Nora: Nuk jam për bashkëjetesë, jam për martesë

Ajo është njëra ndër këngëtaret që shumë shpejt ka kapur majat e suksesit. Me paraqitjet e saj pati fituar shumë simpatizantë, të cilët nëpër vite sa vinin e shtoheshin. Një seksimbol, që vazhdon të ruajë linjat perfekte. Tashmë, prej fillimit të saj, ka ndërruar jeta private. Nuk është e vetme, por në krahë ka të fejuarin Robertin. Për të jeta private është e shenjë dhe ka vendosur ta ruajë me çdo kusht atë. Është pro martesës dhe nuk dëshiron të bashkëjetojë. Në këtë intervistë, dhënë për “RTK Blu”, ajo shpalos të tjera gjëra që nuk i ka thënë më parë.

Nora: Zakonisht jam e angazhuar nëpër mbrëmje muzikore dhe e diela në mëngjes më gjen në aeroplan. Pastaj gjithë e diela më shkon në gjumë, duke pushuar normalisht, meqë dihet se puna jonë më shumë është natën.

- Raportet me kohën si i ke?

Nora: Të them të drejtën kohët e fundit kam shumë pak kohë të lirë, pasi jam duke përgatitur disa këngë të reja, projekte të reja, mirëpo më pëlqen më shumë dinamizmi i jetës dhe nuk kam dëshirë të humb kohë nëpër lokale apo duke ndenjur kot. Mirëpo e metë e imja është pasi nuk jam e përpiktë në takime, pasi gjithnjë vonohem. Sa kohë që po mundohem ta rregulloj këtë, por deri më tani pas sukses, pasi prapë vonohem në takime.

- Na sjell pak kujtime të fëmijërisë tënde, të kohës kur ke filluar shkollën, meqë sot jemi me 7 Mars.

Nora: Kujtimet e shkollës i kujtoj me shumë nostalgji. Si fëmijë kam qenë pak e turpshme dhe dita e parë e shkollës më kujtohet shumë mirë. Ka qenë i vështirë momenti kur e kam para se vetë kam hyrë në shkollë te mësuesja pa nënë dhe babin. Ka qenë pak periudhë e vështirë, pasi na duhej ta ndajmë shkollën edhe me gjenerata të tjera. Pastaj me qenë 40 nxënës dhe kemi mësuar në kabinete.

- Ke kënduar ndonjëherë në shkollë?

Nora: Po e mbaj në mend se shpeshherë janë organizuar programe dhe kam marrrë pjesë qoftë në këngë, recitim ose vallëzim.

- I ke bërë mësuese dhuratë për 7 dhe 8 Mars?

Nora: Po sigurisht. Dy javë më parë jam kujtuar se çfarë ka t’i blej mësueses time dhe kam ëndërruar momentin kur t’ia jap. Gjithnjë për festë i kam dhuruar dhuratë.

- Më vonë kur u rrite pak, vazhdove shkollën e muzikës “Prenk Jakova”.

Nora: Muzika ka qenë ëndërr e imja dhe shkollën fillore e kam pasur privat, ndërkaq në shkollë të mesme në “Prenk Jakova. Mirëpo kam pasur dëshirë të vazhdoj akademinë e muzikës dhe të studioj xhaz muzikën. Mbase nuk është vonë dhe në të ardhmen mund të shkoj diku jashtë, mirëpo deri më tani nuk kam pasur mundësi pasi fillova të jem shumë aktive në muzikë.

- Të kanë mbështetur në shkollë shokët e shoqet?

Nora: Edhe shokët edhe mësimdhënësit më kanë përkrahur gjithnjë. E kanë ditur se fushë e imja do të jetë muzika që bëj tani dhe gjithnjë më kanë mbështetur.

- Më pastaj u orientove në dizajnin e modës. Pse?

Nora: Edhe dizajni ka qenë dëshirë e imja si e vogël, kam luajtur me kukulla u kam qepur rroba. Në një farë mënyre kam dashur ta plotësoj ëndrrën për akademi muzikore. Thjeshtë e kam studiuar për qejf dhe nuk e di çfarë do të bëj më vonë. Kam dëshirë të kem një linjë timen të rrobave, mirëpo ende është herët për të folur.

- Kënga e fundit është “Sekret”. Na fol pak më shumë për këtë këngë.

Nora: Kënga “Sekret” është këngë e Florian Mumajesit. Një këngë mjaft ritmike dhe po e shoh që po pëlqehet shumë nëpër koncertet që po mbaj. Qysh në fillim është pëlqyer dhe normalisht më gëzon shumë ky fakt.

- Si ndehesh në skenë kur del, çfarë do të thotë skena për ty?

Nora: Skena është e shenjtë për mua. Emocionohem sa herë që jam pjesë e saj dhe këto emocione vetëm sa vijnë e shtohen. Normalisht nuk është aspak e lehtë të dalësh në të dhe këtë punë nuk mund ta bëjë gjithkush.

- Ju paraqiteni nëpër mbrëmje muzikore si në Kosovë por edhe në vende të ndryshme në diasporë. Ku ndjeheni më mirë?

Nora: Është pyetje e vështirë kjo, pasi publiku nuk ndahet. Kudo që jam paraqitur, kam publikun tim, i cili për përkrahë shumë. Është ndjenjë shumë e mirë kur njerëzit vijnë në koncerte, vallëzojnë me ty, i dinë këngët e tua dhe ndoshta edhe mundohen të të imitojnë dhe veshje.

- Në koncertet e tua, vijnë vetëm shqiptarët, apo edhe të huajt?

Nora: Në koncerte kam pasur rastin të kem në koncerte edhe të huja, më shumë ndoshta në Kosovë, nga ushtarët që janë këtu, kërkojnë të bëjnë foto dhe bëjnë atmosferë. Edhe jashtë Kosovës vijnë, por gjithnjë të shoqëruar me djem apo vajza shqiptare.

- E ke vështirë të përzgjedhësh këngët?

Nora: Së pari e dëgjoj demon. Gjithnjë kompozitorët mendojnë se ndonjë këngë është tipike për mua. Ka raste kur e ndërrojmë krejtësisht. Te teksti gjithnjë kam ide të mia dhe në konsultime me tekstshkrues dhe shpeshherë ata i kanë realizuar idetë e mia. Unë kam shumë kujdes për tekste dhe mundohem çdoherë t’i përzgjedh pasi është shumë i rëndësishëm teksti në një këngë.

- Sa ka ndikim karriera në jetën private?

Nora: Nuk ka ndikuar. Janë krejtësisht ndryshe nga njëra tjetër. Jeta private i takon secilit. Mua nuk më ka penguar dhe nuk do të lejoj të më pengojë. Ne nuk jemi në Hollivud, kështu që jetën private e ruaj.

- Nora je për martesë apo për bashkëjetesë?

Nora: Nuk jam për bashkëjetesë, pasi mund të ndodhë që bashkëjetesa të dërgojë deri tek ndarja. Jam për martesë, sikur edhe prindërit tanë.

- Cilat janë tri vetitë e tua pozitive që do të doje t’ua lije fëmijëve të tu?

Nora: Mami im ka qenë nënë që m’u ka përgjigjur dhe më ta mbështetur për çdo punë që kam nisur të bëj. Kjo është një gjë shumë e mirë, kështu që do të doja t’ua bartja fëmijëve të mi. Kjo është kryesorja por edhe dashuria ajo që më ka dhënë nëna ime.