Flet Marigona, bukuria e universit!

Së shpejti në Kosovë dhe Shqipëri do të fillojnë seleksionimet për të zgjedhur Miss Albania dhe Miss Kosovo of Universe. Pas suksesit të Marigonës vitin e shkuar, një numër i madh vajzash nga të gjitha trojet shqiptare pritet të aplikojnë në këto konkurse. Ne vendosëm të bisedonim me shoqëruesen e dytë të Miss Universe, Marigonën, nga Kosova për t’i treguar vajzave eksperiencën e saj personale gjatë dhe mbas pjesëmarrjes në Miss Universe.

- Ku jeni në këto momente dhe me çfarë jeni duke u marrë?

Tani ndodhem në Paris, vazhdoj të punoj sigurisht... Jam pjesë e agjencisë së modeleve “Trump” dhe jam ftuar nga agjencia e modeleve “Elite” këtu në Paris, ku do të qëndroj për disa muaj.

- Së shpejti fillon përzgjedhja për Miss Kosova. A do të jeni ju prezent në këtë proces?

Është privilegj i madh që tani jemi në sytë e botës. Të gjithë presin se çfarë do të sjellimkëtë vit në skenën e Miss Universe. Shpresoj shumë që do të kemi një vajzë që do të na ngrisë edhe më lart kësaj radhe. Unë do të mundohem që gjithsesi të jem prezent në përzgjedhjen e Missit këtë vit.

- Gjatë një viti si Miss, cilat kanë qenë eksperiencat tuaja më mbresëlënëse? Vendet që keni vizituar, njerëzit që keni takuar e projektet/ëndrrat që keni realizuar?

Ka qenë viti i realizimit të shumë ëndrrave, kam përjetuar eksperienca të paharruara, dhe dëshiroj të theksoj që muajin që lamë pas u emërova ambasadore e Kosovës për problemin e ujit në botë.