Eli Fara, performancë “me tango dhe trëndafila”

Viti i ri ka nisur vrullshëm për Eli Farën...

Pas një heshtjeje, të mbrojtur me fanatizëm, nga kampi i këngëtares më në fund vijnë lajmet e para, të cilat nuk janë assesi nga ato të zakonshmet. Nuk bëhet fjalë për një këngë, një klip apo syresh... Kësaj here përfaqësuesja e muzikës popullore korçare, ka lënë mënjanë serenatat, për të performuar “me tango dhe trëndafila.....” , nën petkun e balerinës 12 javë me radhë, në spektaklin “Të kërcesh me yjet”. Me tutu-të veshur, ajo na rrëfen se është futur “me mish e me shpirt” në sprovën e servirur në formë ftese, duke na prezantuar një Eli ndryshe. Pozicionin e ri e konsideron si një përvojë me përplot angazhime, për të dhuruar performancën e duhur, pasi për Elin të kërcesh për t’u argëtuar është e pamjaftueshme...

- Nga sa mësuam paraprakisht ju do të jeni një nga “yjet”që do të perfomoni në spektaklin “Të kërcesh me yjet”. Do të kërceni. Si e pritët ftesën? Deri më tani sa keni avancuar?

T’iu them të drejtën, ftesën nuk e prita me ndonjë entuziazëm dhe në fillim më tmerroi, pata dhe vijoj të kem një ankth, nëse do të funksionoj apo jo në këtë gjini, s’di në do t’ia dal. Sigurisht është një përvojë e bukur, megjithëse provat e para ishin aq të vështira, sa nuk ka ku të shkojë. Më pas kur e përvetësoj një lëvizje, sado e vogël më duket, sikur e kam ditur gjithherë. Është vërtet interesante kjo eksperiencë nga të gjitha që kam përjetuar deri më sot.

-E paskeni marrë shumë seriozisht rolin e balerinës. Jeni ndjerë e pakompletuar si këngëtare popullore?

Një këngëtare e kompletuar duhet të jetë edhe balerinë pasi bota kështu funksionon, çdo gjë lidhet zinxhir, që nga inskenimi, koreografia bashkë me këngën dhe element të tjera. Të paktën jashtë, artistët marrin kurse për të bërë spektakël, gjë që te këngëtarët e rinj tek-tuk funksionon. Është e nevojshme për çdo artist për të pasur edukatën e lëvizjeve bazë.

-Eksperienca te spektakli “Dancing ëith the stars” nuk është thjesht një kurs kalimtar apo jo?

Duke qenë se Enada ndjek punën e gjithë artistëve, për më tepër që më ka takuar partner Gerd Vason, është një përgjegjësi akoma më e madhe. Duhet të mbledhësh gjithë forcat për t’ia dalë dhe unë këtë po përpiqem të bëj.

-Deri më tani sa keni avancuar me lëvizjet?

Mirë, por do të mundohem që atë çka kam mësuar ta paraqes mirë, pasi kjo është pjesa më e vështirë dhe më e përgjegjshme.

-Vallëzimi i parë është tango sa pasionant aq edhe i vështirë. Mendoni se ju përshtatet tango teksa shihni veten në pasqyrat e sallës së provave?

Mendoj se impresioni i Enadës që më ka zgjedhur mua për tango ndoshta ka qenë se Elit i shkon një tango. Për t’u përshtatur besoj se më shkon, por edhe nëse nuk jam objektive kam 12 vallëzime të tjera për të treguar veten.

-Më lart më përmendët se provat zgjasnin rreth 2 orë çdo ditë, rrjedhimisht edhe kalori të djegura...

Në fillim nuk prisja se një eksperiencë e tillë do të ishte kaq shumë impenjative. Prova bëj çdo ditë, sigurisht kam lënë palestrën, pasi dy orë kërcimi i kapërcejnë orët e palestrës.