Yndyrnat i shkaterrojne shpejt arteriet e zemres!

Një dietë e pasur me yndyra mund të shkaktojë dëme të pariparueshme ndaj arterieve të zemrës, shumë më shpejt.

Këtë e tregon më së miri një studim i fundit. Në fakt, kjo është një gjë e ditur, le të themi, por vetëm në vija të përgjithshme. Ajo çfarë nuk dihej, ishte se sa kohë duhej që të dilnin në pah dëmet e dukshme që vijnë për arteriet nga një mënyrë e pakujdesshme të ushqyeri. Këtë e tregon pikërisht studimi i sipërpërmendur, i cili duke eksperimentuar fillimisht te kafshët, ka zbuluar se koha midis pakujdesisë që tregojmë në të ushqyer dhe shkatërrimit të vërtetë të arterieve është shumë më e shkurtër nga se sa mendohej deri tani. Duhet të tregojmë kujdes, pra, në atë çfarë servirim në tryezë, duke menduar ndoshta se do të duhet kohë para se të shkaktojmë dëme në organizëm me mënyrën tonë të të ushqyerit, sepse ne ndërkohë jemi duke dëmtuar seriozisht sistemin kardiovaskular.

Studim i publikuar në Revistën e Kërkimeve Kardiovaskulare, i kryer nga hulumtuesit e Shkollës së Mjekësisë, në Universitetin e Virxhinias, sugjerojnë se duhet të reduktojmë në maksimum yndyrnat e dëmshme nga dietat tona ushqimore, sepse ato mund të çojnë drejt vdekjes si rezultat i problemeve kardiovaskulare. Studimi në fjalë është përpjekur të vlerësojë efektet e yndyrës që gjendet në dietat tona ushqimore, tek arteriet, duke pasur parasysh dy gjendje të tyre: ngurtësi apo fleksibilitet si dhe vetitë strukturore të dy arterieve që kanë madhësive të ndryshme: e arteries karotide, e cila është më e madhe dhe torako-dorsale, cila është më e vogël. Eksperimenti u krye paraprakisht te dy grupe minjsh, të cilët u ushqyen për 6 muaj me dieta, respektivisht, të pasura me yndyra dhe me sasi normale të saj. Në përfundim të eksperimentit, studiuesit vunë re ndryshimet strukturore që kishin pësuar arteriet e minjve të ushqyer me ushqime të pasura në yndyrna dhe u vu re se enët e vogla të gjakut treguan shtim të ngurtësisë arteriale. “Këto rezultate sugjerojnë se, në një fazë të hershme të obezitetit, vetitë strukturore të arterieve të mëdha dhe të vogla janë të ndryshme, ndërsa ngurtësia e arterieve është e dukshme vetëm në enët e vogla të gjakut ", - sugjerojnë studiuesit.

Megjithëse nivelet e kolesterolit dhe yndyrës në gjak mund të duken normale, kjo nuk përjashton që mund të ketë inflamacion në muret e arterieve të cilat mund të shkaktojnë sëmundje të ndryshme kardiovaskulare. Kërkuesit, në përfundim të studimit, kujtojnë se rezultatet konfirmojnë atë që është e njohur tashmë; efektet shkatërruese të yndyrës në organizëm janë një kambanë alarmi për të pasur kujdes në ndjekjen e një diete të përshtatshme dhe të balancuar për të parandaluar dëmtimin e mundshëm, e shpesh të pariparueshëm të sistemit kardiovaskular, i cili në fund të fundit, është një nga sistemet kryesore që na mundëson të jemi gjallë. (shqip)