e panë veten e tyre në skenë dhe të veshur, dhe normalisht e kishin më të lehtë për të provuar humbjen. Pastaj dihet që një këngë kushton.

Cilët dominojnë, kompozitorët e rinj apo ata të vjetër dhe si do të organizohet konkurrimi?

Janë përzgjedhur këngë të kompozitorëve të rinj dhe të vjetër. Për herë të parë 20 këngët do të këndohen në tri net dhe natën e dytë konkurrentët do dalin në duet me këngëtarë të tjerë të rinj, ose të karrierës. Dihet që përgjegjësia është e dyfishtë, pasi duhet të nxirrni një fitues për Eurovizion.

Cila mund të ishte një këngë e përshtatshme për Festivalin Evropian?

Për mendimin tim, duhet të jetë kënga shqiptare bashkëkohore, pop rock apo baladë. Nganjëherë kemi kërkuar të shkojmë me shumë zhurmë, por kemi pasur sukses me të thjeshtën. Mund të them se ka një problem në këtë përzgjedhje, pasi nuk përputhet çfarë kërkohet këtu me atë që kërkohet në Festivalin Europian.

Shumë mendojnë se festivali nuk e ka më sharmin e dikurshëm, ju ç’mund të thoni?

Mendoj që nuk është e vërtetë. Formula e sivjetshme do t’i japë rezultatet e para. Në këtë festival do të kënaqen të gjithë, nostalgjikët dhe të rinjtë. Festivali pati zbehje, sepse u zbeh dhe e kaluara jonë. Tashmë muzika ka evoluar, tingulli i këngëtarit është tërësisht i trafikuar. Por ka vlerë pa diskutim, pasi është një festival ku këndohet “live” dhe vazhdon rrugën e tij, sepse ka bërë histori. Ka lançuar emra dhe ka mbajtur gjallë mijëra njerëz në vite.

Edicionin e kaluar ishit në pozicionin e prezantuesit, si do ta kujtonit atë eksperiencë?

Nuk do kisha dëshirë ta provoja sërish, pasi kam shumë emocione dhe si pasojë humbas zhdërvjelltësinë, gjë që të penalizon shumë në një prezantim. S’e përballoj dot daljen në skenë çdo 4-5 minuta, pasi s’është në tipin tim.

Dukeni në formë të mirë fizike. Kujdeseni për t’u dukur i ri?

Kujdesem për dietën, lookun tim, por s’kam kohë të fle gjumë, pasi jam shumë i ngarkuar.

E mesa duket puna të mban në formë. E keni marrë me shumë intensitet punën për krijimin e këngëve të reja. Pse?

Po, e vërtetë që kisha vite pa punuar kaq shumë. Jam duke krijuar për këngëtarët e tjerë dhe e quaj kontribut, që muzika ime t’u pëlqejë atyre dhe ata të më kërkojnë t’u bëj një këngë.

Pas festivalit të dhjetorit, me çfarë keni në plan të merreni?

Pas festivalit do tërhiqem për të shkruar një album të ri, pjesë e të cilës do të jenë dhe këngët “Diferenca je ti”, dueti me Elsa Lilën, dhe “Anjushka”, me të cilën konkurrova në “Kënga Magjike”.