Niveli i lartë i hekurit dëmton mëlçinë!

Niveli i lartë i hekurit në gjak, edhe pse haset rrallë, mund të shkaktojë kolaps të plotë dhe dëmtime të mëdha të organizmit. Një gjendje e tillë dëmton mëlçinë, shkakton dhembje të nyjave, çrregullime të punës së zemrës, artrit, osteoporozë, e shpesh edhe kancer. Në botë çdo vit shënohen edhe disa raste të vdekjes së fëmijëve të helmuar me hekur.

Mjekët thonë se niveli i lartë i hekurit në organizëm, është po aq i rrezikshëm sa edhe mungesa e tij.

Niveli i lartë i hekurit, por edhe ai tepër i ultë, quhen vrasës të qetë. Ky problem më së shumti paraqitet te pleqtë, por edhe te fëmijët që kanë marrë gjak me anë të transfuzionit. Janë edhe disa sëmundje gjenetike, kur organizmi prodhon 2-3 herë më shumë hekur sesa që i nevojitet.

Meqë mëlçia është organi kryesor ku ruhet hekuri, atëherë ky organ është i pari që dëmtohet nga sasitë e tepërta të hekurit në gjak. Me këtë rast rritet edhe rreziku për kancer të mëlçisë. Personat që kanë nivel të rritur të hekurit në organizëm, kanë lëkurë ngjyrë bronzi. Te meshkujt, një gjendje e tillë mund të shkaktojë edhe impotencë.

Njëra ndër metodat më të mira të mjekimit kur bëhet fjalë për nivel të lartë të hekurit, është derdhja e gjakut, apo si quhet në mjekësi, flebotomia, apo edhe dhënia vullnetare e gjakut.

Duhet bërë disa analiza të sofistikuara për ta konstatuar se a keni nivel të lartë të hekurit, apo të ultë. /albeu.com/