Sheqernat “sekrete” të shtuara në ushqime, dëme në organizëm!

Shumica e njerëzve, sidomos femrat, në ditët e sotme synojnë drejt një mëngjesi sa më të lehtë dhe të “shëndetshëm”, zakonisht me drithëra dhe lëng portokalli. Mbi të gjitha, sepse ky lloj mëngjesi nuk ka yndyrën e dëmshme për organizmin që kanë disa ushqime të tjera, dhe të mban në formë të mirë trupore. Por ushqime të tilla përmbajnë sasi të caktuara sheqernash të shtuara, të cilat nëse tejkalohen në masë, janë po aq të dëmshme për organizmin tonë. Të gjithë ne i dimë rreziqet e yndyrës së tepërt, kripës dhe shumë kalorive në dietën tonë, por profesionistë të shëndetësisë paralajmërojnë se shumë prej nesh harrojnë të marrin në konsideratë se duhet moderuar edhe sasia e sheqerit që marrim bashkë me ushqimet që ne konsumojnë. Problemi, sipas ekspertëve, është se dietat tona të përditshme janë të mbushura me sasi të shumta sheqeri të shtuar në mënyrë artificiale, duke e çuar nivelin e tij në organizëm më lart se limitet e rekomanduara çka na vë në rrezik për një sërë sëmundjesh, duke përfshirë diabetin dhe sëmundjet e zemrës.

Ekspertët kanë zbuluar se sheqeri gjendet, çuditërisht, në sasi të mëdha edhe në ushqime të tilla si salcat dhe ushqimet e gatshme (fast-fud). Në fakt, prania e tij ka gjasa të jetë shumë e madhe në dietën tonë të përditshme, shumë më tepër se ne arrijmë ta kuptojmë, sugjerojnë studiuesit. Ironikisht, ushqime të cilat konsiderohen dhe rekomandohen si "të shëndetshme”, meqenëse përmbajnë yndyrna të reduktuara në sasi, në fakt mund të përmbajnë më shumë sheqer. Heqja e yndyrës së tepërt nga ushqimet e përpunuara i bën ato më pak tërheqëse për shije tona. Për pasojë, prodhuesit fusin përbërës të tjerë, duke përfshirë sheqer, për të rikrijuar shije dhe cilësi në këto ushqime, thonë studiuesit.

“Ne vendosëm të gjenim se sa sheqer përmbajnë ushqimet tona të preferuara dhe pijet - duke përfshirë edhe ato që shumë do t’i konsideronin të shëndetshme. Rezultatet ishin tronditëse! Udhëzime mjekësore rekomandojnë se sasia e sheqernave të shtuara - ato që përdoren për të ëmbëlsuar ushqime të ndryshme, pije, shurupe dhe lëngje frutash - nuk duhet të përbëjnë më shumë se 10 për qind të energjisë totale që ne marrim nga ushqimi, që është baras me 50 g sheqer në ditë, ose dhjetë kube sheqeri për të rriturit dhe adoleshentët dhe nëntë për 5-10-vjeçarët.

Por gjetjet tona tregojnë se vetëm një shishe 500ml e Coca-Cola e tejkalon këtë limit të rekomanduar”, - shprehen studiuesit. Edhe një sallatë 'e shëndetshme' përmban dy kube sheqer në përbërjen e saj. Dhe në të njëjtën mënyrë dhe me të njëjtin arsyetim mund të vazhdohet me shumë ushqime të tjera. Pra, nëse jeni duke e marrë sasinë më të madhe të sheqerit tuaj nga këto burime ushqimore, atëherë mund të bëni pjesë të dietës suaj ushqimore deri në 18 kube sheqer ose 90 g çdo ditë, që është thuajse dyfishi i sasisë normale të sheqerit që duhet të ketë në organizëm për të mundësuar një shëndet normal.

Mirëpo, sipas studiuesve, sheqernat e shtuar, zakonisht për të përmirësuar shijen e ushqimeve, kanë më shumë gjasa për të sjellë dëme në organizëm, pasi duke qenë se janë të shtuar artificialisht, nuk janë të lidhur në mënyrë të sigurt në strukturën e ushqimit, siç ndodh p.sh, në rastin e frutave. Kështu që, dëmet që mund të vijnë nga një dietë e superngarkuar me sheqerna janë të shumta dhe të ndryshme. Përveç diabetit, që është më i zakonshëm në këto raste, ajo mund të shkaktojë edhe kancer, pasi mendohet se glukoza, një nga përbërësit kryesorë të sheqerit të shtuar në ushqime të ndryshme, rrit sasinë e insulinës, që sipas studimeve në disa raste të caktuara sjell edhe zhvillimin e qelizave tumorale.(Shqip)