MKRS ndau çmimet letrare vjetore!

Në një ceremoni solemne, e cila u mbajt në ambientet e Galerisë së Arteve të Kosovës, në prani të shkrimtarëve, publicistëve dhe mediave të shkruara e elektronike, Ministria e Kulturës, Rinisë dhe Sportit bëri ndarjen e Çmimit Kombëtar Letrar për Vepër Jetësore “Azem Shkreli” dhe të çmimeve letrare vjetore.Në këtë ceremoni solemne Ministri Valton Beqiri dhe Zëvendësministrja Lirije Kajtazi bënë ndarjen e çmimeve letrare, me të cilat, në bazë të vendimit të jurisë profesionale, u nderuan: shkrimtari Nazmi Rrahmani me Çmimin Kombëtar për Vepër Jetësore “Azem Shkreli”, shkrimtari Gëzim Aliu me Çmimin letrar për librin më të mirë të vitit 2010 në prozë për romanin “Në klubin e të shëmtuarve”, poeti Ag Apolloni me Çmimin letrar për librin më të mirë të vitit 2010 për poezi për veprën “Zomb”, eseisti Ibrahim Berisha me Çmimin letrar për librin më të mirë të vitit 2010 për kritikë, eseistikë për veprën “Konvergjenca intelektuale” dhe përkthyesi Bekim Bejta me Çmimin letrar për librin më të mirë të vitit 2010 për vepër të përkthyer për veprën “Raga – afrim i kontinentit të padukshëm” nga Jean-Marie Gustave le Clezio, të përkthyer nga gjuha frënge.

Gjatë këtij akti solemn, Ministri Valton Beqiri mbajti një fjalë rasti në të cilën tha se organizimi i kësaj ceremonie është edhe një dëshmi e angazhimit dhe përkushtimit institucional të MKRS-së për mbështetjen, stimulimin dhe promovimin e vlerave të letërsisë sonë kombëtare. Në këtë kontekst, shtoi ai, sivjet MKRS e ka zgjeruar gamën e çmimeve letrare, disa nga të cilat jepen për herë të parë. Më tutje, Ministri Beqiri i përgëzoi laureatët e çmimeve letrare për vitin 2009, duke theksuar se MKRS do të vazhdojë ta mbështesë krijimtarinë letrare jo vetëm përmes këtyre çmimeve, por edhe përmes botimit dhe promovimit të saj.Në emër të laureatëve të shpërblyer, foli shkrimtari Nazmi Rrahmani, i cili pasi e falenderoi MKRS-në dhe jurinë profesionale për ndarjen e këtyre çmimeve letrare tha se ky është një moment i rëndësishëm për të dhe për autorët e tjerë të nderuar me këto çmime, duke shtuar se ndjen keqardhje që këtë privilegj të veçantë nuk e kanë përjetuar edhe shumë autorë të tjerë meritorë, të cilët tashmë nuk janë më në mesin tonë.

Ai, gjithashtu, i falenderoi edhe lexuesit, të cilët, sipas tij, përmes leximit të tyre të parreshtur, e kanë stimuluar dhe e kanë mbajtur gjallë frymëzimin dhe artin krijues në letrat shqipe.Ndërkaq, në kët ceremoni solemne u tha se MKRS tashmë ka vendosur që mjetet materiale të çmimit të refuzuar nga shkrimtari Rexhep Hoxha t’i destinojë për botimin e letërsisë për fëmijë.