Vaksina te femijet, nje celes kunder alergjise

Kjo vjen jo vetëm për shkak të ndryshimeve atmosferike dhe ndotjes së ajrit, por edhe për shkak të zvogëlimit të imunitetit te disa njerëz. Në pjesën më të madhe të rasteve të prekurit nga alergjia e kanë atë të trashëguar. Për të analizuar dhe shmangur përparimin e alergjive janë kryer studime dhe eksperimentime të ndryshme te njerëz të ndryshëm. Ekspertët kanë shprehen se hapi i parë në luftën kundër alergjisë është parandalimi i saj. Për këtë është e nevojshme që trupi i njeriut duhet të njohë agjentin alergji- shkaktues. Prandaj përgatitja e vaksinave kundër alergjisë është nevoja më e ngutshme. Duke injektuar sasira të vogla alergjeni te fëmijët e vegjël, ndihmon që trupi i tij edhe me kalimin e viteve ta njohë atë dhe të mos shkaktojë gjendje alergjie.


Alergjia
Alergjia apo kundërveprimi alergjik është ai veprim që ndodh kur sistemi i imunitetit të trupit kundërvepron ndaj diçkaje që zakonisht nuk të bën ndonjë dëm. Ajo që shkakton alergjinë quhet alergjen. Alergjitë mund të shkaktojnë shfaqjen e një sërë simptomash të cilat varen nga sa serioze është alergjia. I njëjti alergjen mund të japë simptoma të ndryshme në njerëz të ndryshëm.
Disa nga simptomat e shkaktuara nga alergjitë mund të shkaktohen edhe prej gjendjesh të tjera. Alergjenët më të zakonshëm janë:
ushqime të ndryshme, poleni i luleve, bari, pemët, shkurret, pluhuri i shtëpisë, ilaçet, myshku, nikeli, alkooli, thumbimi i bletës apo i ndonjë insekti tjetër, etj. Shumë alergjikë nuk e dinë se janë të tillë deri në çastin kur trupi u kundërvepron në mënyrë alergjike. Në një rast të tillë njeriu duhet të shkojë të këshillohet me mjekun sepse ndonëse alergjia nuk mund të quhet drejtpërdrejtë si sëmundje simptomat që të jep mund të marrin përmasa dramatike. Me anë të provave në lëkurë mjeku arrin të gjejë ndaj kujt kundërvepron trupi. Në këtë mënyrë alergjiku mund të përpiqet t’iu shmanget vendeve me alergjenë të fuqishëm, por kjo gjë nuk është gjithnjë në dorë të tij. Në këtë rast vuajtjet mund të pakësohen me marrjen e ilaçeve Antihistaminike ose në raste të veçanta Kortizoni. Ilaçet antihistaminike mund të japin pasoja anësore si lodhje trupore, përkeqësim në përqendrim dhe në aftësi për të reaguar.


Kurimi
Një mënyrë për kurimin e alergjisë është metoda e Hiposensibilizimit, me anë të së cilës injektohen në trup doza të vogla alergjenësh ndaj të cilëve trupi i të sëmurit kundërvepron. Kjo është një përpjekje për të mësuar trupin me këto alergjenë dhe të mos të jetë kaq i ndjeshëm ndaj tyre. Hiposensibilimi injektohet përgjatë disa vjetëve. Në 80 % të rasteve jep rezultat.


Reaksioni alergjik
Reaksioni alergjik është një hipersensitivitet (mbindjeshmëri) ndaj substancave të caktuara, që reflektohet nga një reagim i tepërt i sistemit mbrojtës. Sistemi Imunitar me mekanizma te ndryshëm tenton të eliminojë substanca të huaja të cilat nuk “i njeh”, si mikroorganizmat, bakteret, viruset, etj.


Një nga rrugët e veprimit të Sistemit Imunitar është prodhimi i antitrupave. Kur trupi takon një substancë të huaj, alergjen, për herë të parë, një tip i qelizave të bardha, linfocitet, prodhojnë antitrupa që ngjiten te qelizat mast, tip tjetër qelizash të bardha. Nëse e njëjta substancë takohet prapë, alergjeni “ngjitet” te antitrupat në qelizat mastocite, duke shkaktuar lëshimin e disa mediatoreve (substanca kimike) që ndihmojnë për të shkatërruar agresorët.


Simptomat
Mediatori më kryesor është Histamina. Kjo substancë sjell skuqje, fryrje ose ngushtim të hundës e rrugëve të sipërme të ajrit, dhe ulje të presionit të gjakut. Pra e kuptojmë se në rast sulmi nga bakteriet a viruset këto mediatorë mbrojnë trupin nga infeksionet, në këtë rast ato “hutohen”, “turbullohen” e padrejtësisht shkaktojnë një reaksion alergjik . Një nga problemet më të hasura nga mjekësia në reaksionet alergjike është poleni i barit, që sjell rinitin alergjik, po ashtu pluhurat e ndryshëm, qimet e kafshëve, puplat e shpendëve etj. Këtu futet urtikaria, disa forma ekzemash dhe dermatitesh e alveoliti alergjik (e quajtur-mushkëria e fermerit). Pra duke menduar se lëshimi, lirimi i këtyre mediatoreve, sjell mbireagimin e sistemit mbrojtës të organizmit.

Si mund të kontrollohen alergjenët

Molekula e zbuluar nga një shkencëtar italian emërtohet interleuchina-12, dhe është një molekulë që prodhohet normalisht nga trupi ynë, e cila mund të bëhet një aleat i fortë për të realizuar shmangien e alergjisë pa u detyruar të heqësh dorë nga ushqimet që mund ta shkaktojnë atë. Zbulimi se interleuchina-12 mbron nga reaksionet alergjike u realizua nga eksperimentet laboratorike të disa minj, dhe tregon se kjo molekulë privon shfaqjen e alergjisë nga disa lloj ushqimesh. Nga eksperimenti u vu re se disa qeliza të goditura nga alergjia prej disa lloj ushqimesh pushojnë së prodhuari këtë molekulë, ndaj dhe alergjia kthehet në gjendje të përgjithshme trupore. Hipotezat e ekspertëve tregojnë se duke administruar interleuchinën-12, reaksionet alergjike mund të mbahen në kontroll të plotë. Janë të shumta ushqimet që mund të shkaktojnë alergji si: kikirikët, qumështi, vezët, gruri, soja, apo ato me përbërje vajore si arrat dhe bajamet. Mënyra më e mirë për të evituar një alergji të shkaktuar nga ushqimet është që ato të njihen dhe të mos përdoren. Edhe në rastet kur bëhet fjalë për puthje, këshillohet që partnerët të lajnë dhëmbët dhe fytyrën nëse ata kanë ngrënë një ushqim që shkakton alergji tek partnerët. Këshillë e vlefshme është që gjithnjë të lexohen përbërësit e ushqimeve. Kujdesi që u duhet kushtuar ushqimeve dhe alergjenëve të ndryshëm duhet të jetë i madh sepse mund të shkaktojë dhe vdekje. Kjo është një ndër rastet e një reagimi të fortë të shkaktuar nga alergjia, por mund të ndodhë. Mënyra më e mirë mbrojtëse është këshillimi me mjekun alergolog./tirana observer.